سپورت • 07 قازان، 2019

ورالدا «Aqjaiyq marathon» ءوتتى

87 رەت كورسەتىلدى

ورال قالاسىندا تۇڭعىش رەت «Aqjaiyq marathon-2019» تولىق مارافون جۇگىرىسى ءوتتى. سپورتتىق شاراعا ايگىلى سۋپەرمارافونشى، حالىقارالىق سپورت شەبەرى جانە گيننەس رەكوردتار كىتابىنا جەتى رەت ەنگەن مارات جىلانباەۆ، ترياتلوننان جاسوسپىرىمدەر اراسىندا ازيا چەمپيوناتىنىڭ قولا جۇلدەگەرى، حالىقارالىق دارەجەدەگى سپورت شەبەرى ەرجان جاپپاروۆ قاتىستى.

- ورال قالاسىنىڭ تاريحىندا تۇڭعىش رەت ۇيىمداستىرىلعان تولىق مارافونعا قوش كەلدىڭىزدەر! باتىسقازاقستاندىقتارمەن بىرگە مارافونعا ەلىمىزدىڭ 10 قالاسىنان، رەسەيدىڭ 5 قالاسىنان 1000-نان استام ادام تىركەلدى. ءبىزدى قولداۋعا كەلگەن سپورتشىلار مارات جىلانباەۆ پەن ەرجان جاپپاروۆقا العىسىمىز شەكسىز. بارىڭىزگە ساتتىلىك تىلەيمىن! - دەدى مارافونشىلاردى قۇتتىقتاعان باتىس قازاقستان وبلىسىنىڭ اكىمى عالي ەسقاليەۆ.

مارافونعا قاتىسۋشىلار جاس ەرەكشەلىگىنە جانە دايىندىعىنا بايلانىستى تولىق (42.2 شاقىرىم)، جارتىلاي (21.1 جانە 10.5 كم)، سونداي-اق كىشكەنتاي جەلاياقتارعا ارنالعان kids run (440 مەتر) سايىسىنا قاتىستى.

كوپشىلىك سپورتتىق شاراعا ءوڭىر باسشىسى عالي ەسقاليەۆ پەن ورال قالاسىنىڭ اكىمى ابات شىنىبەكوۆ تە قاتىستى. سونداي-اق ءدال وسى مارافونعا وزگە قالالاردان ونلاين-رەجيمدە 100-دەن اسا جەلاياق جۇگىرىپتى.

وبلىس اكىمىنىڭ ايتۋىنشا، بولاشاقتا وسىنداي سايىستار ورالدا كوكتەم مەن كۇزدە تۇراقتى ءوتىپ تۇرماق.

ايگىلى مارافونشى مارات جىلانباەۆ اتاپ وتكەندەي، جۇگىرۋ – ەڭ دەموكراتياشىل سپورت، ويتكەنى بۇعان ارنايى زال، عيمارات، سپورتتىق قۇرالدار كەرەك ەمەس.

«Aqjaiyq marathon-2019» شاراسىنىڭ قورىتىندىسىندا 42،2 كيلومەترلىك تولىق مارافون سايىسىندا ەرلەر اراسىندا قوستانايلىق الەكساندر ساۆگۋروۆ، ايەلدەر اراسىندا الماتىلىق ديانا ايدوسوۆا جەڭىمپاز اتاندى. 21،1 شاقىرىمدىق جارتىلاي مارافوندا ورىنبورلىق الەكسەي شيرشوۆ پەن الماتىلىق دانا گۋساروۆا ۇزدىك شىقتى. ال 10،5 شاقىرىمدىق سايىستا يسلام امانعوس پەن ەكاتەرينا گرەتساي (ەكەۋى دە قوستانايلىق) جەڭىسكە جەتتى.

 سۋرەتتى تۇسىرگەن مەيىربەك تاجقۇرانوۆ

 باتىس قازاقستان

سوڭعى جاڭالىقتار

اتىراۋدا 9 بالانى يت تالادى

ايماقتار • بۇگىن، 19:57

ۇقساس جاڭالىقتار