«اۆتوبۋس» جەدەل الدىن الۋ ءىس-شاراسىنىڭ العاشقى ءتورت كۇنى ىشىندە وبلىس بويىنشا قوعامدىق كولىك جۇرگىزۋشىلەرى 592 مارتە جول ەرەجەسىن بۇزعانى انىقتالدى. باتىس قازاقستان وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى بولاتبەك بەلگىبەكوۆ وسىلاي مالىمدەدى.
جوعارىداعى مالىمەتتى تاراتىپ ايتساق, كولىك جۇرگىزۋشىلەرىنە جول ۇستىندە تەلەفون قولدانعانى ءۇشىن 130 اكىمشىلىك ماتەريال تولتىرىلعان. 6 جۇرگىزۋشى تاسىمال كەزىندە ەڭبەك جانە دەمالىس رەجيمىن بۇزعان. 153 اكىمشىلىك ماتەريال مانەۆر ەرەجەسىن بۇزعانى ءۇشىن قاتتالدى. 38 جۇرگىزۋشى تەحنيكالىق باقىلاۋدان وتپەگەن كولىك قۇرالدارىن باسقارعانى ءۇشىن جاۋاپقا تارتىلسا, 10 اۆتوبۋستىڭ زاڭسىز قايتا جابدىقتالعانى انىقتالدى. قوعامدىق كولىكتى باسقاراتىن 40 جۇرگىزۋشى جىلدامدىقتى ارتتىرعانى ءۇشىن ايىپتى بولدى. ال 1 جۇرگىزۋشى جول ەرەجەسىن ورەسكەل بۇزىپ, قارسى باعىتتاعى جولاققا شىعىپ كەتكەن. سونداي-اق 44 جۇرگىزۋشى ءتيىستى قۇجاتسىز كولiك قۇرالدارىن باسقارعانى ءۇشىن اكىمشىلىك جاۋاپكەرشىلىككە تارتىلدى.
«اۆتوجولداردا اۆتوبۋستار جانە تاكسيلەردىڭ جولاۋشى تاسىمالداۋ كەزىندە تالاپتاردى ساقتاۋ بويىنشا باقىلاۋ كۇشەيتىلدى. پوليتسيا قىزمەتكەرلەرى زاڭسىز قايتا جابدىقتالعان اۆتوبۋستاردى, سونداي-اق تەحنيكالىق جاعدايى مەن قۇرىلىسى جول قوزعالىسى قاۋىپسىزدىگىنىڭ بەلگىلەنگەن تالاپتارىنا سايكەس كەلمەيتىن اۆتوبۋستار مەن تاكسيلەردى پايدالانۋعا تىيىم سالۋ شارالارىن قولدانۋدا. ءىس-شارا بارىسىندا الدىن الا جانە كەزەڭ-كەزەڭمەن, ونىڭ ىشىندە رەيس الدىندا جۇرگىزۋشىنى مەديتسينالىق تەكسەرۋ, ولاردىڭ ەڭبەك جانە دەمالىس رەجيمىن ساقتاۋىنا ەرەكشە ءمان بەرىلەدى» دەلىنگەن پوليتسيا تاراتقان مالىمدەمەدە.
«اۆتوبۋس» جەدەل-پروفيلاكتيكالىق ءىس-شاراسى قازان ايىنىڭ 17-سىنە دەيىن سوزىلادى.
باتىس قازاقستان
