يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ ءوز بايانداماسىندا اتاپ وتكەندەي, ازاماتتىق اۆياتسيا سالاسى بۇگىنگى كۇنى باسىم باعىتتاردىڭ ءبىرى.
«ازاماتتىق اۆياتسياداعى نەگىزگى كورسەتكىشتەر ديناميكاسى ءوسىمدى كورسەتەدى. اعىمداعى جىلدىڭ 8 ايىنىڭ قورىتىندىسى بويىنشا قىزمەت كورسەتىلگەن جولاۋشىلار سانى 6,3%-عا ءوستى, 5,6 ملن جولاۋشى تاسىمالداندى, بۇل وتكەن جىلدىڭ ۇقساس كورسەتكىشىنەن 1,8%-عا ارتىق. سوڭعى 7 جىلدا ترانزيتتىك جولاۋشىلار اعىنى 45 ەسەگە ارتتى. ءبىز اعىمداعى جىلى بۇل كورسەتكىشتى 1 ملن ترانزيتتىك جولاۋشىعا دەيىن جەتكىزۋدى جوسپارلاپ وتىرمىز», — دەدى يندۋستريا جانە ينفراقۇرىلىمدىق دامۋ ءمينيسترى.
جالپى ەلىمىزدە 59 اۆياكومپانيا جۇمىس ىستەيدى. 9 قازاقستاندىق اۆياكومپانيانىڭ ەۋروپالىق وداق ەلدەرىنە ۇشۋعا رۇقساتى بار. ىشكى نارىقتا 8 قازاقستاندىق اۆياكومپانيا 54 مارشرۋت بويىنشا ۇشۋدى ورىندايدى. اۋە كەمەلەرىنىڭ مەملەكەتتىك تىزىلىمىندە 893 اۋە كەمەسى تىركەلگەن.
بۇگىنگى كۇنى يكاو ستاندارتتارىنا سايكەس ۇشۋ قاۋىپسىزدىگى دەڭگەيى بويىنشا قازاقستان تمد ەلدەرى اراسىندا 74% كورسەتكىشپەن II-ورىندى يەلەنەدى, اۋەجايلاردىڭ قاۋىپسىزدىك دەڭگەيى 83%-دى قۇرايدى. قازاقستاننىڭ اۆياتسيالىق قاۋىپسىزدىك سالاسىنداعى جەتىستىكتەرى اعىمداعى جىلدىڭ 24 قىركۇيەگىندە يكاو كەڭەسىنىڭ ماراپاتىمەن اتاپ ءوتىلدى.
جالپى اۋە كەمەلەرى پاركىنىڭ ءوسۋى جانە جاڭارۋى, سونداي-اق, ۇشۋ قارقىنىنىڭ ۇلعايۋى بايقالادى.
اعىمداعى جىلدىڭ 1 تامىزىنان باستاپ مەملەكەت 100% قاتىساتىن «قازاقستاننىڭ اۆياتسيالىق اكىمشىلىگى» اكتسيونەرلىك قوعامى جۇمىس ىستەي باستادى. وسى ۇيىمنىڭ نەگىزگى فۋنكتسيالارى – اۆياكومپانيالار مەن اۋە كەمەلەرىن تەحنيكالىق باقىلاۋ جانە قاداعالاۋ, يكاو ستاندارتتارىنا سايكەس پەرسونالدى وقىتۋ.
ەندى قازاقستانعا ۇشۋ قاۋىپسىزدىگىنىڭ ەۋروپالىق ستاندارتتارىن ەنگىزۋ بويىنشا تەحنيكالىق قولداۋدى بريتاندىق اگەنتتىكتىڭ جەتەكشى ەۋروپالىق ساراپشىلارى كورسەتەتىن بولادى.
مەملەكەت باسشىسى ءوز جولداۋىندا اتاپ وتكەندەي, ازاماتتىق اۆياتسيا سالاسىنداعى پروبلەمالىق ماسەلەلەردىڭ ءبىرى — اۆيابيلەت قۇنىنىڭ جوعارى بولۋى, ول ءوز كەزەگىندە اۋە تاسىمالدارىنا باعا بەلگىلەۋ, اۆياوتىن جانە جولاۋشىلار اعىنىنىڭ دەڭگەيى سياقتى فاكتورلارمەن بايلانىستى.
«قازىرگى ۋاقىتتا اۆيابيلەت قۇنى نەگىزىنەن باعا بەلگىلەۋدىڭ نارىقتىق جانە ديناميكالىق مەحانيزمى (باسەكەلەستىك, سۇرانىس, ماۋسىمدىق, مەرەكە جانە دەمالىس كۇندەرى) نەگىزىندە قالىپتاسادى. مەملەكەت تىكەلەي رەتتەمەيدى جانە تەك اۆياكومپانيالار ءۇشىن باسەكەگە قابىلەتتى جاعدايلار جاسايدى. باسەكەنىڭ ارقاسىندا عانا ءبىز اۆيابيلەت قۇنىن تومەندەتەمىز. مەملەكەت ءوز كەزەگىندە نارىققا ءتيىستى قاداعالاۋ مەن باقىلاۋدى جۇزەگە اسىرۋى ءتيىس. سوندىقتان وسى پروبلەمانى شەشۋ ءۇشىن مينيسترلىك بىرقاتار شارا قابىلداۋدا», — دەدى سالا باسشىسى.
