رەسەيدىڭ «ارگۋمەنتى ي فاكتى» گازەتى اۋقىمدى پىكىرتالاسقا 37 ەلدەن 143 ساراپشى قاتىساتىنىن حابارلاعان. بيىلعى وتىرىس شەتەلدىك قوناقتاردىڭ دا پانەلدىك وتىرىستارعا قاتىسۋىمەن ەرەكشەلەنەتىنىن مالىمدەگەن. «وتىرىستىڭ العاشقى كۇنى قىزۋ تالقىلاۋلارمەن باستالدى. قاتىسۋشىلار الەم ارەناسىندا بولىپ جاتقان وزگەرىستەر, ونداعى نەگىزگى ويىنشىلار تۋرالى ويلارىمەن ءبولىستى. ۇلكەن دەرجاۆالاردىڭ ءبىرىن-ءبىرى مويىنداماۋى دا ۇلكەن پروبلەماعا اينالعانىن ءسوز ەتتى. وسى ورايدا قىتايلىق ساراپشىلار الداعى كەزدە ۇلكەن ەكونوميكالىق وزگەرىستەر بولاتىنىن, ول وزگەرىستەرگە قىتاي كومپانيالارى اسەر ەتەتىنىن ايتىپ ءوتتى», دەلىنگەن گازەت حابارلاماسىندا.
ازەربايجاننىڭ Online News Agency اگەنتتىگى حالىقارالىق جيىندا ازەربايجاننىڭ كوپ جىلدان بەرى شەشىمى تابىلماي كەلگەن ماسەلەسى تاۋلى قاراباح تا نازارعا الىنعانى تۋرالى جازادى. ازەربايجان پرەزيدەنتى يلحام اليەۆتىڭ ارمەنيا پرەمەر-ءمينيسترى نيكول ءپاشينياننىڭ «قاراباح – ارمەنيانىڭ جەرى» دەگەن مالىمدەمەسىنە جاۋابىن دا كەلتىرگەن.
«ۆەستنيك كاۆكازا» گازەتى بيىلعى وتىرىسقا شەتەلدىك ساراپشىلاردىڭ كوپتەپ كەلگەنىن, ءار ساراپشىنىڭ ءوز ويى, پىكىرى مەن الىپقوسارى بارىن بايانداعان. سونىمەن قاتار ساياساتكەرلەرمەن بىرگە عالىمدار, ۋنيۆەرسيتەت رەكتورلارى دا, اتاپ ايتساق, مگيمو رەكتورى اناتولي توركۋنوۆ تا بوي كورسەتكەنىن جازادى.
RT حالىقارالىق تەلەۆيزيا جەلىسى بيىلعى پىكىرتالاستىڭ باتىستىڭ الەم ساياساتىنداعى قارقىنى مەن ۇستەمدىگى باسەڭدەگەنىن, ءاربىر دەلەگات ءوز ەلىندە ءتۇيىنىن تاپپاعان ماسەلەلەردى اتاپ وتۋگە تىرىسقانىن حابارلايدى. «فيليپپين پرەزيدەنتى رودريگو دۋتەرتە مەملەكەتىندەگى ەسىرتكى پروبلەماسى تۋرالى بايانداپ, ساراپشىلار پىكىرىن ەستۋگە مۇمكىندىك الدى» دەلىنگەن ارنا حابارلاماسىندا.
«يزۆەستيا» گازەتى بيىلعى تاقىرىپتىڭ شىعىسقا قاتىستى بولۋى تەگىن ەمەس ەكەنىن جازادى. وعان دالەل رەتىندە «ۆالداي» كلۋبىنىڭ قور كەڭەسىنىڭ توراعاسى اندرەي بىستريتسكيدىڭ «كەزىندە «ۇلكەن جەتىلىك» ىشكى جالپى ءونىمنىڭ 70 پايىزىنا اسەر ەتسە, قازىر تەك 40 پايىزىنا عانا ۇلەسكەر» دەگەن پىكىرىن كەلتىرەدى. سونىمەن بىرگە بيىلعى پىكىرتالاس تاقىرىپتارىنىڭ قاتارىنا افريكا ماسەلەسى, الەمدىك ەنەرگەتيكا نارىعى, يسلام الەمى سىندى تىڭ تاقىرىپتار ەنگەنىن مالىمدەيدى.
«Anadolu ajansı» اگەنتتىگى قازاقستان پرەزيدەنتى قاسىم-جومارت توقاەۆ پەن رەسەي فەدەراتسياسى پرەزيدەنتى ۆلاديمير ءپۋتيننىڭ كەزدەسكەنىن, بۇل ق.توقاەۆتىڭ العاشقى قاتىسۋى ەكەنىن اتاپ وتكەن. سونىمەن قاتار اگەنتتىك ء«وز كەزەگىندە رەسەي پرەزيدەنتى قاسىم-جومارت توقاەۆقا شاقىرتۋدى قابىل العانى ءۇشىن العىس ءبىلدىردى. «بۇل تاقىرىپتاردا تاجىريبەڭىز مول, ءوزىڭىزدىڭ پىكىرىڭىزدى ءبىلۋ ءبىز ءۇشىن قىزىق ءارى پايدالى بولماق» دەگەن ۆ.ءپۋتيننىڭ ءسوزىن جاريالادى.
CNBC ارناسى مەملەكەتتەردىڭ قورعانىسى, اسىرەسە قىتايدىڭ ارەكەتتەرى تۋرالى اڭگىمە وربىگەنىن, تۇركيانىڭ ناتو-عا قوسىلۋ مۇمكىندىگى تۋرالى ءسوز قوزعالعانىن جازادى.
Reuters حالىقارالىق اگەنتتىگى «شتاينمايەر فورمۋلاسىنىڭ» قىزۋ تالقىعا تۇسكەنىن, پالەستينا مەن يزرايل اراسىنداعى شيەلەنىستى شەشۋ, سيرياداعى سوعىس ماسەلەلەرى تالقىلانىپ, بىرنەشە ۇسىنىس بولعانىن حابارلايدى. وسى رەتتە اگەنتتىك حابارلاماسىندا «رەسەي پرەزيدەنتى ۆ.پۋتين ازيا الەمدىك مەجەدەن اسىپ, ءومىر ءسۇرۋ دەڭگەيى جوعارى بولعاندىعىمەن ەرەكشەلەنەتىنىن ەسكەرگەنىن, ەڭ وزىق تەحنولوگيالار بەلسەندى ەنگىزىلىپ جاتقانىن ايتتى» دەلىنگەن.
The Jordan Times گازەتى يوردانيا كورولى ابداللا II-ءنىڭ قاتىسقانىن, القالى جيىندا الەمدى الاڭداتقان ماسەلەلەردىڭ ءسوز بولعانىن, قازاقستان پرەزيدەنتى قاسىم-جومارت توقاەۆتىڭ استانا پروتسەسى اياسىندا ەۋروپاداعى كەلىسسوزدەردىڭ 13-راۋندى وتكەنىن, قازاقستاننىڭ اۋعانستانعا ەرەكشە كوڭىل بولەتىنىن جانە قاجەتتى كومەك كورسەتەتىنىن اتاپ وتكەن. وعان قوسا قازاقستان ءاردايىم ديپلوماتيانىڭ جانە قارۋسىزدانۋدىڭ دايەكتى جاقتاۋشىسى بولاتىنىن دا مالىمدەگەن.
