ساياسات • 09 قازان، 2019

قازاقستان مەن رەسەي ءسىم باسشىلارى شاعىن جانە كەڭەيتىلگەن قۇرامدا كەلىسسوزدەر جۇرگىزدى

34 رەتكورسەتىلدى

رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ قازاقستان رەسپۋبليكاسىنا رەسمي ساپارمەن كەلدى. بۇل تۋرالى ءسىم ءباسپاسوز قىزمەتى حابارلادى.

ساپار اياسىندا قازاقستان مەن رەسەي سىرتقى ساياسي ۆەدومستۆولارىنىڭ باسشىلارى شاعىن جانە كەڭەيتىلگەن قۇرامدا كەلىسسوزدەر جۇرگىزدى. تاراپتار ساياسي، ەكونوميكالىق سالالارداعى، ترانزيت-كولىكتىك، ەنەرگەتيكالىق، اسكەري-تەحنيكالىق سالالارداعى قازاقستان-رەسەي ىنتىماقتاستىعىنىڭ اعىمداعى جاي-كۇيى مەن دامۋ پەرسپەكتيۆالارىن، تمد، ەاەو، ۇقشۇ، شىۇ جانە اوسشك سياقتى حالىقارالىق ۇيىمدار مەن وڭىرلىك ينتەگراتسيالىق بىرلەستىكتەر شەڭبەرىندەگى ءوزارا ءىس-قيمىلدى تالقىلادى.

وڭىرلىك جانە حالىقارالىق كۇن ءتارتىبىنىڭ وزەكتى اسپەكتىلەرى، ونىڭ ىشىندە جاھاندىق جانە وڭىرلىك قاۋىپسىزدىكتى قامتاماسىز ەتۋ، سيريا بويىنشا كەلىسسوزدەر پروتسەسى، اۋعانستانداعى جاعداي جانە ت.ب. ماسەلەلەر بويىنشا پىكىر الماسىلدى.

بۇدان باسقا، اعىمداعى جىلدىڭ سوڭىنا دەيىن جوسپارلانعان جوعارى دەڭگەيدەگى ەكىجاقتى جانە كوپجاقتى ءىس-شارالاردى دايىنداۋ ماسەلەلەرىنە، ونىڭ ىشىندە ومبى قالاسىنداعى قازاقستان مەن رەسەيدىڭ الداعى XVI ايماقارالىق ىنتىماقتاستىق فورۋمى، بىشكەك قالاسىنداعى ۇقشۇ ۇجىمدىق قاۋىپسىزدىك كەڭەسى جانە ت.ب. ءىس-شارالارعا ەرەكشە نازار اۋدارىلدى.

قازاقستان رەسەيمەن ءوزارا ءىس-قيمىلدى ءداستۇرلى تۇردە قازاقستاننىڭ سىرتقى ساياساتىنىڭ نەگىزگى باسىمدىقتارىنىڭ ءبىرى رەتىندە قاراستىرادى. سىرتقى ىستەر ءمينيسترى م. تىلەۋبەردىنىڭ ايتۋىنشا: «بۇل ساپار ەكى ەلدىڭ سىرتقى ساياسي ۆەدومستۆولارىنىڭ ساۋدا-ەكونوميكالىق جانە مادەني-گۋمانيتارلىق قاتىناستاردى ودان ءارى نىعايتۋ جانە كەڭەيتۋ جونىندەگى قاجىرلى جۇمىسىنىڭ جەمىسىن كورۋگە مۇمكىندىك بەردى».

كەزدەسۋ سوڭىندا تاراپتار ەلدەرىمىز اراسىنداعى ستراتەگيالىق جانە وداقتاستىق ارىپتەستىكتى ودان ءارى نىعايتۋ مەن كەڭەيتۋگە بەيىلدىلىگىن راستادى.

رەسەي ءسىم باسشىسىن نۇر-سۇلتانعا جاساعان ساپارى بارىسىندا قازاقستان رەسپۋبليكاسىنىڭ پرەزيدەنتى ك. توقاەۆ قابىلدادى. كەزدەسۋدە ەكى ەلدىڭ سىرتقى ساياسي ۆەدومستۆولارىنىڭ باسشىلارى مەملەكەت باسشىسىن وتكىزىلگەن كەلىسسوزدەردىڭ ناتيجەلەرى جانە قازاقستان-رەسەي قارىم-قاتىناستارىن تەرەڭدەتۋ جونىندەگى ودان ءارى جۇرگىزىلەتىن جۇمىس تۋرالى حاباردار ەتتى.

سوڭعى جاڭالىقتار

ۇقساس جاڭالىقتار