ءمامس جۇيەسى ەنگىزىلگەن العاشقى ءوڭىر
تالقىلاۋعا سالىنعان نەگىزگى تاقىرىپ – ءوزىن ءوزى جۇمىسپەن قامتىعان حالىقتىڭ مارتەبەسىن وزەكتەندىرۋ, ءتۇسىندىرۋ جۇمىستارىن جۇرگىزۋ جانە مىندەتتى الەۋمەتتىك مەديتسينالىق ساقتاندىرۋدى ەنگىزۋ اياسىندا ساقتاندىرۋ اۋدارىمدارىنىڭ ۋاقتىلى جۇزەگە اسىرىلۋىن قامتاماسىز ەتۋ ماسەلەلەرى بولدى.
«ەڭ باستىسى, حالىقتىڭ مارتەبەسىن وزەكتەندىرۋ. بىزدە جاقسى تاجىريبە بار, الايدا كەمشىلىكتەردى دە جاسىرۋعا بولمايدى. جىل سوڭىنا دەيىن مارتەبەسى ءالى انىقتالماعان بارلىق ادامداردى قامتۋ كەرەك. ءاربىر قازاقستاندىق بۇل جۇيەنىڭ قالاي جۇمىس ىستەيتىنىن, اسىرەسە اۋىلدىق جەرلەردە مەديتسينالىق كومەكتى قالاي الا الاتىنىن ءبىلۋى ءتيىس. تولەمدەردىڭ ۋاقتىلى جاسالۋى ماسەلەسىن دە شەشۋ قاجەت. سالىق ورگاندارى سالىقتى جانە مىندەتتى الەۋمەتتىك تولەمدەردى, ونىڭ ىشىندە ءمامس تولەۋدى باقىلاۋدى جانە جۇمىستى كۇشەيتۋى ءتيىس. 2020 جىلدىڭ 1 قاڭتارىنان باستاپ ءمامس-ءتى ىسكە قوسۋ بويىنشا ەلباسى مەن پرەزيدەنتتىڭ تاپسىرمالارى بار. مەرزىمدەر اۋىستىرىلمايدى. بارلىق وڭىرلەر جىل سوڭىنا دەيىن دايىن بولۋى ءتيىس», دەدى بەردىبەك ساپارباەۆ.
جالپى ۆيتسە-پرەمەر اتاپ وتكەندەي, مەديتسينالىق ساقتاندىرۋدى ەنگىزۋگە دايىندىق جوعارى. قاراعاندى وبلىسىندا ءمامس اپروباتسياسىنىڭ العاشقى ايى دەنساۋلىق ساقتاۋ جۇيەسىنىڭ كەلەسى جىلدان باستاپ ەل بويىنشا مەديتسينالىق ساقتاندىرۋدى اۋقىمدى تۇردە ەنگىزۋگە دايىن ەكەنىن كورسەتتى.
سونىمەن قاتار ءمامس جۇيەسىنە قولداۋ رەتىندە دەنساۋلىق ساقتاۋ جۇيەسىنىڭ ارداگەرلەرى جوعارى ساناتتى دارىگەر, مەديتسينا عىلىمدارىنىڭ دوكتورى, پروفەسسور اباي بايگەنجين جانە بۇرىنعى دەنساۋلىق ساقتاۋ ءمينيسترى, مەديتسينا عىلىمدارىنىڭ دوكتورى جاقسىلىق دوسقاليەۆ ءوز پىكىرلەرىن ءبىلدىردى.
ء«بىزدىڭ سانامىزعا كەڭەس زامانىنان بەرى مەملەكەت مەديتسينالىق قىزمەتتەردى تولەۋگە, قىمبات وتالاردى تەگىن جۇرگىزۋگە, ءدارى-دارمەكتەردى تەگىن بەرۋگە ءتيىس دەگەن پىكىر بەرىك ورناپ قالعان. ءمامس ادامداردى ءوز دەنساۋلىعىنا جاۋاپكەرشىلىكپەن قاراۋعا ۇيرەتەدى. ازاماتتار وزدەرىنىڭ دەنساۋلىعىنا جاۋاپتى ەكەنىن ءتۇسىنۋى ءتيىس. ءمامس ەنگىزۋ دەنساۋلىق ساقتاۋ سالاسىن رەسۋرستىق قامتاماسىز ەتۋدى ايتارلىقتاي ارتتىرۋعا, مەديتسينالىق مەكەمەلەر مەن قىزمەتكەرلەردىڭ ەكونوميكالىق قىزىعۋشىلىعىن ارتتىرۋعا مۇمكىندىك بەرەدى, دەنساۋلىق ساقتاۋدى بارىنشا يكەمدى جانە ءتيىمدى قارجىلاندىرۋعا جول اشادى», دەپ ەسەپتەيدى اباي بايگەنجين.
كەڭەس قورىتىندىسى بويىنشا بەردىبەك ساپارباەۆ مەديتسينالىق ساقتاندىرۋ جۇيەسىن ەنگىزۋ, حالىقتىڭ مارتەبەسىن وزەكتەندىرۋ جانە حالىقتى اقپاراتتاندىرۋ بويىنشا جۇمىستى جالعاستىرۋدى تاپسىردى.
«Life In» وڭالتۋ ورتالىعىن جانە «ميراس» كلينيكاسىن ارالاۋ بارىسىندا بەردىبەك ساپارباەۆ تسيفرلاندىرۋ جۇيەسىنىڭ ەنگىزىلۋىمەن, مەديتسينالىق قىزمەتتەردىڭ ساپاسىمەن, سونداي-اق كلينيكا قىزمەتكەرلەرىن قارجىلىق قامتاماسىز ەتۋ دەڭگەيىمەن تانىستى.
قاراعاندى وبلىسى – قاناتقاقتى رەجىمدە مىندەتتى الەۋمەتتىك مەديتسينالىق ساقتاندىرۋدى ەنگىزگەن العاشقى ءوڭىر. بۇل جۇيە وسى جىلدىڭ 1 قىركۇيەگىندە ىسكە قوسىلدى, ال ەلىمىزدىڭ باسقا وڭىرلەرىندە ونى 2020 جىلدىڭ 1 قاڭتارىندا ەنگىزەدى. بۇگىنگى تاڭدا قاراعاندى وبلىسىندا تۇرعىندارىنىڭ 81%-دا ءمامس جۇيەسىندەگى مارتەبەسى انىقتالدى.
ءموبيلدى جۇمىسپەن قامتۋ ورتالىعى
بەردىبەك ساپارباەۆ سونداي-اق ءموبيلدى جۇمىسپەن قامتۋ ورتالىقتارىنىڭ تاجىريبەسىمەن تانىستى. قاراعاندىلىقتار ەلىمىزدە ءبىرىنشى بولىپ ءىرى بازارلار مەن ۆوكزالدار سەكىلدى ادام كوپ شوعىرلاناتىن جەرلەردە جۇمىسقا ورنالاستىرۋ پۋنكتتەرىن قۇردى. جۇمىس ىزدەپ جۇرگەن ادامدار بوس ورىندارمەن تانىسىپ, بىردەن جۇمىس بەرۋشىگە جولداما الا الادى نەمەسە كاسىبي كۋرستارعا جازىلا الادى. ماماندار ازاماتتارعا ءوز ءىسىن اشۋ مۇمكىندىكتەرى تۋرالى ايتىپ, مەملەكەتتىك قولداۋ شارالارى تۋرالى كەڭەس بەرەدى.
وبلىس ورتالىعىندا العاش اشىلعان ءموبيلدى جۇمىسپەن قامتۋ ورتالىعى كۇن سايىن مىڭداعان ادام وتەتىن «شىعىس» بازارىنىڭ اۋماعىندا ورنالاسقان. ۆيتسە-پرەمەردى ورتالىق جۇمىسىنىڭ جۇيەلىلىگى مەن تيىمدىلىگى قىزىقتىردى. وسىنداي موبيلدىك جۇمىسپەن قامتۋ ورتالىقتارى وبلىستىڭ باسقا قالالارى مەن اۋداندارىندا جۇمىس ىستەيدى. ولاردىڭ جالپى سانى – 11. سونىمەن قاتار 13 جىلجىمالى جۇمىسپەن قامتۋ پۋنكتى بار.
بيىل وڭىردە 25 مىڭنان استام ادام جۇمىسپەن قامتىلدى. مەملەكەتتىك جۇمىسپەن قامتۋ باعدارلاماسىنىڭ بارلىق تەتىكتەرى ىسكە قوسىلدى. جاستار تاجىريبەسىنە 2321 ادام جىبەرىلدى. «باستاۋ بيزنەس» جوباسى بويىنشا كاسىپكەرلىك نەگىزدەرىنە 1300-دەن استام ادام وقىتىلدى. كۋرس تۇلەكتەرى جوبالاردى ىسكە اسىرۋعا 957 شاعىن نەسيە الدى.
جىل باسىنان بەرى وبلىستا 30 700-دەن استام جاڭا جۇمىس ورنى اشىلدى, ونىڭ ىشىندە ءاربىر ءۇشىنشىسى ‒ تۇراقتى.
جاستارمەن جۇزدەستى
پرەمەر-ءمينيستردىڭ ورىنباسارى سونىمەن قاتار ءوڭىردىڭ بەلسەندى جاستارىمەن كەزدەستى. باسقوسۋ قاراعاندى مەملەكەتتىك تەحنيكالىق ۋنيۆەرسيتەتىندە ءوتتى. جاستار ۆيتسە-پرەمەرگە وزدەرىنىڭ العاشقى تابىستارى تۋرالى اڭگىمەلەدى.
«جاستار – قوعامنىڭ قوزعاۋشى كۇشى. ءار ادام جاستاردىڭ بولاشاعى جاقسى بولعانىن ارماندايدى. ءبىزدىڭ ماقساتىمىز – جاستارعا دامۋ ءۇشىن جاعداي جاساۋ. جاستار جىلى, الداعى ەرىكتىلەر جىلى جانە پرەزيدەنتتىك كادرلىق رەزەرۆكە قابىلداۋ – بۇل قادامداردىڭ بارلىعى ەلىمىزدە جاستاردىڭ ءوز ماقساتتارىن جۇزەگە اسىرىپ, ارماندارىنا قول جەتكىزە الاتىنىن بىلدىرەدى», دەدى بەردىبەك ساپارباەۆ.
قازاقستاندا جاستار جىلىندا 89 ءىرى ءىس-شارا جۇزەگە اسىرىلىپ جاتىر, تۇرعىن ءۇي پروبلەماسىن شەشۋ بويىنشا دا شارالار ازىرلەندى, جاس كاسىپكەرلەر دە قولداۋعا يە بولعان. كەزدەسۋگە ستۋدەنتتەر, جاس كاسىپكەرلەر, جۇمىسشىلار, سپورتشىلار, ەرىكتىلەر جينالدى. جاس كاسىپكەر ءبىرجان يمانوۆ, «ەڭبەك» باعدارلاماسىنىڭ قاتىسۋشىسى الەكساندر كونتسەۆيچ بيزنەستەگى العاشقى قادامدارى تۋرالى ايتىپ بەردى.
پرەمەر-ءمينيستردىڭ ورىنباسارى بەردىبەك ساپارباەۆ پەن قاراعاندى وبلىسىنىڭ اكىمى جەڭىس قاسىمبەك ءوڭىر جۇرتشىلىعىمەن كەزدەستى. ۆيتسە-پرەمەر «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەل پرەزيدەنتىنىڭ العا قويعان مىندەتتەرىن ىسكە اسىرۋ جونىندەگى شارالار تۋرالى ايتىپ بەردى.
كەزدەسۋگە سونداي-اق دەنساۋلىق ساقتاۋ ءمينيسترى ەلجان ءبىرتانوۆ, ءبىلىم جانە عىلىم ءمينيسترى اسحات ايماعامبەتوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قاتىستى.
«قوعامدىق كەلىسىم بولعان كەزدە وڭ ناتيجە دە, ءال-اۋقات تا, گۇلدەنۋ دە بولادى. پرەزيدەنت قاسىم-جومارت توقاەۆ بۇل ماسەلەگە ۇلكەن نازار اۋدارادى. بۇل مەملەكەت پەن قوعامنىڭ اراسىنداعى ديالوگقا قاتىستى. مۇندا ۇكىمەتتىك ەمەس ۇيىمداردىڭ الەۋەتىن تارتۋ كەرەك. ەل ۇكىمەتى ەكى تۇجىرىمدامانى ازىرلەۋدە: «تىڭداۋشى مەملەكەت» جانە ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسى. بۇل قۇجاتتار جىلدىڭ سوڭىنا دەيىن دايىن بولۋى ءتيىس. وندا اشىق ۇكىمەت جانە حالىقپەن ءتيىمدى كەرى بايلانىس ماسەلەلەرى قوزعالادى. ازاماتتاردىڭ بىردە-ءبىر ءوتىنىشى مەن شاعىمى جاۋاپسىز قالماۋى كەرەك», دەدى بەردىبەك ساپارباەۆ.
ۆيتسە-پرەمەر قوعامدىق كەڭەستەردىڭ قىزمەتىن كۇشەيتۋ قاجەتتىگىن اتاپ ءوتتى. دارىندى بالالاردى قولداۋ كارتاسى, بالالار مۇددەسىن قورعايتىن 2030 جىلعا دەيىنگى مەملەكەتتىك ساياسات تۇجىرىمداماسى ازىرلەنەدى. 2019 جىلدىڭ سوڭىنا دەيىن جيناقتاردىڭ كىرىستىلىگىن ارتتىرۋ ماقساتىندا زەينەتاقى اكتيۆتەرىن ينۆەستيتسيالاۋ تاسىلدەرىن قايتا قاراۋ جوسپارلانىپ وتىر.
بالالاردىڭ بوس ۋاقىتىن ۇيىمداستىرۋ كەرەك
سونىمەن قاتار پرەمەر-ءمينيستردىڭ ورىنباسارى بەردىبەك ساپارباەۆ گ.گولوۆكين اتىنداعى قاراعاندىلىق سپورت كەشەنىندە بولدى. وندا جاس سپورتشىلار GGG قولداۋ ماقساتىندا فلەشموب وتكىزدى. 6 قازاندا نيۋ-يوركتىڭ بەلگىلى ارەناسىندا الەمگە ايگىلى قاراعاندىلىق گەننادي گولوۆكين ۋكراينالىق سەرگەي دەرەۆيانچەنكومەن جەكپە-جەك وتكىزگەنى بەلگىلى. بىلعارى قولعاپ شەبەرلەرىنىڭ شايقاسىندا بايگەگە IBF جانە IBO نۇسقالارى بويىنشا ورتا سالماقتاعى الەم چەمپيونى اتاعى تىگىلىپ, جەرلەسىمىز ۇپاي سانىمەن جەڭىسكە جەتتى.
ۆيتسە-پرەمەر اۋىر اتلەتيكا, كۇرەس, باسكەتبول زالدارىن جانە ءجۇزۋ باسسەينىن ارالاپ كوردى.
قاراعاندى
