قازاقستان • 07 قازان، 2019

2020 جىلى نۇر-سۇلتاندا تۇركى الەمى ەلدەرىنىڭ جاستارى اراسىندا اقىندار ءمۇشايراسى وتەدى

115 رەتكورسەتىلدى

بۇگىن ەل استاناسىنداعى «وقۋشىلار سارايىندا» جاس اقىندارعا ارنالعان ء«بىز جاستارعا سەنەمىز» اتتى ءمۇشايرانىڭ ماراپاتتاۋ ءراسىمى ءوتتى. كەلەسى جىلى بۇل بايگە ءال-ءفارابيدىڭ 1150 جىلدىعى مەن ۇلى اقىن ابايدىڭ 175 جىلدىق مەرەيتويىنا ورايلاستىرىلىپ، تۇركى الەمى ەلدەرىنىڭ جاستارى اراسىندا وتەتىن بولادى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.


بۇل جوبا نۇر-سۇلتان قالاسىنىڭ قوعامدىق دامۋ ىستەرى باسقارماسىنىڭ قولداۋىمەن وسىمەن ءۇشىنشى جىل قاتارىنان وتكىزىلىپ جاتىر. وعان ەلىمىزدىڭ تۇكپىر-تۇكپىرىنەن جۇزدەن استام دارىندى جاستار قاتىسىپ كەلەدى. سالتاناتتى ءىس-شاراعا مەملەكەت سىيلىعىنىڭ يەگەرى، جازۋشىلار وداعى باسقارماسىنىڭ حاتشىسى، اقىن نەسىپبەك ايت ۇلى، پارلامەنت ءماجىلىسىنىڭ دەپۋتاتتارى، مادەنيەت قايراتكەرلەرى جانە ونەر جۇلدىزدارى قاتىستى.

«بۇگىنگى ءمۇشايرا ەلباسى جاريالاعان جاستار جىلى مەن «رۋحاني جاڭعىرۋ» باعدارلاماسى اياسىندا ءوتىپ وتىر. ەلىمىزدىڭ ءار وڭىرىنەن ءتۇرلى تۋىندىلار كەلىپ ءتۇستى. ادىلقازىلار القاسى مۇنداي سىندا ۇزدىك شىققان دارىنداردى تاڭداپ وتىر. جاستاردىڭ الدىنا ەركىن تاقىرىپ قويىلدى. ءار اقىن ءوزىنىڭ ويىندا، جۇرەگىندە جۇرگەن شىعارمالارىن ۇسىندى. مۇنداي ءىس-شارانىڭ باستى ماقساتى – جاستاردى قولداۋ، ولاردىڭ بويىنداعى ەلگە، وتانعا دەگەن پاتريوتتىق سەزىمىن، سۇيىسپەنشىلىگىن ارتتىرۋ. وسى جوبا قولعا الىنعان ءۇش جىلدىڭ ىشىندە مىڭنان اسا جاس اقىن ءوز تۋىندىلارىن شىعارىپ وتىر»، – دەيدى نۇر-سۇلتان قالاسىنىڭ قوعامدىق دامۋ ىستەرى باسقارماسىنىڭ باسشىسى تالعات راحمانبەردى.

نۇر-سۇلتان قالاسىنىڭ قوعامدىق دامۋ ىستەرى باسقارماسىنىڭ باسشىسى اتالعان بايقاۋ كەلەسى جىلى تەك رەسپۋبليكالىق دەڭگەيدە ەمەس، حالىقارالىق دەڭگەيدە وتەتىنىن حابارلادى. اتاپ ايتقاندا، بايقاۋعا تۇركى مەملەكەتتەرىنىڭ جاس اقىندارى قاتىساتىن بولادى. سونىمەن ء«بىز جاستارعا سەنەمىز» بايگەسىنىڭ قورىتىندىسى بويىنشا الماتى ءوڭىرىنىڭ جاس دارىنى نۇربول مۇراتبەك ءى ورىن السا، ءىى ورىن ەرنار ماقسۇتوۆ پەن ءسانيا جۇرسىنوۆاعا بۇيىردى. ۇيىمداستىرۋشىلار ولارعا اقشالاي سەرتيفيكات تابىس ەتتى. ۇزدىك ۇشتىكتى امانگەلدى اقجىگىت، دۋلاتبەك كەنجەبەك جانە نۇرداۋلەت ومىربەك تۇيىندەدى. ۇيىمداستىرۋشىلار تاراپى «ۇزدىك اقىن» نوميناتسياسىن تاعايىنداپ، دارىن يەلەرىن ماراپاتتادى. مۇنداي سىيلىققا ورازاي جەڭىس ۇلى، ايزادا راقىمجانوۆا، جامال جۇرسىنبەك جانە جاۋىنباي جىلقىباي ۇلى يە بولدى. «مۇشايراعا رەسپۋبليكامىزدىڭ وڭىرلەرىنەن 140-قا تارتا اقىن قاتىستى. ونىڭ ىشىندە 10 اقىنعا جۇلدە بەرىلدى، ال باس-اياعى 30 اقىن ۇزدىك اتانىپ، جەكە كىتابىن شىعاردىق. تاقىرىپ رەتىندە ماعجان جۇماباي ۇلىنىڭ «مەن جاستارعا سەنەمىن» ءسوزىن الىپ، بۇگىنگىنىڭ تۇرعىسىنان ء«بىز جاستارعا سەنەمىز» دەگەن ات قويىپ، ايدار تاقتىق. «رۋحاني جاڭعىرۋ» باعدارلاماسى اياسىندا ءوتىپ  جاتقان بۇل جارىستىڭ ءمانى وتە زور. ءبىز جاڭا جاس تالانتتاردى اشۋمەن قاتار ەلىمىزدىڭ بۇگىنگى تاڭداعى جۇرگىزىپ وتىرعان ساياساتىن، حالقىمىزدىڭ بولاشاعىن جىرلاۋدى جاستاردىڭ الدىنا تاقىرىپ ەتىپ قويدىق. ولاردىڭ تۋىندىلارىنان جاڭا ءبىر لەپ، جاڭا زامان تىنىسى، بولاشاققا دەگەن سەنىم بايقالدى. جۇلدە العان جاستاردىڭ ءبارى 16-29 جاس ارالىعىندا»، – دەيدى اقىندار جارىسىنا قازىلىق ەتكەن توپتىڭ جەتەكشىسى نەسىپبەك ايت ۇلى.


سوڭعى جاڭالىقتار

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

شىمبۇلاق شاڭعى ماۋسىمىن اشتى

قىسقى سپورت • كەشە

اتباسار

رۋحانيات • كەشە

ۇقساس جاڭالىقتار