«تۇلعا» سىيلىعىن تاپسىرۋعا ارنالعان سالتاناتتى قاۋىشۋ الۋان ءتۇرلى ءىس-شارانى قامتىعانىن ايتا كەتكەن ءجون. جان-جاقتان كەلگەن قۇرمەتتى قوناقتار قالا تورىندەگى ساكەن سەيفۋللين, قانىش ساتباەۆ جانە كەتبۇقا بي ەسكەرتكىشتەرىنە تاعزىم ەتىپ, گۇلشوقتارىن قويدى.
ەستە قالار كەزدەسۋدىڭ ءبىرى جەرگىلىكتى №8 مەكتەپ-گيمنازياسىندا بولدى. سارا ابدىكەروۆا سىندى بىلىكتى باسشى جەتەكشىلىك ەتەتىن ءبىلىم ۇياسىنىڭ ۇجىمى بۇل شاراعا تىڭعىلىقتى دايىندىقپەن كەلىپتى. «Egemen Qazaqstan» گازەتىنىڭ تاريحىنا تەرەڭ ۇڭىلگەن وقۋشىلار كورمە ۇيىمداستىرىپ, تەاترلاندىرىلعان قويىلىمدار كورسەتتى. ارنايى ۇيىمداستىرىلعان دوڭگەلەك ۇستەل شاراسىندا باسىلىمنىڭ قازىرگى تىنىس-تىرشىلىگىنە بايلانىستى سۇراقتار قويىپ, ولارعا گازەت باسشىلىعى تاراپىنان تولىققاندى جاۋاپتار الدى. كەزدەسۋ بارىسىندا مەكتەپتە وتكەن «ەگەمەن قازاقستان» تاريحى – ەل تاريحى» اتتى اپتالىقتىڭ قورىتىندىسى شىعارىلدى. اتاپ ايتقاندا, «عاسىرلىق تاريحى بار «ەگەمەن» تاريحى» عىلىمي پراكتيكالىق كونفەرەنتسياسىندا جەڭىمپاز اتانعان 11-سىنىپ وقۋشىسى ديلناز سابيتوۆا, «ەگەمەن ەل شەجىرەسى» («ەگەمەن قازاقستانعا» – 100 جىل) ەسسە بايقاۋىندا توپ جارعان 9-سىنىپ وقۋشىسى اقنۇر ناقاي, «دەنى ساۋ ۇرپاق – ەگەمەن ەلدىڭ بولاشاعى» سايىسىندا توعىزقۇمالاقتان ۇزدىك شىققان 10-سىنىپ وقۋشىسى نۇرايلىم بايزاكەش, «جىر ارقاۋى – «ەگەمەن قازاقستان» ءمۇشايراسىنىڭ جەڭىمپازى 11-سىنىپ وقۋشىسى ارۋجان ساۋلەن, «ەگەمەن قازاقستان» – ورلەۋدىڭ ەڭسەلى جولى» اتتى ادەبي-مۋزىكالىق كومپوزيتسيانى قويۋشى قازاق ءتىلى مەن ادەبيەتى ءپانىنىڭ مۇعالىمى باعلان دوسجانوۆا ارنايى سىيلىقتارمەن ماراپاتتالدى.
ودان ءارى شاراعا قاتىسۋشىلار جەزقازعانداعى تاريحي-ارحەولوگيالىق مۋزەيدە بولىپ, «ەگەمەن قازاقستان» گازەتىنە – 100 جىل» اتتى كورمەمەن تانىسىپ, مىستى ولكە مەن قاسيەتتى ۇلىتاۋ وڭىرىنە قاتىستى قۇندى جادىگەرلەردى تاماشالادى. «حالىقتار دوستىعى مەن مادەنيەتى» ۇيىنە ات باسىن تىرەگەن قوناقتارعا كورسەتىلگەن قۇرمەت پەن قوشەمەتتىڭ سالتاناتى دا ايرىقشا كەلىستى بولدى. بەكزات قومار ۇلىنىڭ قولعا الۋىمەن جەزقازعاندا العاشقى رەت تاعايىندالىپ وتىرعان «تۇلعا» سىيلىعى ءار سالا بويىنشا ۇسىنىلعان ۇمىتكەرلەردىڭ ىشىنەن ەڭ تاڭداۋلى دەگەن ۇزدىكتەرىنە بەرىلدى.
سالتاناتتى ءساتتىڭ بەتاشارى ەڭ اۋەلى نوميناتسيالىق اتاۋلىق سىيلىقتاردى تاپسىرۋدان باستالدى. ەل ومىرىندەگى بيىلعى جىلعى رۋحاني جاڭالىقتىڭ ەلەۋلىسى قازاق ءباسپاسوزىنىڭ قاراشاڭىراعى «ەگەمەن قازاقستانعا» 100 جىل تولعالى وتىر. گازەت تويىمەن 125 جىلدىق مەرەيتويى تۇسپا-تۇس كەلگەن, «ەڭبەكشى قازاق» كەزىندە وسى باسىلىمنىڭ جاۋاپتى رەداكتورى بولعان ساكەن سەيفۋللين اتىنداعى اتاۋلى سىيلىق «ەگەمەن قازاقستاننىڭ» قاراعاندى وبلىسى بويىنشا مەنشىكتى ءتىلشىسى, جۋرناليست قايرات ابىلداعا تاپسىرىلدى. وسى باسىلىمنىڭ جامبىل وبلىسىنداعى ءتىلشىسى, جۋرناليست, اقىن حاميت ەسامان الاش كوسەمى ءاليحان بوكەيحانوۆ اتىنداعى اتاۋلى سىيلىققا يە بولدى.
سونىمەن قاتار ءبىلىم بەرۋ ءىسىنىڭ ۇزدىگى شابال بەيسەنبەكوۆا اتىنداعى اتاۋلى سىيلىقپەن №8 مەكتەپ-گيمنازياسىنىڭ ديرەكتورى سارا ابدىكەروۆا, قازاقستاننىڭ ءبىلىم بەرۋ ءىسىنىڭ ۇزدىگى, جەزقازعان قالاسىنىڭ قۇرمەتتى ازاماتى ءنۇريا جۇماجانوۆا اتىنداعى سىيلىقپەن №1 جالپى ورتا ءبىلىم بەرەتىن مەكتەپتىڭ ديرەكتورى ءابدىراحمان دوسانوۆ ماراپاتتالدى.
قازاق تەاتر ونەرىندە قايتالانباس قولتاڭباسىن قالدىرعان تالانتتى رەجيسسەر, قازاقستاننىڭ ەڭبەك سىڭىرگەن قايراتكەرى, «تارلان» سىيلىعىنىڭ لاۋرەاتى جانات حادجيەۆ اتىنداعى سىيلىقتى س.قوجامقۇلوۆ اتىنداعى جەزقازعان قازاق مۋزىكالىق-دراما تەاترىنىڭ تالانتتى اكتەرى كەنجەتاي ءابىلدين السا, قازاقستاننىڭ حالىق ءارتىسى دوسجان جانبوتاەۆ اتىنداعى سىيلىققا «كەيكى مەرگەن» سەريالىندا كەيكىنىڭ ءرولىن سومداعان جاس تالانت, ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ اكتەرى دارحان سۇلەيمەنوۆ لايىقتى دەپ تانىلدى. م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بەلدى اكتەرى كەڭەس نۇرلانوۆ اتىنداعى سىيلىق ق.قۋانىشباەۆ اتىنداعى مەملەكەتتىك اكادەميالىق مۋزىكالىق-دراما تەاترىنىڭ اكتەرى, قازاقستاننىڭ ەڭبەك سىڭىرگەن قايراتكەرى بورانباي مولداباەۆقا تابىس ەتىلدى. كەزىندە س.قوجامقۇلوۆ اتىنداعى تەاتردا قودار سياقتى كۇردەلى وبرازداردى سومداپ, قازىر قوستاناي دراما تەاترىنىڭ تارلان اكتەرىنە اينالعان قونىسپەك بەگايداروۆ اتىنداعى سىيلىققا قوستاناي تەاترىنىڭ تالانتتى ونەرپازى ولجاس بەگايدار يە بولدى.
تەاتر ونەرى تارلاندارىنىڭ ءبىرى سەرىك بۇلعاقباەۆ اتىنداعى اتاۋلى سىيلىق س.قوجامقۇلوۆ اتىنداعى تەاتردىڭ جاس تالانتى نۇرجان بەيىسبەكوۆكە بۇيىردى. ونەر مايتالمانى, «قۇرمەت» وردەنىنىڭ يەگەرى رايحان يبراەۆا اتىنداعى سىيلىق تالانتتى اكتريسا زىليحا ابدىراسىلوۆاعا تابىس ەتىلدى.
كەلەسى ءبىر ايتۋلى ماراپاتتىڭ ءجونى بولەك دەسە بولعانداي. ونەردىڭ تارلان تۇلعاسى, قازاقستاننىڭ ەڭبەك سىڭىرگەن قايراتكەرى, حالىقارالىق «تۇلپار» فەستيۆالىنىڭ لاۋرەاتى قايرات كەمالوۆ اتىنداعى اتاۋلى سىيلىقتى مەتسەنات بيىل العاش رەت بەلگىلەپ وتىر. بۇل سىيلىققا ج.حادجيەۆ اتىنداعى حالىقارالىق فەستيۆالدىڭ لاۋرەاتى, س.سەيفۋللين اتىنداعى قازاق دراما تەاترىنىڭ جاس اكتەرى قۋانىش جاعىپاروۆ لايىقتى دەپ تانىلدى. لايىقتى ماراپاتىن ونەردەگى ءىزباسارىنا قايرات كەمال ۇلى ءوز قولىمەن تاپسىردى.
سالتاناتتى شارا ودان ءارى «تۇلعا» سىيلىعىنىڭ يەگەرلەرىن ۇلىقتاۋعا ۇلاستى. مەملەكەتتىك ساياسات پەن ۇلتتىق مۇددەنى ۇشتاستىرا وتىرىپ, حالقىمىزدى رۋحانيات نارىمەن سۋسىنداتۋدا بۇقارالىق اقپارات قۇرالدارىنىڭ ايتارلىقتاي ماڭىزى بار ەكەندىگىنە داۋ جوق. ۇلت الدىنداعى ۇلكەن جاۋاپكەرشىلىك جۇگىن مۇلتىكسىز كوتەرىپ كەلە جاتقان, عاسىرلىق تاريحى بار ەل گازەتى «ەگەمەن قازاقستان» باسىلىمى «تۇلعا» سىيلىعىنا لايىقتى دەپ تانىلۋى كوپشىلىكتىڭ كوڭىلىنەن شىقتى. وسىعان وراي سالتاناتتى شاراعا قاتىسىپ وتىرعان «ەگەمەن قازاقستان» رەسپۋبليكالىق گازەتى» اق باسقارما توراعاسىنىڭ ورىنباسارى ەربولات قامەن ساحنا تورىنە شاقىرىلدى. مارتەبەلى سىيلىقتى «قۇرمەت» وردەنىنىڭ يەگەرى, قاراعاندى وبلىسىنىڭ قۇرمەتتى ازاماتى مۇزاراف احان ۇلىنىڭ قولىنان الدى.
سونداي-اق «تۇلعا» سىيلىعى ءبىلىم بەرۋ ءىسىنىڭ ۇزدىگى, «ەرەن ەڭبەگى ءۇشىن» مەدالىنىڭ جانە «قۇرمەت» وردەنىنىڭ يەگەرى, ساتباەۆ قالاسىنىڭ قۇرمەتتى ازاماتى شابال بەيسەنبەكوۆا لايىقتى دەپ تانىلدى. ارداگەر ۇستازعا مارتەبەلى سىيلىعىن قالا اكىمىنىڭ ورىنباسارى زينا اقىلبەكوۆا تابىستاعان سوڭ, يگى باستاماعا ۇيىتقى بولا بىلگەن بەكزات التىنبەكوۆكە العىس لەبىزىن جەتكىزىپ, بۇل «رۋحاني جاڭعىرۋ» باعدارلاماسى اياسىنداعى ايتارلىقتاي شارا بولعانىنا توقتالدى. «تۇلعا» سىيلىعىنىڭ كەلەسى يەگەرى قازاقستاننىڭ ەڭبەك سىڭىرگەن قايراتكەرى, قازاقستاننىڭ حالىق ءارتىسى, بيىل 70 جاستىڭ جەلكەنىن كەرگەن دوسجان جابوتاەۆ بولدى.
ساحنا تورىنە كوتەرىلگەن قاراعاندى وبلىستىق ءماسليحاتىنىڭ دەپۋتاتى, وبلىستىق «قوعامدىق كەلىسىم» كەڭەسىنىڭ توراعاسى, Nur Otan پارتياسى ساياسي كەڭەسىنىڭ مۇشەسى بەكزات التىنبەكوۆ قازاق ءان ونەرىنە ەرەكشە ەڭبەك ءسىڭىرىپ جۇرگەن ءانشى, كومپوزيتور, اقىن, قازاقستاننىڭ ەڭبەك سىڭىرگەن قايراتكەرى ەلەنا ابدىحالىقوۆاعا 400 مىڭ تەڭگەلىك «ونەر گرانتىن» تاپسىرۋمەن تارلانداردى تاڭداپ, ۇلىقتاۋ ءراسىمى مارەسىنە جەتتى. ەلەنا ءانشى «جەز دالامدى اڭسايمىن» انىنەن باستاپ بىرنەشە ءوز تۋىندىلارىن ورىنداپ, كوپشىلىكتىڭ ىقىلاسىنا بولەندى.
سالتاناتتى وقيعاعا كۋا بولعان قاۋىم 15 جىلدان بەرى قايىرىمدىلىق ىستەرىمەن اينالىسىپ كەلە جاتقان مەتسەنات بەكزات التىنبەكوۆكە ء«بىر قالانىڭ, ءبىر اۋداننىڭ شارۋاسىن ءبىر ءوزى اتقاردى» دەگەن باعا بەرىپ, ريزاشىلىق سەزىمىن ءبىلدىردى.
اماندىق راح ۇلى,
قازاقستاننىڭ قۇرمەتتى ءجۋرناليسى
قاراعاندى وبلىسى,
جەزقازعان قالاسى
