ۇكىمەت • 18 قازان، 2019

ۇكىمەتتە زەينەتاقى ماسەلەلەرى تالقىلاندى

3067 رەتكورسەتىلدى

ۇكىمەت ۇيىندە پرەمەر-ءمينيستردىڭ ورىنباسارى بەردىبەك ساپارباەۆتىڭ توراعالىعىمەن زەينەتاقى جۇيەسىن ودان ءارى جەتىلدىرۋ بويىنشا جۇمىس توبىنىڭ كەزەكتى وتىرىسى ءوتتى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

ايتا كەتەيىك، مەملەكەت باسشىسى قاسىم-جومارت توقاەۆ قازاقستان حالقىنا ارناعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىندا ۇكىمەتكە جۇمىس ىستەيتىن ازاماتتارعا وزدەرىنىڭ زەينەتاقى جيناقتارىنىڭ ءبىر بولىگىن ماقساتتى پايدالانۋ ماسەلەسىن پىسىقتاۋدى تاپسىرعان ەدى.

وتىرىسقا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ،ءبىلىم جانە عىلىم ءمينيسترى اسحات ايماعامبەتوۆ، سەنات دەپۋتاتى مۇرات باقتيار ۇلى، ۇلتتىق بانك توراعاسىنىڭ ورىنباسارى ەسجان ءبىرتانوۆ، «اتامەكەن» ۇكپ باسقارما توراعاسىنىڭ ورىنباسارى يۋليا ياكۋپباەۆا، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى قاتىستى.

بۇدان وزگە، جۇمىس توبىنىڭ قۇرامىنا «قازاقستان قارجىگەرلەرىنىڭ قاۋىمداستىعى» زتب كەڭەسىنىڭ ءتورايىمى ەلەنا باحمۋتوۆا، «TALAP» قولدانبالى زەرتتەۋلەر ورتالىعى» قق ديرەكتورى راحىم وشاقباەۆ، «First Heartland Jysan Bank» اق ديرەكتورلار كەڭەسىنىڭ مۇشەسى بولات جامىشەۆ، «كمگ ينجينيرينگ» جشس باس ديرەكتورىنىڭ كەڭەسشىسى جاقسىبەك كۇلەكەەۆ، سونىمەن قاتار، باسقا دا ساراپشىلار مەن قوعام قايراتكەرلەرى كىرەدى. 

وتىرىس بارىسىندا «بجزق» اق باسقارما توراعاسى جانات قۇرمانوۆ قازاقستانداعى زەينەتاقى جۇيەسىن دامىتۋدىڭ كەشەندى تالداماسى بويىنشا اكتۋارلىق ەسەپ ايىرىسۋ جۇرگىزۋ ناتيجەلەرىمەن تانىستىردى.

بوعان قوسا، قارتايۋىنا بايلانىستى ەڭبەككە قابىلەتتى حالىققا تۇسەتىن جۇكتەمەنىڭ ۇلعايۋى جاعدايىندا ۇلەستىرۋ ءتيپى جۇيەسىنەن جيناقتاۋشى زەينەتاقى جۇيەسىنە كوشۋدىڭ جاھاندىق بەتالىستارى بايقالادى.

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جۇمىس توبىنا تۇرعىن ءۇي مەن ءبىلىم الۋ ءۇشىن زەينەتاقى جيناقتارىنىڭ ءبىر بولىگىن ماقساتتى پايدالانۋ بويىنشا ۇسىنىستارىن ۇسىندى. 

مىندەتتى الەۋمەتتىك تولەمدەردى ۋاقىتىلى ءارى تولىق تولەۋگە باقىلاۋدى كۇشەيتۋ بويىنشا قابىلدانىپ جاتقان شارالار تۋرالى قارجى مينيسترىلىگىنىڭ مەملەكەتتىك كىرىستەر كوميتەتى توراعاسىنىڭ ورىنباسارى تالعات ماماەۆ ايتىپ بەردى.

وتىرىس كەزىندە اتالعان ماسەلەلەر بويىنشا سىندارلى تالقىلاۋ بولىپ، ءتيىستى ۇسىنىستار بەرىلدى.

وسى جىلدىڭ سوڭىنا دەيىن جۇمىس توبى ۇزاقمەرزىمدى اكتۋارلىق مودەلدەردى قۇرۋ نەگىزىندە زەينەتاقى جۇيەسىن ودان ءارى جەتىلدىرۋ بويىنشا ۇسىنىستار ازىرلەيدى. 

سوڭعى جاڭالىقتار

تارالىم ءھام قارالىم

100 • بۇگىن، 06:55

تارحان تەكتى رەداكتور

100 • بۇگىن، 06:40

ءجۇز جىل

100 • بۇگىن، 06:27

ۇشقىر ويلار ۇشقىندارى

100 • بۇگىن، 06:11

ۇلكەن جولدىڭ ۇزىكتەرى

100 • بۇگىن، 05:58

ينۆەستيتسيا – دامۋ داڭعىلى

ايماقتار • بۇگىن، 05:49

ۇقساس جاڭالىقتار