د.نازارباەۆا جۇمىس ساپارى بارىسىندا وبلىستىق ءماسليحات دەپۋتاتتارىمەن كەزدەستى. سەنات باسشىسى دەپۋتاتتاردى ءماسليحاتتاردىڭ قۇرىلعانىنا 25 جىل تولۋىمەن قۇتتىقتادى. د.نازارباەۆانىڭ ايتۋىنشا, وكىلدى ورگاندار جەرگىلىكتى مەملەكەتتىك باسقارۋ جۇيەسىندە اسا ماڭىزدى ءرول اتقارادى.
سەناتتا ايماقتارمەن ىنتىماقتاستىقتى ارتتىرۋعا ارنالعان جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەس جۇمىس ىستەيدى. سەنات ءماسليحاتتاردىڭ ءرولىن ودان ءارى نىعايتۋ جانە ءماسليحات حاتشىسىنىڭ مارتەبەسىن ارتتىرۋ, سونداي-اق بوساتىلعان نەگىزدە قىزمەت اتقاراتىن دەپۋتاتتار ينستيتۋتىن ەنگىزۋ جونىندە ۇكىمەتكە ۇسىنىستار توپتاماسىن ازىرلەدى. ونىڭ ءبارى «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن ءوزى باسقارۋ تۋرالى» زاڭعا تۇزەتۋلەردە كورىنىس تاپتى. داريعا نازارباەۆا ءماسليحات دەپۋتاتتارىن قۇجاتتى بەلسەندى تۇردە تالقىلاۋعا شاقىردى.
سەنات توراعاسى ءماسليحات جانىنداعى قوعامدىق كەڭەس مۇشەلەرىمەن كەزدەسۋدە ولاردىڭ جۇمىسىنىڭ دەربەستىگىن ارتتىرۋ قاجەتتىگىن اتاپ ءوتتى. ء«بىز سەناتتىڭ جانىندا جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەس قۇردىق جانە وعان زور ءۇمىت ارتىپ وتىرمىز. ماسليحاتپەن بايلانىس تىعىز ءارى بەلسەندى جانە ەكىجاقتى بولعانىن قالار ەدىك», دەدى د.نازارباەۆا.
سەنات باسشىسىنىڭ پىكىرىنشە, حالىقپەن جۇمىس ىستەۋدىڭ جاڭا تۇرپاتى كەرەك بولادى, جۇرتشىلىقتىڭ قاتىسۋىمەن كوشپەلى وتىرىستاردى ۇزدىكسىز وتكىزىپ, ىستەلگەن جۇمىستار تۋرالى رەسمي سايتتاردا عانا ەمەس, الەۋمەتتىك جەلىلەردە دە كەڭىنەن جاريالاۋ قاجەت. د.نازارباەۆا بۇل رەتتە وسى جۇمىستار ءاتۇستى جاسالماي ءارى ءسوز جۇزىندە قالماي, ناقتى مازمۇنعا يە بولۋى كەرەكتىگىن اتاپ ءوتتى.
د.نازارباەۆا ۇلتتىق مادەني بىرلەستىكتەر باسشىلارىمەن سول كۇنگى بولعان كەزدەسۋدە ايماقتارداعى اسسامبلەيالاردىڭ مارتەبەسىن نىعايتۋدى, اتاپ ايتقاندا, جاستاردى مادەني بىرلەستىكتەر جۇمىسىنا تارتۋ, سونداي-اق ءتۇرلى ۇلت وكىلدەرى ءۇشىن الەۋمەتتىك ليفت جۇيەسىن قۇرۋ ماسەلەلەرىن تالقىلادى.
