ايماقتار • 21 قازان، 2019

التىن كۇز، ارايلى سالتانات

38 رەتكورسەتىلدى

اۋا رايىنىڭ قولايلى شاعىندا ەگىن-تەگىنىن ۇلگىلى جيناپ العان شيەلى اۋدانىنىڭ حالقى «التىن كۇز-2019» مەرەكەسىن شات-شادىمان كۇيدە تويلادى. ديقاندار تويى­مەن قاتار ايتۋلى اقىن، ادەبيەت سىنشىسى، عالىم ءابدىلدا تاجىباەۆتىڭ 110 جىلدىعى، اۋداننىڭ ءتول باسىلىمى «وسكەن ءوڭىر» گازەتىنىڭ 80 جىلدىق مەرەيتويى اتالىپ ءوتتى.

ءيا، بيىلعى كۇز شيەلىلىكتەر ءۇشىن بەرەكەلى بولدى. اۋدان ديقاندارى جالپى 30 مىڭ گەكتارعا تاياۋ كولەمگە ەگىن ەكسە، ونىڭ 12478 گەكتارى – سىر سالىسى. ونىڭ ءار گەكتارىنان ورتاشا 61،2 تسەنتنەردەن ورتاشا ءونىم جينالىپ، شارۋاشىلىقتار قامباسىنا قۇيىلدى. بۇل سوڭعى جىلدارى قول جەتكىزگەن زور تابىس ەكەندىگى بەلگىلى. وسىنداي جان­كەشتى ەڭبەكتىڭ ناتيجەسىندە شيەلى اۋدانى وبلىستا جۇلدەگەرلەر قاتارىنان كورىندى. بۇل ورايدا اۋدانداعى ءىرى شارۋاشىلىقتار – اقمايا، توڭكەرىس، بيدايكول جانە بەستام ەلىنىڭ وزىق ەڭبەك ۇيىمداستىرۋىمەن ۇزدىك ناتيجە كورسەتكەنىن ايتقان ءجون.

ورتالىق ستاديوندا وتكەن شارادا قىزىلوردا وبلىسى اكىمىنىڭ ورىنباسارى ناۋرىزباي بايقاداموۆ قۇتتىقتاۋ ءسوز سويلەپ، ودان ءارى وزاتتاردى ماراپاتتاۋ راسىمىنە قاتىستى. اۋدان اكىمى ءاشىم ورازبەك ۇلى ءوز سوزىندە سوڭعى 5 جىلدا بارلىق سالالار بويىنشا دامۋدىڭ وڭ ديناميكاسىنا قول جەتكىزىلگەنىن تىلگە تيەك ەتىپ، قۇرىلىس، ينۆەستيتسيا كولەمى ارتىپ، اۋداننىڭ بيۋدجەتى بىرنەشە ەسەگە وسكەنىن اتادى. «كۇرىشتەن رەكوردتىق كورسەتكىش ءونىم جينالىپ، شيەلى اۋدانى وبلىستا بىرنەشە رەت «ۇزدىك اۋدان» اتاندى. بۇل ەرتەلى كەش ەڭبەك ەتكەن ەڭبەككەرلەردىڭ جەمىسى»، دەپ دالا ەڭبەككەرلەرىنىڭ جۇمىسىنا زور باعا بەردى.

ءا.تاجىباەۆتىڭ 110 جىلدىعىنا ار­نالعان «جىر-عۇمىر» اتتى تانىمدىق كونفەرەنتسيا جوعارى دارەجەدە ءوتتى. ون­دا حالىقارالىق «الاش» سىيلىعىنىڭ لاۋ­رەاتى، ادەبيەت سىنشى-زەرتتەۋشىسى، قارىمدى قالامگەر باقىت ساربالاەۆ، جازۋشى، حالىقارالىق «الاش»، «سوروس-قازاقستان» سىيلىقتارىنىڭ لاۋرەاتى قۋاندىق تۇمەنباي، قازاقستاننىڭ قۇرمەتتى ءجۋرناليسى سارسەنبەك بەك­مۇرات ۇلى، جۋرناليست-زاڭگەر، ءتىل جاناشىرى اعاي­دار ىسىم ۇلى، حالىقارالىق «الاش» سىيلىعىنىڭ لاۋرەاتى، اقىن قاتيرا جالەنوۆا، ءا.تاجىباەۆ اتىنداعى قىزىلوردا وبلىستىق امبەباپ عىلىمي كىتاپحاناسىنىڭ باسشىسى نۇرجامال مىرزامۇراتوۆالار تارتىمدى باياندامالار جاسادى.

مەرەكەلىك شارادا قازاقتىڭ ۇلتتىق ويىندارى دۋماندى قىزدىرا ءتۇستى. اق كيىز ءۇيدىڭ ىشىنە جايىلعان داستارقاندا قوناقتارعا ءدام ۇسىنىلدى. مەرەكەلىك شارا ودان ءارى اۋدان ونەرپازدارىنىڭ كونتسەرتتىك باعدارلاماسىنا ۇلاستى.

 

نۇرماحان ەلتاي

قىزىلوردا وبلىسى،
شيەلى اۋدانى

 

سوڭعى جاڭالىقتار

كۇلكى كەرۋەنى № 16

رۋحانيات • كەشە

اقىنعا ارنالعان كۇن

رۋحانيات • كەشە

باسپانامەن قامتيتىن باستى قۇجات

باعدارلامالار • كەشە

بولمىسى ءبۇتىن باعاەۆ

رۋحانيات • كەشە

ۇقساس جاڭالىقتار