كاسىپكەر "ازمۋحانوۆ" جك ديرەكتورى تالعات قوششانوۆ بۇل ارەكەتتى ءماجبۇرلى شارا دەپ سانايدى.
-ءبىز استىقتى ايماق ەمەسپىز. ءبىز, ءتىپتى, ۇن دا شىعارمايمىز. بارلىق ۇن سىرتتان اكەلىنەدى. قازىر شىعارىلاتىن ناننىڭ وزىندىك قۇنى 85,3 تەڭگەگە تەڭ كەلىپ وتىر. سوندىقتان ناننىڭ باعاسىن كوتەرۋگە ءماجبۇرمىز. ءبىز ساۋدا نۇكتەلەرىنە 90 تەڭگەدەن جىبەرەمىز, ولار 95 تەڭگەدەن ساتادى, - دەدى, ت.قوششانوۆ. – ءبىز استىقتى ايماق بولماساق تا, بىزدەگى نان باعاسى ەل بويىنشا ەڭ تومەن. باسقا وبلىستاردا, ماسەلەن, نان باعاسىن 100 تەڭگەگە دەيىن, كەيبىر وڭىرلەر, ءتىپتى, 110 تەڭگەگە دەيىن كوتەرىپ جىبەردى.
ونىڭ سوزىنشە, بۇگىنگە دەيىن اتىراۋدا الەۋمەتتىك نان باعاسى ەڭ تومەن بولدى. كوپتەگەن ناۋبايحانالار شىعىنمەن جۇمىس ىستەدى. الەۋمەتتىك نان باعاسىنىڭ ءوسۋى بارلىق ايماقتاردا ورىن الىپ وتىر. الەۋمەتتىك نان دايىندالاتىن جوعارى سۇرىپتى ۇننىڭ باعاسى 140 تەڭگەدەن اسادى. بۇل – استىق باعاسىنىڭ قىمباتتاۋىنان تۋىنداپ وتىر. مۇنداي ءۇردىس وتكەن جىلى دا, اعىمداعى جىلدىڭ باسىندا دا بايقالعان بولاتىن.
ناۋبايحانا وكىلدەرى نان باعاسى كەلەر اپتانىڭ باسىندا جوعارىلايتىنىن مالىمدەدى. الايدا, نان ونىمدەرىن وندىرەتىن جانە ساتاتىن كومپانيالاردىڭ بارلىعى بىردەي نان باعاسىن بىردەن ءوسىرۋدى كوزدەپ وتىرعان جوق. مىسالى, "داۋلەت نان" جشس-ءى نان باعامىن 75 تەڭگە كولەمىندە وسى ايدىڭ اياعىنا دەيىن ۇستاپ تۇرۋدى ۋادە ەتتى. ماركەتينگ ءبولىمىنىڭ باسشىسى يرينا كولەسنيكوۆا مالىمدەگەندەي, كومپانيادا ازىرگە بۇرىنعى باعامەن الىنعان ۇن قورى بار.
-ايدىڭ اياعىنا دەيىن باعا باياعىشا بولادى. ودان كەيىن باعانى وسىرەمىز. بىراق, شىنى كەرەك, ءدال قازىر ناقتى قانشا پايىزعا جوعارىلاتاتىنىمىز تۋرالى شەشىم قابىلدانبادى, -دەدى,ي.كولەسنيكوۆا.
قالالىق اكىمدىكتىڭ كاسىپكەرلىك جانە اۋىلشارۋاشىلىعى ءبولىمى باسشىسى رۋسلان داۋلەتوۆتىڭ سوزىنە سۇيەنەر بولساق, قازىرگى تاڭدا الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن تۇراقتاندىرۋ مەحانيزمىن جۇزەگە اسىرۋ ءتارتىبىن بەكىتۋ تۋرالى اتىراۋ وبلىسى اكىمدىگىنىڭ قاۋلىسى دايىندالىپ جاتىر.
-اتالعان ءتارتىپ نەگىزىندە "اتىراۋ" اكك ارقىلى ءوز ناۋبايحانالارى بار كاسىپكەرلىك سۋبەكتىلەرىنە, ساۋدا جەلىلەرىنە جەڭىلدەتىلگەن قارىز بەرىلەدى. ولار ءوز كەزەگىندە, بەلگىلى ءبىر تاۋارلار مەن ولاردىڭ باعاسى بويىنشا, وزدەرىنە مىندەتتەمەلەر الادى. ماسەلەن, ۇن, نان ونىمدەرىنە. سايكەسىنشە, حالىقتا تاڭداۋ بولادى. اتالعان ساۋدا جەلىلەرىندە نان باعاسى تومەن بولادى, - دەدى ر.داۋلەتوۆ. – اكىمدىك قاۋلىسى ادىلەت ورگاندارىمەن كەلىسۋ ساتىسىندا. قاۋلىعا قول قويىلعاننان كەيىن زاڭدى كۇشىنە ەنەدى. بۇگىنگى تاڭدا وبلىس اۋماعىندا وتىزدان استام ناۋبايحانا بار, ولار تاۋلىگىنە 50 مىڭعا دەيىن نان ونىمدەرىن شىعارادى.
