الەم • 09 قازان، 2019

سوورونباي جەەنبەكوۆ تۇركى اكادەمياسىنىڭ پرەزيدەنتىمەن كەزدەستى

145 رەتكورسەتىلدى

قىرعىزستان پرەزيدەنتى سوورونباي جەەنبەكوۆ تۇركى اكادەمياسىنىڭ پرەزيدەنتى دارحان قىدىرالىمەن كەزدەستى. بۇل تۋرالى قىرعىز رەسپۋبليكاسى پرەزيدەنتىنىڭ ءباسپاسوز قىزمەتى حابارلادى.

كەزدەسۋ بارىسىندا قىرعىزستان پرەزيدەنتى 2018 جىلى شىڭعىس ايتماتوۆتىڭ 90 جىلدىعىنا ارنالعان ءىس-شارالاردى وتكىزۋگە كومەك كورسەتكەنى ءۇشىن جانە «ماناس» ەپوسىن كەڭىنەن ناسيحاتتاعانى ءۇشىن تۇركى اكادەمياسىنا العىسىن ءبىلدىردى.

سوورونباي جەەنبەكوۆ اكادەميانىڭ تۇركى تاريحىنا، مادەنيەتى مەن تۇركى حالقىنىڭ ۇلى تۇلعالارىنا ارناپ وتكىزگەن حالىقارالىق كونفەرەنتسيالارى مەن فورۋمدارىن اتاپ ءوتتى. ونىڭ ايتۋىنشا، مادەني-گۋمانيتارلىق ىنتىماقتاستىق ماسەلەلەرى ەلدەر اراسىنداعى ەكىجاقتى قاتىناستاردى دامىتۋدا ۇلكەن ءرول اتقارادى.

سونداي-اق پرەزيدەنت سوورونباي جەەنبەكوۆ قىرعىز رەسپۋبليكاسىندا قاراشا ايىندا وتەتىن ءجۇسىپ بالاساعۇننىڭ «قۇتتى بىلىك» كىتابىنىڭ 950 جىلدىعىنا ارنالعان حالىقارالىق كونفەرەنتسيا جوعارى دەڭگەيدە وتەتىنىنە سەنىم ءبىلدىردى.

بۇدان سوڭ، تۇركى اكادەمياسىنىڭ پرەزيدەنتى دارحان قىدىرالى قىرعىز رەسپۋبليكاسىنىڭ پرەزيدەنتىنە اكادەميانىڭ قازىرگى قىزمەتى مەن الداعى جوسپارلارى تۋرالى ءسوز ەتتى. سونداي-اق ول قازاقستان-قىرعىزستان حالىقتارىن بىرىكتىرەتىن تۇركى تاريحى مەن مادەنيەتىن ودان ءارى ناسيحاتتاۋ ماقساتىندا قىرعىزستاننىڭ ءبىلىم بەرۋ جانە عىلىمي ۇيىمدارىمەن ىنتىماقتاستىقتى كەڭەيتۋگە دايىن ەكەندىگىن ايتتى.

سوڭعى جاڭالىقتار

ۇقساس جاڭالىقتار