ەكىنشى شۆەيتساريا سانالاتىن بۋراباي كۋرورتتى ايماعىنىڭ تابيعاتى ادام بالاسىن ەجەلدەن وزىنە باۋراپ الاتىنىن بەلگىلى جايت. سوندىقتان بولار, وسى وڭىردە تابيعاتقا بايلانىستى كوپتەگەن ۇلكەندى-كىشىلى ءىس-شارالار ۇيىمداستىرىلىپ تۇرادى. سونىڭ ءبىرى – جوعارىدا اتالعان تۋريستىك-ەكسپەديتسيالىق جاساقتاردىڭ رەسپۋبليكالىق سلەتى.
قايتالانباس كوركەم تابيعاتى ەرتەگىدەي ەلىكتىرەر بۋراباي باۋرايىنا ەل تاريحىنا سۋساۋلى, بىلمەككە قۇمار جالىندى جاستار كوپتەپ جينالدى. نۇر-سۇلتان, الماتى, شىمكەنت, وزگە دە قالالاردان قۇرامىندا 160-قا جۋىق 17 كوماندا ءبىلىم تارازىسىنا بىلىكتەرىن سالىپ, ءوز بويلارىنداعى تانىم كوكجيەگىن كەڭەيتە ءتۇستى. جاستار تۋريستىك داعدىلاردى مەڭگەرۋگە, تۋعان جەر تاريحى, مادەني جانە رۋحاني مۇرانى قادىرلەي بىلۋگە, سالاماتتى ءومىر سالتىن ۇستانۋعا باۋلىندى. ءسوز اراسىندا تۋريستىك سلەت بالالاردىڭ تۋريزم باعىتىنداعى قابىلەت-قارىمىن ۇشتاۋعا عانا ەمەس, كەيبىر كەزدە ويدا جوقتا ورالا كەتەر قىسىلتاياڭ شاقتاردان قالاي شىعۋ كەرەكتىگىن دە ۇيرەندى.
الاشتىڭ جاقسىسى مەن جايساڭىنىڭ ءىزى قالعان بۋراباي ولكەسىندەگى قاسيەتى, قۇتى مول تابيعات اياسىندا شاتىرلارىن تىگىپ, ارقيلى سايىستار ۇيىمداستىردى. كوماندالىق كونكۋرستىڭ بەتاشار كەزەڭى تاقىرىپتى اشۋ تەرەڭدىگى, ورىنداۋ ساپاسى, ۇيلەسىمدىلىگى, ءسوز سويلەي ءبىلۋ مادەنيەتى بويىنشا باعالاندى. ولكەتانۋ بلوگى ەكى كەزەڭنەن تۇردى. العاشقى كەزەڭدە «تۋعان ولكە سوقپاقتارى» اتالىمى بويىنشا زەرتتەۋ جۇمىستارىنىڭ جوبالارى ۇسىنىلدى. بالالار ەكسپەديتسيانىڭ قورىتىندىلارى بويىنشا وزدەرىنىڭ ويلارىنا تۇيگەندەرىن ورنىقتى, ورالىمدى تىلمەن بايانداپ, باعىت كارتاسىن, ولكەتانۋ وبەكتىلەرىن, ولاردىڭ ءمان-ماڭىزىن, باعىتتىڭ ەرەكشەلىكتەرىن كورسەتتى.
تاجىريبەلىك ءبولىم ابىلاي حان الاڭىندا ءوتتى. قاتىسۋشىلار جەر ءجانناتى – بۋرابايدىڭ تامىلجىعان تىلسىم تابيعاتى, بۇل ايماقتاعى كيەلى ورىندار, ەل اۋزىندا ساقتالعان ماڭىزدى اڭىزدارعا قاتىستى بەرىلگەن تاپسىرمالاردى ورىندادى. جاس تولقىن ەكولوگيالىق ەكسپەديتسيا تۋرالى دا ەسەپ بەرىپ, ءوز ماتەريالدارىن پايدالانا وتىرىپ, پىكىر تۇيىندەدى.
كوماندا مۇشەلەرى ءارتۇرلى كەدەرگىلەردەن ءوتىپ, قاشىقتىقتى يگەرۋ تاكتيكاسىن تاڭدادى. شاتىرلى لاگەر قاتاركول ايدىنىنىڭ جاعاسىندا ورىن تەپتى. شىنىن ايتۋ كەرەك, بۇل ولكەنىڭ كۇزى سالقىن, ءتۇن دە دەنەڭدى تىتىركەندىرەردەي سۋىق, جەلدى بولدى. بىراق تابيعاتتىڭ بۇل سىنى جاس تولقىندى جاۋراتا العان جوق. سوڭعى كۇنى بۋراباي ورمان شارۋاشىلىعىنىڭ قىزمەتكەرلەرىمەن بىرىگە «بىرگە – تازا قازاقستان!» اكتسياسىنا قاتىستى. جاستىق جالىننىڭ جادىراعان جيىنى ششۋچە قالاسىنداعى مادەنيەت ۇيىندە قورىتىندىلاندى. جالپىكوماندالىق ەسەپتە باتىس قازاقستان وبلىسىنىڭ وكىلدەرى جەڭىمپاز دەپ تانىلدى. ەكىنشى ورىن اقمولالىقتارعا, ءۇشىنشى ورىن پاۆلودار وبلىسىنا ءتيدى.
اقمولا وبلىسى,
بۋراباي اۋدانى
