ادەتتە جاز ايلارىندا حالىقتىڭ تۇتىنۋ بەلسەندىلىگى ارتىپ, باعا ءجيى قۇبىلاتىن. الايدا بيىلعى جازدا جىلجىمايتىن م ۇلىك نارىعىندا ايتارلىقتاي جاڭالىق بولا قويعان جوق. وعان ەلدەگى الەۋمەتتىك احۋال مەن ساياسي وزگەرىستەردىڭ اسەرى بولعانى انىق.
سوڭعى بىرەر جىلدىڭ بەدەرىندەگى ترەندكە كوز جۇگىرتىپ كورەيىك. 2018 جىلدىڭ شىلدە ايىندا جاڭادان تاپسىرىلعان پاتەردىڭ باعاسى ءبىر ايدىڭ ىشىندە 0,1 پايىزعا ارزانداپ, ودان كەيىنگى جارتى جىلدا, ياعني 2019 جىلدىڭ قاڭتارىنا دەيىن تۇراقتى تۇرە قىمباتتاۋمەن بولدى. ال اقپاندا قايتادان بىردەن 0,6 پايىز قۇلدىراپ, سول باعا قىركۇيەك ايىنا دەيىن ساقتالدى.
ەسەسىنە قايتالاما نارىقتاعى باعا تۇراقتى ءوسىم كورسەتتى. 2018 جىلدىڭ شىلدەسىنەن بەرى اي سايىن شامامەن 0,1-0,6 پايىز ارالىعىندا بىرتىندەپ كوتەرىلىپ كەلدى دە, تامىزدا بىردەن 1,2 پايىزعا قىمباتتادى.
جاز سوڭىندا جاعداي تاعى تۇراقتالىپ, قۇرىلىس سالۋ, ساتۋ پروتسەسى قايتا قارقىن العانى بايقالادى. ستاتيستيكا كوميتەتىنىڭ مالىمەتىنشە, 2019 جىلعى قىركۇيەكتە جاڭا تۇرعىن ءۇي باعاسى وتكەن ايمەن سالىستىرعاندا – 0,4 پايىزعا, قايتالاما نارىقتاعى باعا – 0,3 پايىزعا ءوستى. بىلتىرعى قىركۇيەكتەگى كورسەتكىشپەن سالىستىرعاندا جاڭا ءۇيدىڭ باعاسى 3,6 پايىزعا قىمباتتاسا, قايتالاما نارىقتاعى ءۇي قۇنى 4,6 پايىزعا كوتەرىلدى. جالپى, جىل باسىنان بەرى جاڭا ۇيلەردىڭ قۇنى – 3,5 پايىز, قايتالاما نارىق 3,3-3,6 – پايىز ارالىعىندا قىمباتتاعان.
تاعى ءبىر ايتا كەتەرلىگى, باسپانا جالداۋ باعاسى 1 جىل ىشىندە 7,4 پايىزعا قىمباتتاپتى. سوڭعى ءبىر ايدىڭ وزىندە كورسەتكىش 1 پايىزعا كوتەرىلگەنىن ايتا كەتەيىك.
ءۇش مەگاپوليستە ءۇي قىمباتتادى
وڭىرلەرگە جەكەلەي توقتالار بولساق, بىلتىرعى قىركۇيەكپەن سالىستىرعاندا جاڭا ۇيلەردىڭ باعاسى ەڭ قاتتى قىمباتتاعان قالا قوستاناي بولدى. قوستانايدا باعا ءبىر جىلدىڭ ىشىندە 17,2 پايىزعا جوعارىلادى. ال وسكەمەندەگى باعا ديناميكاسى انتيرەكورد جاساپ, ءبىر جىلدا 4,5 پايىزعا ارزاندادى.
ەڭ ءىرى ءۇش قالادا جاڭا ءۇي باعا ادەتتەگىدەي قىمباتتاپ وتىر. بىلتىرعى قىركۇيەكپەن سالىستىرعاندا ءۇي باعاسى نۇر-سۇلتاندا – 6,7 پايىز, شىمكەنتتە – 6,6 پايىز, الماتىدا – 4,9 پايىزعا كوتەرىلدى.
قايتالاما نارىققا كەلەر بولساق, شىمكەنت قالاسى باسپانا باعاسى سوڭعى ءبىر جىلدا ەڭ قاتتى قىمباتتاعان شاھارلاردىڭ كوشىن باستاپ تۇر. بۇل قالاداعى قايتالاما نارىقتاعى ءۇي باعاسى 27,4 پايىزعا ءوستى. ال اقتاۋدا كەرىسىنشە 0,9 پايىزعا تومەندەگەن.
ء«ۇي سالۋ قىمباتقا
تۇسەدى»
ستاتيستيكا كوميتەتىنىڭ مالىمەتىنشە, 2019 جىلعى 9 ايدا قۇرىلىس جۇمىستارىنداعى باعا كورسەتكىشى 1,1 پايىز ءوستى. سونىڭ ىشىندە قۇرىلىس-مونتاج جۇمىستارى – 0,2 پايىز, ماشينالار مەن جابدىقتار – 3,2 پايىز, وزگە دە جۇمىستار مەن شىعىندار 3,5 پايىز قىمباتتاعان.
قۇرىلىس ماتەريالدارىنا كەڭىرەك توقتالار بولساق, ەڭ كوپ قولدانىلاتىن عانىش كارتون – 5,4 پايىز, قىش تاقتايشالار مەن تاقتالار – 4,2 پايىز, تسەمەنت – 3,5 پايىز, تاباقتى شىنى – 2,3 پايىز, بيتۋم – 2,2 پايىز, اعاش ماتەريالدارى – 2 پايىز, قۇم جانە شاعىل – 1,5 پايىز قىمباتتادى. ەسەسىنە اك – 6,3 پايىز, بوياۋ مەن ەمال – 3,7 پايىز, قۇرىلىس ەرتىندىلەرى – 0,9 پايىز, لينولەۋم – 0,5 پايىز ارزانداپتى.
جالپى, سوڭعى ءبىر جىلداعى ترەندكە نازار اۋدارساق, قۇرىلىستاعى قىزمەت پەن تاۋار باعاسى 2018 جىلدىڭ سوڭىنا دەيىن تۇراقتى بولعانىن كورەمىز. جىل سوڭىندا نەگىزگى ماتەريالدار مەن قىزمەت قۇنى كۇرت ارزانداپ, بۇل ءۇردىس بيىل جازدىڭ ورتاسىنا دەيىن جالعاستى. ال جازدىڭ سوڭىنا تامان باعا كەرى قۇبىلىپ, قازىر قىمباتشىلىق جالعاسىپ جاتىر.
جاڭا ۇيلەردىڭ باعاسىنا قۇرىلىس جۇمىسىنىڭ قىمباتشىلىعى اسەر ەتسە, قايتالاما نارىقتاعى ۇيلەردىڭ قىمباتتاۋى ساۋدانىڭ كوبەيگەنىنەن بولدى. جوعارىدا ايتىلعانداي, جاز بويى تاۋەكەلگە بارا قويماعان جۇرت كۇزگە قاراي ءۇي ساۋداسىنا ارالاسا باستادى. ماسەلەن, ستاتيستيكا كوميتەتىنىڭ مالىمەتىنشە, 2019 جىلعى قىركۇيەكتە رەسپۋبليكادا ءۇي ساۋداسى بويىنشا
29 279 كەلىسىمشارت جاسالعان. بۇل وتكەن ايمەن سالىستىرعاندا 0,4 پايىزعا كوپ. ال جىل باسىنان بەرگى ساۋدا كولەمى 235 218-گە جەتىپ, بىلتىرعى جىلدىڭ العاشقى توعىز ايىمەن سالىستىرعاندا 22,5 پايىزعا ۇلعايدى.
سونىڭ ىشىندە نارىق ەڭ قارقىندى ۇلعايعان ءوڭىر – الماتى قالاسى. وڭتۇستىك مەگاپوليستەگى باسپانا ساۋداسى بىلتىرعىمەن سالىستىرعاندا 38,6 پايىزعا ارتىپ, 4,3 مىڭعا جەتكەن. بۇل جالپى رەسپۋبليكا بويىنشا كورسەتكىشتىڭ شامامەن 15 پايىزى. ەكىنشى ورىندا قىزىلوردا تۇر. بۇل وڭىردە باسپانا ساۋداسى بىلتىرعىمەن سالىستىرعاندا 31,6 پايىزعا ارتقان.
ودان كەيىن جامبىل, پاۆلودار, اتىراۋ, الماتى وبلىستارىندا ساۋدا كولەمى 25-30 پايىز ارالىعىندا ۇلعايعان. قاراعاندى, باتىس قازاقستان مەن شىعىس قازاقستان وبلىستارىندا كورسەتكىش 20-25 پايىزعا وسسە, اقتوبە, قوستاناي, سولتۇستىك قازاقستان وبلىستارى مەن نۇر-سۇلتان قالاسىنداعى باسپانا ساۋداسى 15-20 پايىزعا كوبەيدى. رەسپۋبليكا بويىنشا تەك ماڭعىستاۋ وبلىسىندا عانا پاتەر ساۋداسى باسەڭدەگەنى بايقالادى. وندا كورسەتكىش بىلتىرعىدان 3,6 پايىزعا كەم.
