قازاقستان • 15 قازان، 2019

قازاقستاندا تۇڭعىش رەت الەم ونكولوگتارىنىڭ ۇلكەن ءسامميتى وتۋدە

263 رەتكورسەتىلدى

بيىل 15 جانە 17 قازان ارالىعىندا نۇر-سۇلتان قالاسىندا ونكولوگيا سالاسىنداعى  دۇنيەجۇزىلىك كوشباسشىلار ءسامميتى وتەدى (World Cancer Leaders' Summit 2019). بۇل ونكولوگيالىق اۋرۋلارعا قارسى  كۇرەستىڭ تىڭ ءتاسىلىن ىزدەۋگە  ارنالعان  جىل سايىن وتەتىن جوعارى دەڭگەيدەگى كەڭەس. جاھاندىق ءىس-شاراعا  80-نەن استام ەلدىڭ وكىلدەرى كەلدى، قوناقتاردىڭ اراسىندا پرەزيدەنتتەر، ءبىرىنشى حانىمدار مەن كورولدىك وتباسى مۇشەلەرى، سىرتقى ىستەر  جانە دەنساۋلىق ساقتاۋ مينيسترلەرى، سونداي-اق ونكولوگيالىق اۋرۋلاردى باقىلاۋ سالاسىنداعى 350 كوشباسشى قاتىسۋدا. بۇل تۋرالى دەنساۋلىق ساقتاۋ مينيسترلىگىنىڭ ءباسپاسوز قىزمەتى حابارلادى.

ءسامميتتىڭ قۇرمەتتى قوناقتارىنىڭ ءبىرى -  وبىردى باقىلاۋ جونىندەگى حالىقارالىق وداقتىڭ پرەزيدەنتى (UICC)، يوردانيا حانشايىمى دينا مايرەد.

دەنساۋلىق ساقتاۋ ءمينيسترى ەلجان ءبىرتانوۆ دۇنيەجۇزىلىك ونكولوگيا سالاسىنداعى  كوشباسشىلار ءسامميتىن وتكىزۋ پلاتفورماسى رەتىندە قازاقستاندى تاڭداعان حالىقارالىق وداققا العىسىن ءبىلدىردى. سامميت - قازاقستاننىڭ دەنساۋلىق ساقتاۋ جۇيەسىندە ماڭىزدى تاريحي وقيعا. جالپى، بۇل ورتالىق ازيا ايماعىندا جانە تمد ەلدەرى اراسىندا ونكولوگيا بوينىشا  جوعارى دەڭگەيدەگى العاشقى شارا. 

ۆەدومستۆو باسشىسى فورۋمعا قاتىسۋشىلاردىڭ الدىندا بىرقاتار مىندەت تۇرعانىن ايتتى - بۇل ەرتە دياگنوستيكاعا قاتىستى  شەشىمدى تالقىلاۋ جانە قابىلداۋ; تۇراقتى دامۋ ءۇشىن دەنساۋلىق ساقتاۋ قىزمەتتەرىنىڭ نەگىزگى ستراتەگياسى رەتىندە مساك نىعايتۋ جانە قاتەرلى ىسىككە ششالدىققان ناۋقاستارعا ساپالى ءارى  اقىسىز مەديتسينالىق قىزمەت كورسەتۋ.

مينيستر قازاقستان 10 جىلدان بەرى  UICC مۇشەسى ەكەنىن جانە ونكولوگيالىق اۋرۋلارمەن كۇرەس ماسەلەسى ارقاشان ەلىمىزدىڭ  الەۋمەتتىك ساياساتىنىڭ باسىم باعىتى بولعانىن ەسكە سالدى.  40 جىلدان كەيىن، ياعني  2018 جىلى ددسۇ-عا مۇشە مەملەكەتتەر تاعى دا بىرىگىپ، مساك جونىندەگى استانا دەكلاراتسياسىن قابىلداپ، مساك ماقساتىن  انىقتادى. سول جىلى قر تۇڭعىش پرەزيدەنتى نۇرسۇلتان نازارباەۆ جىل سايىنعى جولداۋىندا نۇر-سۇلتان قالاسىندا ۇلتتىق زەرتتەۋ ونكوورتالىعىن قۇرۋدى تاپسىردى. ونىڭ ماقساتى - ونكولوگيالىق اۋرۋعا شالدىققاگ ناۋقاستاردى ساپالى مەديتسينالىق قىزمەتتەرمەن قامتاماسىز ەتۋ.  قازىر ورتالىقتىڭ قۇرىلىسى ءجۇرىپ جاتىر. بۇل ورتا ازياداعى ەڭ ءىرى ونكولوگيالىق ورتالىق بولادى دەپ جوسپارلانۋدا. سونداي-اق، ونكولوگيالىق اۋرۋلارمەن كۇرەس بويىنشا كەشەندى جوسپار ازىرلەندى، ونى جۇزەگە اسىرۋعا 35،1 ملرد تەڭگە ءبولىندى.

بۇدان باسقا، قازاقستاندا ءسۇت بەزى وبىرىن، جاتىر موينى وبىرىن، وڭەش جانە اسقازان وبىرىن، باۋىر وبىرىن، كولورەكتالدى وبىردى ەرتە انىقتاۋ ءۇشىن  اقىسىز سكرينينگ جۇرگىزىلەدى. ونكولوگيالىق اۋرۋلارمەن كۇرەس جونىندەگى كەشەندى جوسپار اياسىندا ەرلەر مەن ايەلدەرگە ارنالعان تەكسەرۋ كابينەتتەرى اشىلدى، ولاردىڭ سانى 539-دان 1284-كە دەيىن ارتتى. 5 جوعارى مامانداندىرىلعان رادياتسيالىق ونكولوگيا ورتالىعى، يممۋنوگيستوحيميا زەرتحانالارى، ونكوورتالىقتار دياگنوستيكالىق جابدىقتارمەن جابدىقتالعان، پسيحولوگتار مەن الەۋمەتتىك قىزمەتكەرلەر دە  بار. وتكەن جىلدان باستاپ قازاقستانداعى  ونكولوگتار  ەۋروپالىق مەديتسينالىق ونكولوگيا قوعامىنىڭ (ESMO) ۇسىنىمدارى بويىنشا جاڭارتىلعان حاتتامالار مەن ستاندارتتارعا سايكەس جۇمىس ىستەيدى.       سونىمەن قاتار، ءبىرتانوۆ  مۇنداي جەتىستىكتەرگە قاراماستان، ءالى دە جۇمىس ىستەۋ كەرەكتىگىن اتاپ ءوتتى. مىسالى، حالىق اراسىنداعى اقپارات ءالى دە تومەن بولىپ وتىر. ەل تۇرعىندارىنىڭ تەك 25%  عانا ونكولوگيالىق اۋرۋلارعا قارسى سكرينينگتەن وتەدى، دەمەك، وبىرى بار پاتسيەنتتەردىڭ 23%  ونكولوگيالىق اۋرۋلاردىڭ ەرتە كەزەڭدەرىندە دياگنوستيكالانادى. ۆەدومستۆو باسشىسى ونكولوگيالىق اۋرۋلاردى ەرتە كەزەڭدە ەمدەۋ وڭايىراق ەكەنىن ءايتتى. 

- ازاماتتاردىڭ ءوز دەنساۋلىعىنا دەگەن الەۋمەتتىك جاۋاپكەرشىلىگىن ارتتىرۋ، دەنساۋلىقتى نىعايتۋ جانە اۋرۋلاردى ەرتە انىقتاۋ بويىنشا جۇمىستاردى بەلسەندى جۇرگىزۋ قاجەت، - دەدى ول.

ال مەديتسينالىق قىزمەتكەرلەردىڭ، ونىڭ ىشىندە ونكولوگيا سالاسىنداعى  الەۋەتىن ارتتىرۋ بويىنشا جۇمىستار جۇرگىزىلۋدە. باس دارىگەر ە. ءبىرتانوۆ اۋىلدى جەرلەردەگى  مساك دامۋىنا كومەكتەسەتىن  جاس دارىگەرلەرگە ەرەكشە العىس ءبىلدىردى.

مينيستر ونكولوگيامەن كۇرەس بويىنشا تاعى بىرقاتار  ۇسىنىس جاسادى. اتاپ ايتقاندا، الداعى  2 جىلدا پەت ورتالىقتارىن اشۋ، يادرولىق دياگنوستيكانى دامىتۋ; تەلەپاتولوگيا جانە تەلەكونسۋلتاتسيا جۇيەسىن دامىتۋ; وڭالتۋدى جانە پاللياتيۆتىك كومەكتى دامىتۋ; دەربەستەندىرىلگەن مولەكۋلالىق-گەنەتيكالىق تەستىلەۋدى ەنگىزۋ; ونكولوگيادا ەمدەۋدىڭ يننوۆاتسيالىق ادىستەرىن ەنگىزۋ; ساۋلەلىك تەراپيا پاركىن جاڭارتۋ جوسپارلانعان. ونكولوگيالىق قىزمەتتى قوسا العاندا، جاپپاي دەنساۋلىق ساقتاۋ قىزمەتتەرىمەن قامتاماسىز ەتۋ شارالارىن كەڭەيتۋ ءۇشىن 2020 جىلدىڭ قاڭتارىنان باستاپ مىندەتتى الەۋمەتتىك مەديتسينالىق ساقتاندىرۋ ەنگىزىلۋدە. ءمامس مەديتسينالىق قىزمەتتەردىڭ قولجەتىمدىلىگىن، ساپاسىن ارتتىرۋعا جانە بەيرەسمي تولەمدەردى  تومەندەتۋگە ىقپال ەتەدى. ەلىمىز بويىنشا مساك جانە قوعامدىق دەنساۋلىق ساقتاۋ دەڭگەيىندە وبىرمەن كۇرەستى قارجىلاندىرۋ كولەمىن  ارتتىرۋ مىندەتى تۇر. بۇل وبىردىڭ، سونداي-اق باسقا دا جۇقپالى ەمەس اۋرۋلاردىڭ الدىن الۋدى جانە ەرتە انىقتاۋدى ىنتالاندىراتىن بولادى.

- ونكولوگيامەن كۇرەسكە  مەملەكەت پەن ۇكىمەت باسشىلارىنىڭ نازارىن اۋدارۋ وتە ورىندى.  بۇل ءىس-شارا جاھاندىق دەڭگەيدە  ىقپالدى  تۇلعالار مەن قاتەرلى ىسىككە قارسى كۇرەس سالاسىنداعى الەم كوشباسشىلارى وزەكتى ماسەلەلەردى تالقىلاي الاتىن كورسەتتى، - دەپ قورىتىندىلادى ە. ءبىرتانوۆ.

دۇنيەجۇزىلىك سامميت اياسىندا قاتىسۋشىلار ونكولوگيانى انىقتاۋدىڭ ءتۇرلى تاسىلدەرىن تالقىلاپ قانا قويماي، وبىرعا قارسى كۇرەسكە قوسقان زور ۇلەسى ءۇشىن ماراپاتتاۋ، «وبىر اتلاسى» ءۇشىنشى باسىلىمىن ىسكە قوسۋ جانە مەموراندۋمعا قول قويۋ ءراسىمى وتەدى دەپ كۇتىلۋدە.  

 

سوڭعى جاڭالىقتار

ۇقساس جاڭالىقتار