ۆيتسە-پرەمەردىڭ نىسانداردى ارالاۋى قالانىڭ ەسكى مەديتسينالىق مەكەمەسى ‒ ورتالىق تەمىر جول اۋرۋحاناسىن ارالاۋدان باستالدى. اۋرۋحانانىڭ كورپۋستارى 60 جىل بۇرىن سالىنعان ءارى قاتتى ەسكىرگەن. وسى ۋاقىتتا اتالعان نىساندا ءبىر رەت تە جوندەۋ جۇمىستارى جۇرگىزىلمەگەن. سونىمەن قاتار مەديتسينالىق مەكەمەدە ەلوردانىڭ حالىق كوپ ورنالاسقان اۋداندارىنىڭ ءبىرى – سارىارقا اۋدانىنىڭ تۇرعىندارىنا قىزمەت كورسەتىلەدى.
قالا اكىمدىگى مەن دەنساۋلىق ساقتاۋ مينيسترلىگى بۇل ماسەلەنى 600 ورىنعا ارنالعان جاڭا مەديتسينالىق كەشەن سالۋ ارقىلى شەشۋدى جوسپارلاپ وتىر. بولاشاق قۇرىلىستىڭ ۋچاسكەسى انىقتالدى. مەملەكەت-جەكەمەنشىك سەرىكتەستىك جوباسىن ىسكە اسىرۋ ءۇشىن تۇركيادان ينۆەستور تارتۋ جوسپارلانۋدا.
ۆيتسە-پرەمەر سونداي-اق قاتەرلى ىسىك اۋرۋلارىن ەمدەۋگە جوعارى مامانداندىرىلعان كومەك كورسەتەتىن كوپبەيىندى مەديتسينالىق ورتالىقتا بولدى. الدىڭعى جىلدارى ونكولوگيالىق ورتالىق «سق-فارماتسيا» ديستريبيۋتەرىنە 1,3 ملرد تەڭگە كولەمىندە قارىز بولىپ قالدى. بۇل جاعدايدى شەشۋ ءۇشىن ارنايى كوميسسيا قۇرىلدى.
پرەمەر-ءمينيستردىڭ ورىنباسارى جاۋاپتى مەملەكەتتىك ورگاندارعا مەديتسينالىق ورتالىقتى ناۋقاستاردى ەمدەۋگە قاجەتتى ءدارى-دارمەكتەرمەن تولىقتاي قامتاماسىز ەتۋدى تاپسىردى.
سونىمەن قاتار بەردىبەك ساپارباەۆ «قازاقستان» سپورت كەشەنىندە جانە «تولقىن» وليمپيادالىق رەزەرۆتەگى مامانداندىرىلعان بالالار-ءجاسوس-
پىرىمدەر مەكتەبىندە بولدى.
«قازاقستان» سپورت كەشەنى 2001 جىلى سالىنعان, بۇگىندە كۇردەلى جوندەۋ جۇمىستارىن جۇرگىزۋ قاجەت. نىساندا مۇز ارەناسى جۇمىس ىستەيدى, بىراق باسسەين اپاتتى جاعدايىنا بايلانىستى جابىق تۇر. جالپى, نىسان تولىق جاڭعىرتۋدى قاجەت ەتەدى. وعان مەملەكەت-جەكەمەنشىك سەرىكتەستىك اياسىندا شەتەلدىك ينۆەستوردى تارتۋ جوسپارلانۋدا. بۇگىندە قاجەتتى راسىمدەر ورىندالىپ جاتىر. كەلەسى جىلى جۇمىستار باستالادى. قۇرىلىستى 2023 جىلى اياقتاۋ جوسپارلانىپ وتىر», دەدى ەلوردا اكىمىنىڭ ورىنباسارى باقتيار ماكەن.
«تولقىن» سپورت مەكتەبىنىڭ شاتىرى كۇردەلى جوندەۋ جۇمىستارىن تالاپ ەتەدى.
«جوبالىق-سمەتالىق قۇجاتتامانى ازىرلەۋگە جەرگىلىكتى بيۋدجەتتەن قاراجات ءبولىندى. كونكۋرستىڭ جەڭىمپازى انىقتالعاننان كەيىن ءبىز جۇمىسقا كىرىسەمىز. جوندەۋ جۇمىستارىن كەلەسى جىلدىڭ قىركۇيەگىنە دەيىن اياقتاۋعا تىرىسامىز», دەپ سەندىردى ب. ماكەن.
جۇمىس ساپارىنىڭ قورىتىندىسى بويىنشا بەردىبەك ساپارباەۆ دەنساۋلىق ساقتاۋ مينيسترلىگى مەن قالا اكىمدىگى الدىنا بىرقاتار مىندەتتەر جۇكتەپ, مەملەكەت باسشىسىنىڭ تاپسىرمالارىن ورىنداۋ ۇكىمەتتىڭ ەرەكشە باقىلاۋىندا ەكەنىن اتاپ ءوتتى.
ايتا كەتۋ كەرەك, مەملەكەت باسشىسى جاقىندا وتكەن ەلوردانى دامىتۋ جونىندەگى كەڭەستە سپورتتىق نىسانداردىڭ قولجەتىمدىلىگىن ارتتىرۋ جانە مەديتسينالىق قىزمەتتەردىڭ ساپاسىن جاقسارتۋ جونىندە بىرقاتار تاپسىرمالار بەرگەن بولاتىن.
