پارلامەنت • 09 قازان، 2019

داريعا نازارباەۆا باتىس قازاقستان وبلىسىنا جۇمىس ساپارىمەن باردى

44 رەتكورسەتىلدى

سەنات توراعاسى داريعا نازارباەۆا باتىس قازاقستان وبلىسىنا جۇمىس ساپارى بارىسىندا «زەنيت» كەمە جاساۋ زاۋىتىنىڭ جۇمىسىمەن تانىستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

زاۋىت باسشىلىعىمەن جانە ەڭبەككەرلەرمەن اڭگىمە كەزىندە سەنات باسشىسى قورعانىس سالاسىنىڭ مۇددەسىنە جۇمىس ىستەيتىن كاسىپورىندى دامىتۋعا قاجەتتى نورماتيۆتىك-قۇقىقتىق بازا جاسالعانىن، ەلىمىزدە جىل باسىندا «قورعانىس ونەركاسىبى جانە مەملەكەتتىك قورعانىستىق تاپسىرىس تۋرالى» جاڭا زاڭ قابىلدانعانىن اتاپ ءوتتى.

«ۇكىمەت قورعانىس ماقساتىنداعى ءونىم شىعاراتىن وتاندىق كاسىپورىنداردى قولداۋ بويىنشا جۇيەلى جۇمىس جۇرگىزۋى كەرەك. بىزگە ءوز ونەركاسىبىمىزدى دامىتۋ جانە تاپسىرىستاردى ءبىرىنشى كەزەكتە قازاقستاندىق كاسىپورىندارعا بەرۋ ماڭىزدى»، دەپ اتاپ ءوتتى د.نازارباەۆا.

داريعا نازارباەۆا سول كۇنى ورالداعى ۇلتتىق مادەني ورتالىقتاردىڭ باسشىلارىمەن، باتىس قازاقستان وبلىسىنداعى جاستار مەن ەرىكتىلەر ۇيىمدارىنىڭ وكىلدەرىمەن كەزدەستى. داريعا نازارباەۆانىڭ ايتۋىنشا، قازاقستان حالقى اسسامبلەياسى ەلىمىزدەگى ۇلتارالىق تاتۋلىق پەن كەلىسىمدى نىعايتۋداعى ىقپالدى قوعامدىق كۇش بولىپ تابىلادى.

«جىلى شىرايلى كەزدەسۋلەر مەن ىزگىلىكتى سوزدەرىڭىز ءۇشىن سىزدەرگە العىس ايتامىن. سىزدەردىڭ ناقتى ىستەرگە نيەتتەنگەن وڭ كوزقاراستارىڭىز كوڭىلگە قۋانىش ۇيالاتادى. بۇگىندە قازاقستان حالقى اسسامبلەياسى ۇلتتىق مادەني ورتالىقتاردىڭ جۇمىسىنا جاستاردى بەلسەندى تۇردە تارتىپ، جاڭا كوشباسشىلاردى ءوسىرۋى ءتيىس. ءار ۇلت جاستارىنىڭ مانسابى مەن كاسىبي تۇرعىدا ءوسۋى ءۇشىن تەڭ مۇمكىندىكتەر جاسالۋى ءتيىس. جاستار ەلدەن كوشىپ كەتپەۋى ءۇشىن الەۋمەتتىك ليفتىلەردىڭ اشىق جۇيەسى كەرەك»، دەپ اتاپ ءوتتى سەنات توراعاسى.

سەنات باسشىسى ايماقتاعى بۇقارالىق اقپارات قۇرالدارىنىڭ وكىلدەرىمەن جۇزدەسۋدە اقپارات قۇرالدارى قازىرگى الەمدە تاپ بولىپ وتىرعان جاڭا قاۋىپ-قاتەرلەر تۋرالى ايتتى. داريعا نازارباەۆانىڭ ايتۋىنشا، ءداستۇرلى بۇقارالىق اقپارات قۇرالدارى – تەلەديدار، راديو، گازەت – حالىقتىڭ 70 پايىزى ءۇشىن بۇرىنعىشا اقپاراتتىڭ نەگىزگى كوزى ەكەنىن ستاتيستيكا دەرەكتەرى كورسەتىپ وتىر. سونىمەن بىرگە عالامتور مەن ءموبيلدى قۇرىلعىلار ارقىلى مەديانى تۇتىنۋ ۇلعايىپ بارادى. بۇل ۇدەرىستەر سارالانىپ، بۇقارالىق اقپارات قۇرالدارى سالاسىن دامىتۋ جونىندەگى مەملەكەتتىك ستراتەگيادا بەلگىلەنۋى ءتيىس. سەنات باسشىسى باتىس قازاقستان وبلىسىنداعى بۇقارالىق اقپارات قۇرالدارىنىڭ وكىلدەرىن وسى قۇجاتتى دايىنداۋعا جانە اقپارات قۇرالدارى تۋرالى زاڭناماعا تۇزەتۋلەر ازىرلەۋگە بەلسەندى قاتىسۋعا شاقىردى.

سوڭعى جاڭالىقتار

ۇقساس جاڭالىقتار