جوبا جاساۋشىلارىنىڭ ايتۋىنشا, Face PAY – بيومەتريالىق مالىمەتتەرمەن باسقارۋ جۇيەسى. بۇل ءارتۇرلى مىندەتتەردى ادامداردى تانۋ فۋنكتسياسى ارقىلى شەشە الادى. «استانا LRT» جشس ءۇشىن بۇل باستاما – جولاقى تولەۋدىڭ ەلەكتروندى جۇيەسىن جولاۋشىلارعا ىڭعايلى ەتۋدىڭ تاعى ءبىر مۇمكىندىگى. كومپانيا قوعامدىق كولىكتى جانە ونىڭ تولەم جۇيەسىن دامىتۋدا ارقاشان جاڭا مۇمكىندىكتەر ءۇشىن اشىق. قازىر تولەمنىڭ جاڭا ءتاسىلى تەحنيكالىق تەستىلەۋدەن وتۋدە. Face PAY جۇيەسىنىڭ ارتىقشىلىقتارى: جەڭىلدەتىلگەن جانە ىڭعايلى تولەم, 60 مينۋت ىشىندە تەگىن اۋىسىپ وتىرۋ, بيلەتتەۋدى اۆتوماتتاندىرۋ, باعدارلىق كولىكتى مونيتورينگىلەۋ, جولاۋشىلار اعىنىن تالداۋ, گەولوكاتسيا بويىنشا تاريفتەۋ, كليەنتتى ساناتتاندىرۋ, اۆتوكولىكتى ەسەپكە الۋ, ساپارلاردى ناقتىلاۋ. Face PAY ارقىلى قوعامدىق كولىكتە جول اقىسىن تولەۋ ءۇشىن telegramدا @facepay_bot بوت باعدارلاماسىن تابۋ, جسن ءنومىرىڭىزدى تىركەۋ, سۋرەتكە ءتۇسۋ, بانك كارتاسىن ەنگىزۋ كەرەك.
جولاۋشى ءوز دەرەكتەرىن پايدالانۋعا رۇقسات بەرگەننەن كەيىن, جابدىق ورناتىلعان اۆتوبۋسقا كىرىپ, جول اقىسىن تولەي الادى. بيلەت دەرەۋ telegram-عا كەلەدى. ازىرلەۋشىلەر حابارلاعانداي, پايدالانۋشىلاردىڭ جەكە دەرەكتەرى سەنىمدى قورعالادى.
«بيومەتريالىق (بەت-بەينە ارقىلى) تولەۋ جۇيەسى ءبىزدىڭ سەرىكتەستەرىمىز IPAY جانە ForteBank-پەن جاساعان قاناتقاقتى جوبامىز. وسى جوبانىڭ تەستىلەۋ نۇسقاسىن 1 اپتا بۇرىن قالالىق 10 جانە 5-اۆتوبۋستاردا جۇرگىزۋدى باستادىق. قازىر وسى توڭىرەكتەگى جۇمىستاردى جالعاستىرۋ ۇستىندەمىز. قاناتقاقتى جوبا بىزگە باستالعان ءىستىڭ كەمشىلىگىن نەمەسە ارتىقشىلىعىن انىقتاپ, ونىڭ تولىقتىراتىن, بولماسا الىپ تاستايتىن جەرلەرىن سارالاۋعا مۇمكىندىك بەرەدى. قازىر «استانا LRT» جشس كوپتەگەن تولەم جۇيەلەرىن ەنگىزىپ وتىرعانى بەلگىلى. ونىڭ ىشىندە كارتا, بانكتىك كارتا, سونىمەن قاتار سمس حابارلامالار ارقىلى تولەيتىن 8 باعدارلاما بار ەكەنىن ايتا كەتۋ كەرەك. بۇل جەردە تۇرعىندار قوعامدىق كولىكتە وزىنە ىڭعايلى ءتۇرىن پايدالانۋ ارقىلى جولاقىسىن تولەيدى. بۇعان دەيىن قىتايدا Alibaba كومپانياسى تاماقتانۋ ورىندارىنا ارنالعان Alipay دەگەن اتاۋمەن تولەم جۇيەسىن ەنگىزگەن بولاتىن. سونىمەن بىرگە ۇلىبريتانيادا مەترو جولاقىسىن تولەۋ ءۇشىن باستاعان جۇيە تولىق ىسكە اسىرىلماعان. ال ءبىزدىڭ قوعامدىق كولىكتەگى بيومەتريالىق تولەۋ جۇيەسى العاشقى جوبا دەپ ايتا الامىز», دەدى «استانا LRT» جشس باسقارۋشى ديرەكتورى, باسقارما مۇشەسى داۋرەن نۇراليەۆ.
ايتا كەتەتىن تاعى ءبىر جايت, 2018 جىلدان باستاپ ەلوردا قوعامدىق كولىكتەرى تولىقتاي ەلەكتروندى تولەم جۇيەسىنە كوشكەن بولاتىن. سول جىلدىڭ قىركۇيەگىنەن باستاپ SMS جانە QR-كود ارقىلى جولاقىسىن تولەۋ ەنگىزىلدى. ال «Senim», «Ipay», «SMSBAS», «OYBY» موبيلدىك باعدارلامالارىنىڭ ەرەكشەلىكتەرى – ۇيالى تەلەفون ارقىلى جولاقىسىن دەرەۋ تولەۋگە مۇمكىندىك بەرەدى.
