قالا تۇرعىندارى مەن قوناقتارى ءۇشىن تەاتر ۇجىمى كورەيلەردىڭ قازاقستاندا ءومىر ءسۇرۋىنىڭ 80 جىلدىعىنا ارنالعان «بلاگوسلوۆەننى بۋدتە ناۆەكا!» تەاترلاندىرىلعان قويىلىمىن ارنايى دايىندادى. اتالمىش قويىلىمنىڭ قويۋشى رەجيسسەرلەرى – نادەجدا كيم مەن ەلەنا كيم. بۇل قويىلىمدا كورەي تەاترىنداعى بارلىق جانر ءبىر ارناعا توعىستى: درامالىق, ۆوكالدىق جانە حورەوگرافيالىق ونەر ورتاق سپەكتاكلدىڭ مازمۇنىن بايىتا ءتۇستى. قويىلىم ەجەلگى زاماننان بۇگىنگى كۇنگە دەيىنگى كورەي حالقىنىڭ شىرعالاڭعا تولى باي تاريحىن كوركەم ءارى تىڭ تاسىلمەن بايانداۋدى مۇرات تۇتقان. تەاتر ارتىستەرى ەجەلگى كورەيانىڭ كەڭىستىكپەن, داستۇرمەن ۇيلەسىمدى سالتى مەن سۇلۋلىعىن, ودان ءارى قيىر شىعىسقا قونىس اۋدارعانىن, جەر اۋدارىلىپ كەلگەننەن كەيىن قامقور پەيىلىن كورسەتكەن قازاق حالقىنا العىسىن, سوعىس جىلدارىنىڭ اۋىرتپالىعى مەن بۇگىنگى باقىتتى ءومىردى ساحنا تىلىمەن كەلىستىرە كورسەتەدى. ساحنالىق كورىنىستەر بىرىنەن كەيىن ءبىرى اۋىسىپ, كورەرمەننىڭ كوز الدىندا كورەي ەتنوسىنىڭ ءومىر تاريحى تالدانادى. ۇلتتىق كوستيۋمدەر, اكتەرلەردىڭ شىنايى ويىنى, ۆوكاليستەردىڭ عاجايىپ داۋىسى جانە حورەوگرافيالىق كومپوزيتسيالار زالدا وتىرعان كورەرمەندى بەيجاي قالدىرمايدى. سپەكتاكل تولىق انشلاگپەن ءوتتى. ارتىستەر كورەي حالقىنىڭ دەپورتاتسيالانعان كەزەڭىن كورسەتكەندە, تۇلا بويدى شىمىرلاتقان ەپيزودتار كورەرمەندەردىڭ كوڭىلىندە ۇمىتىلماس اسەر قالدىردى.
كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە سيك, پارلامەنت ءماجىلىسىنىڭ دەپۋتاتى, «قازاقستان كورەيلەرى قاۋىمداستىعى» قامقورلىق كەڭەسى توراعاسىنىڭ ورىنباسارى ر.ۋ.كيم, «قازاقستان كورەيلەرى قاۋىمداستىعىنىڭ» پرەزيدەنتى س.گ.وگاي سياقتى قۇرمەتتى قوناقتاردىڭ ارتىستەردىڭ ونەرىن تاماشالاپ, سپەكتاكل سوڭىندا تولقىعان كوڭىلمەن تىك تۇرىپ ريزاشىلىق ءبىلدىرۋىن تەاتر ۇجىمى ء«وز تاريحى مەن ونەرىنە كورسەتكەن قۇرمەتى» رەتىندە قابىل العانىن ايتادى.
گاسترولدىك ءىسساپار كۇندەرى قاراعاندى وبلىسى كورەيلەرىنىڭ ەتنومادەني بىرلەستىگى ءوزىنىڭ 30 جىلدىق مەرەيتويىن اتاپ ءوتتى, ال بۇل بىرلەستىك پەن تەاتردى 20 جىلدىق دوستىق پەن ىنتىماقتاستىق بايلانىستىرادى. قازاقستان اتتى ۇلكەن ءارى تاتۋ وتباسىندا ءومىر ءسۇرىپ جاتقان كورەي ەتنوسىنىڭ وكىلدەرى ءبىر-بىرىنە شىعارماشىلىق تابىس, ءوسىپ-وركەندەۋ جانە باق-بەرەكە تىلەدى.
الماتى
