قوعام • 21 قازان، 2019

تۇرمىستىڭ ساپالى بولۋى – ەل تۇراقتىلىعىنىڭ كەپىلى

22 رەتكورسەتىلدى

پرەزيدەنت ق.توقاەۆتىڭ قازاقستان حالقىنا ارناعان جولداۋى تا­ري­­حي ماڭىزى بار قۇجات دەپ ەسەپتەيمىز. ويتكەنى بۇل ەل ازاماتتارىنىڭ ءال-اۋقا­تىن ارتتىرۋعا بايلانىستى الدىڭعى كەزەكتەگى ماسەلەلەردى شەشۋگە باعىتتالعان.

تاۋەلسىزدىك جىلدارىندا قازاقستاندا الەۋمەتتىك مەملەكەتتىڭ بەرىك نەگىزى قالان­دى. سوعان قاراماستان مەملەكەت با­س­­شى­سى قازاقستاندىقتاردى ءتيىستى الەۋمەت­تىك قاجەت­تىلىكتەرمەن قامتاماسىز ەتۋ باعىتىن­داعى جۇمىستاردى جالعاستىرۋ قاجەت دەپ ەسەپتەيدى. ەندى ۇكىمەت پەن اكىمدەردىڭ قىزمەتى نەگىزىنەن وسى كورسەتكىشتەر بو­يىنشا باعالانىپ سارالاناتىن بولادى. جولداۋدا قازىرگى الەۋمەتتىك-ەكونوميكالىق جاعدايعا جان-جاقتى، تەرەڭ تالداۋ جاسالعان جانە ونى تۇبەگەيلى وڭالتۋ باعىتىندا ناقتى مىندەتتەر قويىلعان. ەڭ باستىسى، پرەزيدەنت ەڭ وزەكتى دەگەن ماسەلەلەر بو­يىنشا ناقتى مىندەتتەردى قويىپ، ونىڭ شەشىلۋ باعىتتارىن انىقتادى.

تۇرعىنداردىڭ كىرىسىن ارتتىرۋ، ءومىر ساپاسىن جاقسارتۋ سياقتى حالىقتى تولعاندىرعان ەڭ كەلەلى پروبلەمالار جونىندە سالماقتى ءسوز قوزعالدى. پرەزيدەنت مەملەكەتتىڭ تىنىس-تىرشىلىگىنەن جان-جاقتى حاباردار ەكەندىگىن تانىتتى. وسى تۇرعىدان العاندا، ەڭ تومەنگى جالاقى مولشەرىن 1،5 ەسەگە ارتتىرۋ جونىندەگى مىندەت ۇلكەن ماڭىزعا يە بولماق. ويتكەنى بۇل 1 ملن 300 مىڭ ادامنىڭ ومىرىمەن باي­لا­نىس­تى ماسەلە. 275 مىڭ مەملەكەتتىك قىز­مەت­شىنىڭ جالاقىسى 35%-عا وسەدى. ءوزىمىز ءبىلىم مەن عىلىم كەڭىستىگىندە قىزمەت ەتىپ جاتقان سوڭ مەملەكەت باسشىسى­نىڭ مۇعالىمدەردىڭ ماسەلەسىن دە نازاردان تىس قالدىرماعانى كوڭىلىمىزدى قۋانتتى. «پەداگوگتاردىڭ مارتەبەسى تۋرالى» جاڭا زاڭ قابىلداۋ بۇگىنگىنىڭ كەزەك كۇتتىرمەيتىن ماسەلەسى ەكەنىن بارشامىز بىلەمىز. پرەزيدەنتتىڭ ۇستازدارعا سالىنعان جۇكتەمەنى ازايتىپ، ءۇش اۋىسىمدى ءبىلىم بەرۋ ماسەلەسىن شەشۋ جونىندەگى تاپسىرماسى دەر كەزىندە كوتەرىلگەن ءادىل شەشىم دەر ەدىك. سەناتورلار قوعام اراسىندا ابدەن شارىقتاۋ شەگىنە جەتكەن بۇل ماسەلەنى  بىرنەشە رەت كوتەرگەن بولاتىن. ەندى مىنە، اتالعان زاڭنىڭ ورىندالۋىنا ءوز ۇلەستەرىن قوسۋعا دايىن. بۇل جەردە جوعارى وقۋ ورىندارىنىڭ پروفەسسور-وقىتۋشىلارىنىڭ مارتەبەسى تۋرالى ويلاناتىن ۋاقىت جەتتى دەپ ويلايمىن.

سونداي-اق پرەزيدەنت «قازاق ءتىلىنىڭ مەم­لەكەتتىك ءتىل رەتىندەگى ءرولى كۇشەيىپ، ۇلت­ارالىق قاتىناس تىلىنە اينالاتىن كەزە­ڭى كەلەدى دەپ ەسەپتەيمىن. بىراق مۇنداي دارە­جەگە جەتۋ ءۇشىن ءبارىمىز داڭعازا جاساماي، جۇمىلا جۇمىس جۇرگىزۋىمىز كەرەك»، دەپ ۋاقىت وتە كەلە ۇلتارالىق قاتىناس ءتىلى قا­زاق ءتىلى بولاتىندىعىنا سەنىم ءبىل­دىردى. اري­­نە ءسوز جوق، مەملەكەتتىك ءتىلدىڭ الەۋەت­تى، قۋات­­تى بولۋىنا ەرەن ەڭبەك ەتەتىنىمىز ءسوزسىز.

مەنىڭشە، پرەزيدەنتتىڭ مەديتسينا، قوعام­دىق تاماقتانۋ مەن كورسەتىلەتىن قىزمەت ماسەلەلەرىن قامتيتىن قىزمەت ساپا­سىن باقىلاۋ جونىندەگى بىرىڭعاي كوميتەت قۇرۋ جونىندەگى باستاماسى وتە قاجەت. بۇل تۇرعىندارعا ساپالى قىزمەت كورسەتۋ سياقتى پروبلەمانى شەشۋگە دەگەن ۇمتىلىس.

مەملەكەت باسشىسىنىڭ تۇرعىنداردى باسپانامەن قامتۋ ىسىندەگى جايباسارلىققا الاڭداۋى دا نەگىزسىز ەمەس. وسىعان جاۋاپ رەتىندە پرەزيدەنت اكىمدەرگە جەرگىلىكتى بيۋدجەت­تەن جەڭىلدىكپەن بەرىلەتىن يپوتەكا­نىڭ باستاپقى جارناسىن سۋبسيديالاۋ ماسەلەسىن قاراستىرۋدى تاپسىردى جانە ءىرى قالالاردا الەۋمەتىك جاعىنان از قامتىلعان ازاماتتارعا ارنالعان جالدامالى ۇيلەردىڭ قۇرىلىسىن كەڭەيتە ءتۇسۋدى مىندەتتەدى. مىنە، بۇگىنگى تاڭدا مۇعالىمدەر، دارىگەرلەر، پوليتسيا قىزمەتكەرلەرى مەن جاس ماماندار تاپ وسىنداي قادامداردى كۇتىپ وتىر. الداعى 5 جىلدا 650 وتباسى مەن 2 ملن-نان استام قازاقستاندىق وزدەرىنىڭ الەۋمەتتىك جاعداي­لارىن وڭالتىپ الۋلارى كەرەك.

ءاربىر ازاماتتىڭ ءوزىنىڭ ءومىر تۇرمىسى­نىڭ ساپالى دا جاقسى بولۋى اركىمنىڭ وزىنە بايلانىستى. دەگەنمەن مەملەكەت تاراپىنان باعامدى باعدار ارقىلى ءبىرتۇتاس دامۋ جولىنا ءتۇسۋ – ەلىمىزدىڭ تۇراقتى بولۋىنىڭ كەپىلى.

ايمان زەينۋلينا،

فيلولوگيا عىلىمدارىنىڭ

كانديداتى، پروفەسسور

 

سوڭعى جاڭالىقتار

كۇلكى كەرۋەنى № 16

رۋحانيات • كەشە

اقىنعا ارنالعان كۇن

رۋحانيات • كەشە

باسپانامەن قامتيتىن باستى قۇجات

باعدارلامالار • كەشە

بولمىسى ءبۇتىن باعاەۆ

رۋحانيات • كەشە

ۇقساس جاڭالىقتار