القالى جيىندا بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جۇيەسىن جەتىلدىرۋ بويىنشا ۇسىنىستار ايتىلىپ, ونى وڭتايلى شەشۋدىڭ جولدارى كورسەتىلدى.
رەسپۋبليكالىق كەڭەستىڭ جۇمىس توبى مۇشەلەرىنىڭ وتىرىسىنا قالا اكىمىنىڭ ورىنباسارى ەربول سادىر, Nur Otan پارتياسى شىمكەنت قالالىق فيليالى توراعاسىنىڭ ءبىرىنشى ورىنباسارى باحادىر نارىمبەتوۆ, قالالىق باسقارما باسشىلارى, كەڭەس مۇشەلەرى قاتىستى. جيىندا دەنساۋلىق ساقتاۋ, ءبىلىم بەرۋ, الەۋمەتتىك قورعاۋ, ىشكى ىستەر باسقارمالارىنىڭ ەسەپتەرى تىڭدالىپ, قالاداعى بالالاردىڭ جاعدايى تۋرالى ستاتيستيكالىق مالىمەتتەر جانە بالالار مەن وتباسىلاردى قولداۋ بويىنشا ىسكە اسىرىلاتىن جوبالار تالقىعا ءتۇستى.
«رەسپۋبليكالىق جۇمىس توبىنىڭ ءۇشىنشى وتىرىسى وتۋدە. ءبىز ناقتى ۇسىنىستاردى دايىنداپ, ساراپتاۋىمىز كەرەك. ماسەلەن, قالادا وڭالتۋ ورتالىقتارى جەتىسپەيدى. وڭالتۋ ورتالىقتارىندا ماماندار دا تاپشى. الدا مەملەكەتتىك تاپسىرىس اياسىندا جەكەمەنشىك ورىنداردى اشۋ كەرەك ەكەنىن باعامداپ وتىرمىز. جالپى, وتىرىستا وسىنداي ناقتى ۇسىنىستار ايتىلۋى كەرەك», دەدى باحادىر مادەلى ۇلى.
Nur Otan پارتياسى جانىنداعى بالالاردىڭ قۇقىقتارىن قورعاۋ جونىندەگى رەسپۋبليكالىق كەڭەستىڭ جۇمىس توبى شىمكەنت قالاسىندا 10 مەن 11 قازان ارالىعىندا جۇمىس ىستەدى. جۇمىس توبى ساپار بارىسىندا «باقىتتى وتباسى» پارتيالىق جوباسىمەن تانىسىپ, قالاداعى بالالاردىڭ قۇقىقتارى مەن بوستاندىقتارىن قامتاماسىز ەتەتىن مەكەمەلەردىڭ قىزمەتىن باعالادى.
القالى جيىننان سوڭ رەسپۋبليكالىق كەڭەس مۇشەلەرى قالا اكىمدىگىنىڭ «حالىققا الەۋمەتتىك قىزمەت كورسەتەتىن قالالىق اۋماقتىق ورتالىعى» مەكەمەسى اۋماعىندا سالىنعان بالالار الاڭىنىڭ جۇمىسىمەن تانىستى. سونداي-اق الەۋمەتتىك قىزمەتتەر كورسەتەتىن «سامعاۋ سەنىم» ورتالىعى مەن «اسىل جۇرەك» الەۋمەتتىك-مەديتسينالىق ورتالىعىن ارالاپ كوردى. اتالعان مەكەمەلەردىڭ تىنىس-تىرشىلىگىمەن تانىسقان ەلوردالىق جۇمىسشى توپ «پسيحيكالىق دەنساۋلىق» ورتالىعى جانىنداعى مەديتسينالىق-پسيحولوگيالىق وڭالتۋ ورتالىعىنداعى بالدىرعانداردىڭ جاعدايىنا قانىقتى.
قازىرگى تاڭدا 50 ورىندىق «سامعاۋ سەنىم» الەۋمەتتىك ورتالىعىن جىل باسىنان بەرى 770 ادام پانالاعان. ونىڭ 297-ءسى – ايەل بولسا, 652-ءسى – كامەلەت جاسىنا تولماعان بالالار. ءتىپتى ورتالىقتى وتباسىندا ءزابىر كورگەن 24 ەر ازامات تا پانالاپتى. جەرگىلىكتى پوليتسيا وكىلدەرى ميلليوندى قالادا تۇرمىستىق زورلىق-زومبىلىققا ۇشىراعانداردان كۇندىز-ءتۇنى دامىلسىز قوڭىراۋ تۇسەتىنىن ايتادى.
ايتا كەتەرلىگى, جىل باسىنان بەرى شاھاردا شاڭىراعىندا شۋ شىعارعان 472 تۇرعىنعا قاتىستى زاڭ تالاپتارىنا سايكەس, اكىمشىلىك حاتتاما تولتىرىلعان. وتباسىندا زومبىلىق كورگەن 2512 ادام ارنايى قورعاۋعا الىنىپتى.
شىمكەنت
