ونەر كەشىنە ءبىرجان سالدىڭ شوبەرەسى مارال تەمىرتاسوۆ پەن ۇكىلى ىبىرايدىڭ نەمەرەسى ەلەمەس ەسەتقىزى قۇرمەتتى قوناق رەتىندە قاتىستى. بيىلعى فەستيۆالدىڭ باستى ەرەكشەلىگى – ءان مەرەكەسىنە الماتىداعى قۇرمانعازى اتىنداعى قازاق ۇلتتىق كونسەرۆاتورياسىنىڭ ءبىر توپ وقىتۋشىلارىنىڭ ارنايى كەلۋى بولدى. الدىمەن ءباسپاسوز ءماسليحاتى وتكىزىلدى. ونەر ءىزىن ىندەتكەن جيىندا حالىق اندەرىنە قاتىستى كەيبىر جاڭساقتىقتار تۋرالى, ءان ماتىندەرىنىڭ وزگەرىسكە ۇشىراۋى, قايسىبىر انشىلەردىڭ ءان تاريحىنا بويلاماي, تۇسىنبەستىك تۋىنداپ جاتاتىن جايلار اڭگىمە وزەگىنە اينالدى. ءبىرجان سالدىڭ شوبەرەسى مارال تەمىرتاسوۆ ءبىرجان سال اۋدانىنداعى بابا رۋحىنا ارنالعان ءىس-شارا تۋرالى دا تارقاتىپ ايتىپ, وسى مادەني شارانىڭ وتۋىنە ۇيىتقى بولعان اۋدان اكىمى ەرمەك نۇعىمانوۆقا زور العىسىن ءبىلدىردى. سونداي-اق ءان ونەرىنىڭ مايتالماندارى كۇنى بۇرىن فەستيۆال اياسىندا ءبىرجان بابانىڭ تۋعان جەرىنە ارنايى بارىپ, جەرگىلىكتى ونەرسۇيەر قاۋىمعا كونتسەرت قويىپ, وزدەرى دە رۋحاني قۋات الىپ كەلگەندىكتەرىن تىلگە تيەك ەتتى.
جيىندا ورىندى كوتەرىلگەن ماسەلە – ارقا ءان ونەرىنىڭ كوكجيەگىن كوركەيتىپ تۇرعان تۇلعالاردىڭ ناسيحاتتالماۋىنا قاتىستى بولدى. ماسەلەن, ەلىمىزدە امىرە قاشاۋباەۆ, جۇسىپبەك ەلەبەكوۆ اتىنداعى رەسپۋبليكالىق ءان بايقاۋلارى وتكىزىلىپ تۇرادى. بىراق ءان ونەرىنىڭ باستاۋىندا تۇرعان ءبىرجان سال, اقان سەرى, ۇكىلى ىبىراي اتىندا بىردە-ءبىر ءان بايقاۋى جوق. الداعى ۋاقىتتا كوكشە جەرىندە وسىنداي رەسپۋبليكالىق بايقاۋلار ۇيىمداستىرىلىپ تۇرسا, قۇبا-قۇپ بولار ەدى دەستى ونەر جاناشىرلارى. حالىق مۇرالارىن زەرتتەۋشى مۇساتاي عالىم «ون ساۋساق» ءانى ۇكىلى ىبىرايدىڭ ءانى ەكەندىگىن ناقتى دالەلدەرگە سۇيەنە وتىرىپ, ءوز پىكىرىن ورتاعا سالدى. قازاقتىڭ ءان ونەرىن اسقاقتاتىپ جۇرگەن ءانشى ەركىن شۇكىمان بولسا, جالپى بۇل سالا ءالى دە بولسا تياناقتى زەرتتەۋدى تالاپ ەتەتىندىگىن باسا ايتتى.
ءباسپاسوز ءماسليحاتىنان سوڭ, ىلە ءسانى مەن سالتاناتى جاراسقان كونتسەرت باستالدى. كونتسەرتتىڭ شىمىلدىعىن قازاقستان رەسپۋبليكاسىنىڭ ەڭبەك سىڭىرگەن ءارتىسى عازيزا جۇمەكەنوۆا «كوكشەتاۋ كەستەلەرى» انىمەن اشتى. ءبىرجان سالدىڭ «سىرعاقتى» ءانىن قازاقستان رەسپۋبليكاسىنىڭ ەڭبەك سىڭىرگەن قايراتكەرى ەركىن شۇكىمان اسەرلى ورىنداپ, ونەرسۇيەر قاۋىمنىڭ كوڭىلىن ءبىر سەرپىلتىپ تاستادى. سونىمەن قاتار ءبىرجان سالدىڭ «بۋرىل تاي» ءانىن رەسپۋبليكالىق بايقاۋلاردىڭ لاۋرەاتى امانگەلدى كۇزەۋباي ناقىشىنا كەلتىرە ورىنداپ, جۇرەك قىلىن شەرتىپ, كوڭىلدى تولقىتىپ, جۇرەكتى تەبىرەنتتى. سونداي-اق بۇل كەشتە ءداستۇرلى ءاننىڭ اجارىن اشىپ, مەرەيىن اسىرىپ جۇرگەن اسقاق ءانشى قاجىباي جاحين ءبىرجان سالدىڭ «ايبوز» جانە ۇكىلى ىبىرايدىڭ «قالدىرعان» اندەرىن جۇرەككە جەتكىزىپ, قۇلاقتىڭ قۇرىشىن قاندىرىپ ورىندادى.
گالا كونتسەرتتە رەسپۋبليكالىق بايقاۋلاردىڭ لاۋرەاتتارى سارسەنباي حاسەنوۆ, باۋىرجان نۇرمۇحان, تولەگەن امانوۆ, شىڭعىس سارسەنباي ءان شىرقاپ, كەش اجارىن اشا ءتۇستى. وسى ورايدا, فەستيۆالدى ۇيىمداستىرۋ جۇمىستارىنا اتسالىسىپ, قازاقتىڭ ءان ونەرىن ناسيحاتتاپ جۇرگەن سارسەنباي حاسەنوۆتىڭ ەڭبەگى زور ەكەندىگىن باسا ايتقاندىعىمىز ءجون بولار.
بۇل كۇن كوگىلدىر كوكشەنىڭ كوگىندە ارقا اندەرى اسقاقتاعان اقجارما كۇن بولدى.
كوكشەتاۋ
