پرەزيدەنت ءوز جولداۋىندا قازىرگى زامانعى ءتيىمدى مەملەكەت قۇرۋ, ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋ, قارقىندى دامىعان جانە ينكليۋزيۆتى ەكونوميكا, الەۋمەتتىك جاڭعىرۋدىڭ جاڭا كەزەڭى, قۋاتتى وڭىرلەر – قۋاتتى ەل سىندى نەگىزگى باسىمدىقتاردى ايقىنداپ بەردى. تىڭعىلىقتى پىسىقتالىپ, ويلاستىرىلعان مىندەتتەر مەن تاپسىرمالار بەلگىلەگەن ءاربىر باسىمدىق ماڭىزدى.
مىسالى, پرەزيدەنت ازاماتتاردىڭ بارلىق سىندارلى ءوتىنىم-سۇراقتارىنا شۇعىل ءارى ءتيىمدى جاۋاپ قاتا الاتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ مىندەتىن قويىپ وتىر. ءيا, بۇگىندە ءار تۇرعىننىڭ كوكەيكەستى ماسەلەسى زاڭ شەڭبەرىندە جانە كوشەدە ەمەس, ءتيىستى مەكەمەنىڭ جاۋاپكەرشىلىكپەن قاراۋىنىڭ ناتيجەسىندە وڭ شەشىمىن تابۋى ماڭىزدى. بۇل ورايدا سايلاۋشىلارمەن كەزدەسىپ, بارلىق مۇڭ-مۇقتاجدارىن تىڭداپ جانە ونى ءتيىستى ورىندارعا جولداپ وتىراتىن جەرگىلىكتى ءماسليحات دەپۋتاتتارىنىڭ جۇمىسىن دا جانداندىرا ءتۇسۋ قاجەت دەپ ويلايمىن. سونداي-اق ول كەزدەسۋلەردى فورماتىن وزگەرتە وتىرىپ ءجيى وتكىزۋ دە وڭ ناتيجە بەرەرى انىق. ياعني, حالىقپەن كەرى بايلانىس ورناتۋدا دەپۋتاتتاردىڭ بەلسەندىلىگى دە ماڭىزدى.
مەملەكەت باسشىسى ۇكىمەتكە ميكرو جانە شاعىن بيزنەس كومپانيالارىن تابىس سالىعىنان 3 جىلعا بوساتۋ تۋرالى زاڭدى نەگىز قۇرۋدى تاپسىردى. مۇندا تەمەكى, ىشىمدىك سىندى اكتسيزدىك تاۋارمەن اينالىساتىندار, جەر قويناۋىن پايدالاناتىن كەيبىر ساناتتار جەڭىلدىككە ىلىنبەيدى. سونىمەن بىرگە قىزمەتكەر مەن جۇمىسشى جالداپ وتىرعان كاسىپكەرلەر سالىقتان بوساتىلادى. بۇل دا ءوز كەزەگىندە ەلگە ۇلكەن كومەك بولاتىن شەشىم. ەندى اياققا تۇرىپ كەلە جاتقان بيزنەسمەندەر ءۇشىن وڭتايلى بولماق, ولار وسى سالىقتان بوساتىلعان ۋاقىت ارالىعىندا كاسىبىن جولعا قويىپ, ەل ەكونوميكاسىنىڭ دامۋىنا ىقپال ەتەدى. مەملەكەتتىڭ ەكونوميكاعا ارالاسۋىن توقتاتۋ جولىندا بىرقاتار وزگەرىس ەنگىزىلمەك. بۇل باستامالار بيزنەسپەن اينالىسۋشى كەز كەلگەن كومپانياعا نەمەسە كاسىپكەرگە نارىقتىق باسەكەلەستىكتە جول اشادى. بۇرىنعىداي مەملەكەتتىڭ اقشاسىنا الاقان جايىپ وتىراتىن كومپانيالار ازايىپ, تازا باسەكەلەستىك پايدا بولادى. بۇل ءوز كەزەگىندە ەكونوميكانىڭ كەڭ قانات جايۋىنا ىقپال ەتەدى.
سونداي-اق پرەزيدەنت حالىققا جولداۋىندا ۇكىمەت مۇشەلەرىنە, مەملەكەتتىك ورگاندار مەن وڭىرلەردىڭ, مەملەكەتتىك كومپانيالاردىڭ جانە مەكەمەلەردىڭ باسشىلارىنا ءتيىستى رەفورمانىڭ جۇزەگە اسىرىلۋى ءۇشىن دەربەس جاۋاپكەرشىلىك جۇكتەلەتىنىن مالىمدەدى جانە قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەۋ تۋرالى ايتتى.
«قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ, ەتنوسارالىق تاتۋلىق پەن دىنارالىق تۇسىنىستىكتى قالىپتاستىرا بەرۋىمىز قاجەت. ءبىزدىڭ ۇستانىمىمىز: ەل بىرلىگى – ونىڭ ارالۋاندىعىندا!» دەدى قاسىم-جومارت توقاەۆ.
سونداي-اق مەملەكەت باسشىسى تامىز كونفەرەنتسياسىندا الداعى ءتورت جىل ىشىندە مۇعالىمدەردىڭ ەڭبەكاقىسىن ەكى ەسە ارتتىرۋدى تاپسىرعانىن ايتا كەلىپ: «بۇل – كەلەسى جىلدان باستاپ ۇستازداردىڭ جالاقىسى 25 پايىزعا وسەدى دەگەن ءسوز», دەدى.
جولداۋدا ايتىلعان تاعى ءبىر ماڭىزدى ماسەلە – ازاماتتىق قوعامعا قولداۋ كورسەتۋ قاجەتتىگى. پرەزيدەنت: «ازاماتتىق قوعامعا قولداۋ كورسەتۋ كەرەك, حالىقتى جالپىمەملەكەتتىك وزەكتى تاپسىرمالاردى تالقىلاۋعا تارتۋ كەرەك. سول ءۇشىن دە ۇلتتىق قوعامدىق سەنىم كەڭەسى قۇرىلدى», دەي كەلىپ, ول كەلەلى ماسەلەلەر كوشەدە ەمەس, پارلامەنتتە شەشىلۋى ءتيىس ەكەنىن قاداپ ايتتى.
سونداي-اق «الدا بولاتىن ءماجىلىس جانە ءماسليحات سايلاۋى ەلدى كوپپارتيالى جۇيەگە اكەلۋى ءتيىس», دەدى پرەزيدەنت.
جولداۋداعى اسى ماڭىزدى ماسەلەنىڭ ءبىرى – قازاق ءتىلىنىڭ مارتەبەسى, بۇل رەتتە پرەزيدەنت قازاق ءتىلىنىڭ مەملەكەتتىك ءتىل رەتىندە ءرولىنىڭ كۇشەيىپ, ۇلتارالىق قاتىناس تىلىنە اينالاتىن كەزەڭىنىڭ كەلىپ جەتكەندىگىن اتاپ كورسەتتى. مەملەكەتتىك تىلگە قاتىستى مىندەتتى جۇزەگە اسىرۋ ءۇشىن قولدان كەلگەن بارلىق قاجەتتى جاعدايلارىمىزدى جاساۋىمىز قاجەت دەپ بىلەمىن, بۇل ءبىزدىڭ ۇلتىمىز بەن ۇرپاقتارىمىزدىڭ كەلەشەگى ءۇشىن قاجەتتى شارا بولماق. جولداۋدا حالىقتى الەۋمەتتىك قورعاۋعا, الەۋمەتتىك ماسەلەلەردى شەشۋگە باسا ءمان بەرىلدى. ءبىلىم بەرۋ, مەديتسينالىق قىزمەت كورسەتۋدىڭ ساپاسىن ارتتىرۋ, الەۋمەتتىك قولداۋدى ودان ءارى دامىتۋ, وتاندىق زەينەتاقى جۇيەسىنىڭ تيىمدىلىگىن ارتتىرۋ بويىنشا ۇكىمەتكە بىرقاتار تاپسىرمالار جۇكتەلدى. اسىرەسە جۇمىس ىستەيتىن ازاماتتاردىڭ ءوز زەينەتاقى جيناقتارىنىڭ ءبىر بولىگىن تۇرعىن ءۇي ساتىپ الۋعا, ءبىلىم الۋعا ماقساتتى پايدالانۋى تۇرعىسىنداعى تاپسىرماسى حالىقتىڭ بەلسەندى توپتارى ءۇشىن كوڭىل قۋانتارلىق جاعداي ەكەنى ءسوزسىز. ارينە مۇنىڭ بارلىعى پرەزيدەنت پەن ۇكىمەت تاراپىنان قاراپايىم حالىقتىڭ قامى ءۇشىن جاسالىپ وتىرعان يگى شارالار. ولاي بولسا بارلىعىمىزدى ىنتىماق-بىرلىگىمىزدى تۋ ەتىپ, وبلىس كولەمىندە وسى مىندەتتەردى جۇزەگە اسىرۋ ءۇشىن ايانباي اتسالىسۋعا شاقىرامىن!
قايرات بالابيەۆ,
تۇركىستان وبلىستىق ءماسليحاتىنىڭ حاتشىسى
