رۋحانيات • 10 قازان، 2019

«ءۇش ارىستىڭ» شىعارمالارى – قىلقالام شەبەرىنىڭ كوزىمەن

153 رەتكورسەتىلدى

قازاقستاننىڭ بارلىق ايماعىندا رەسپۋبليكالىق دەڭگەيدە اتالىپ ءوتىپ جاتقان ساكەن سەيفۋللين، ءىلياس جانسۇگىروۆ جانە بەيىمبەت ءمايليننىڭ 125 جىلدىق مەرەيتويىنا بايلانىستى تولاسسىز ءوتىپ جاتقان شارالار شەرۋى الماتىنىڭ ۇلتتىق كىتاپحاناسىندا ۇيىمداستىرىلعان ايىرىقشا كىتاپتىڭ تۇساۋكەسەرىمەن تولىقتىرىلدى. ءبىر جىلى دۇنيەگە كەلىپ، ءبىر جىلدا رەپرەسسيا قۇربانى بولسا دا، قازاق ادەبيەتىنە تەڭدەسسىز ۇلەس قوسىپ كەتكەن ءۇش بايتەرەكتى ەسكە الىپ، تاعزىم پارىزىن ورىنداۋدا حالىقارالىق تۇركسوي ۇيىمى ەرەكشە تارتۋ جاسادى. ء«ۇش ارىس» اتتى كىتاپتىڭ تۇساۋكەسەرىنە حالىق جازۋشىسى، مەملەكەت جانە قوعام قايراتكەرى ولجاس سۇلەيمەنوۆ، اقىننىڭ ۇلى سايات جانسۇگىروۆ جانە ونىڭ وزگە دە ۇرپاقتارى، زيالى قاۋىم وكىلدەرى قاتىستى. كەشتى حالىقارالىق ۇيىمنىڭ الماتىداعى وكىلى اسقار تۇرعانباەۆ جۇرگىزدى.

مودەراتوردىڭ ايتۋىنشا، كەڭەستىك كەزەڭدە قالامگەردىڭ بەلگىلى ءبىر شىعارماسىن قىلقالامدى سەرىك ەتكەن سۋرەتشىنىڭ كوزقاراسىمەن بايانداپ شىعاتىن ءداستۇر بولعان. قالامگەر مەن سۋرەتشىنىڭ رۋحاني تاندەمىنەن تۋعان بۇل ءداستۇر كەيىن مۇلدەم ءۇزىلىپ قالدى. ء«ۇش ارىس» كىتابى وسى ءداستۇردى قايتا جالعاپ، وتكەن عاسىرداعى جانە قازىرگى كەزەڭدەگى بەلگىلى وتاندىق سۋرەتشىلەردىڭ ناۋبەت قۇربانى بولعان ساكەن، ءىلياس، بەيىمبەتتىڭ شىعارمالارىن وقي وتىرىپ سالعان تۋىندىلارىن وسى كىتاپ-البومعا جيناقتاعان. جوبانىڭ ەرەكشەلىگى – ادەبي تۋىندىنى قىلقالام شەبەرىنىڭ كوزىمەن تانۋ، كورنەكتى جازۋشىنىڭ ادەبي شىعارمالارىن كوركەمسۋرەت، كەسكىندەمە ونەرى ارقىلى پاش ەتۋ. وسى جوبا نەگىزىندە وقىرمان قولىنا ءتيىپ وتىرعان جاڭا جيناق باسپا ءىسىنىڭ سوڭعى تەحنولوگياسى نەگىزىندە ساپالى دايىندالۋىمەن كوز تارتادى. ساكەن مەن ءىلياس ولەڭدەرىنىڭ، بي-اعانىڭ ەسكىرمەيتىن، ومىرشەڭ اڭگىمەلەرىنىڭ جەلىسىمەن سالىنعان سۋرەتتەردىڭ ماڭىزى مەن مازمۇنىنىڭ ارالۋاندىعى ارنايى ءسوز ەتۋگە تۇراتىن جەكە تاقىرىپ بولۋعا لايىق. ءابىلحان قاستەەۆ، ۇكى اجيەۆ، ساليحيتدين ايتباەۆ، قۇرمانعازى اقاشەۆ، اۋباكىر يسمايىلوۆ، سەرگەي كالمىكوۆ، قانافيا تەلجانوۆ، امەن قايداروۆ، ماعاۋيا امانجولوۆ، كامىل شاياحمەتوۆ، جاڭاتاي شاردەنوۆ، نيكولاي حلۋدوۆ، ورال تاڭسىقباەۆ، نۇربەك تاڭسىقباەۆ، عالي مىرزاشەۆ، جەڭىس كاكەن ۇلى، تاعى باسقا بەلگىلى سۋرەتشىلەردىڭ تۋىندىلارى قالامگەر شىعارمالارىنىڭ مازمۇنىن تولىقتىرا تۇسكەن.

كىتاپ-البوم حالىقارالىق تۇركسوي ۇيىمىنىڭ تاپسىرىسىمەن «Central Asia Production» كومپانياسى تاراپىنان قازاق جانە ورىس تىلدەرىندە گەرمانيادا باسىلدى. نەمىس ەلىندە وتكەن باسپا ونىمدەرى اراسىنداعى بايقاۋدا ءبىرىنشى ورىندى يەلەنگەن وسى كومپانيانىڭ ديرەكتورى بەرىك بارىسبەكوۆ كىتاپتى جارىققا شىعارۋ جۇمىسى تۋرالى بايانداپ بەردى. مۇراعاتتاردى ىزدەۋ، ارحيۆ، مۋزەي ماتەريالدارىن سارالاۋ، تاريحي كوركەمسۋرەتتەردى جاڭعىرتۋ جانە اۋدارما جۇمىستارىن اتالعان كومپانيا ىسكە اسىرعان. شارا اياسىندا ۇلتتىق كىتاپحانانىڭ قورىنان ءىلياس جانسۇگىروۆتىڭ تۇتاس ءومىر جولىمەن تانىستىراتىن «حالىق ءومىرىنىڭ قاھارمان جىرشىسى» اتتى كىتاپ كورمەسى ۇيىمداستىرىلدى.

 

الماتى

 

سوڭعى جاڭالىقتار

انا ءتىلى – ارىڭ بۇل...

رۋحانيات • كەشە

اباي مۇراسى ماڭگىلىك

اباي • 22 اقپان، 2020

قىلمىستىق ءىس قوزعالدى

ايماقتار • 22 اقپان، 2020

ماڭعىستاۋدا «ANTIKOR ORTALYGY» اشىلدى

رۋحانيات • 22 اقپان، 2020

تەننيس: ەلەنا رىباكينا فينالدا

تەننيس • 22 اقپان، 2020

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار