وزبەك باسشىسى وزبەكستاننىڭ تولىققاندى مۇشە رەتىندە تۇركى كەڭەسىنە قوسىلۋى تۋرالى تاريحي شەشىمنىڭ ماڭىزدىلىعىن اتاپ ءوتتى جانە رەسمي ساپارمەن العاش كەلگەن باس حاتشىنى تاشكەنتكە جىلى شىرايمەن قارسى الدى. سونداي-اق پرەزيدەنت بۇل شەشىم وزبەكستاننىڭ ۇلتتىق مۇددەلەرىنە جاۋاپ بەرەتىندىگىنە جانە ەلدىڭ بارلىق سالاداعى باۋىرلاس تۇركى تىلدەس مەملەكەتتەرمەن جەمىستى جانە كوپجاقتى ىنتىماقتاستىعىنىڭ ناقتى الەۋەتىن اشۋعا وڭ اسەر ەتەتىنىنە سەنىم ءبىلدىردى.
شاۆكات ميرزيەەۆ وزبەكستاننىڭ قازىرگى كەزەڭدەگى دامۋ كوزقاراسىمەن ءبولىستى جانە كۇشتى مەملەكەتتىك ينستيتۋتتار, تۇراقتى نارىقتىق ەكونوميكاسى جانە حالىقتىڭ ءومىر ءسۇرۋ دەڭگەيى جوعارى زاماناۋي وزبەكستاندى قۇرۋعا باعىتتالعان ىشكى رەفورمالار تۋرالى ايتتى.
تۇركى كەڭەسىنىڭ باس حاتشىسى وزبەكستاننىڭ كەڭەس قىزمەتىنە بەلسەندى قاتىسۋى تۇركى كەڭەسى اياسىنداعى كوپجاقتى ىنتىماقتاستىقتىڭ كوكجيەگىن كەڭەيتىپ قانا قويماي, سونىمەن قاتار, تۇركىتىلدەس مەملەكەتتەردىڭ بىرلەسكەن الەۋەتىن ايتارلىقتاي نىعايتاتىنىن اتاپ ءوتتى.
ب. امىرەەۆ وزبەكستان پرەزيدەنتى ش. ميرزيەەۆتىڭ باسشىلىعىمەن قازىرگى وزبەكستاندى رەفورمالاۋدا ۇلكەن تابىستارعا قول جەتكىزگەنىن اتاپ ءوتتى جانە ەكونوميكانى ىرىقتاندىرۋ, ەلدەگى بيزنەس-ورتانى جانە ينۆەستيتسيالىق احۋالدى جاقسارتۋ ىسىندەگى كەڭ اۋقىمدى وزگەرىستەردىڭ ناتيجەلەرى بايقالىپ وتىرعانىن اتاپ ءوتتى.
پرەزيدەنتتى شاعىن جانە ورتا كاسىپكەرلىكتى دامىتۋعا ارنالعان باكۋدەگى الداعى 7-سامميتكە دايىندىق بارىسى تۋرالى حاباردار ەتە وتىرىپ, تۇركى كەڭەسىنىڭ باس حاتشىسى ەكونوميكالىق ىنتىماقتاستىقتى جان-جاقتى دامىتۋ الداعى جىلدارداعى ۇيىم قىزمەتىندە باستى باسىمدىق بولاتىنىن اتاپ ءوتتى. وسىعان بايلانىستى ول پرەزيدەنتتى جاقىندا قۇرىلعان تۇركى ساۋدا-ونەركاسىپ پالاتاسى (تپپ), مۇشە مەملەكەتتەردەگى شاعىن جانە ورتا كاسىپورىنداردى (شوك) قولداۋ ءۇشىن ينۆەستيتسيالىق قور قۇرۋ جونىندەگى كۇش-جىگەر, سونداي-اق, وسى كۇندەرى تاشكەنتتە ءوتىپ جاتقان تۇركى ىسكەرلىك كەڭەسى مەن ينۆەستيتسيالىق فورۋمنىڭ جۇمىس بارىسى تۋرالى حاباردار ەتتى.
ب. امىرەەۆ ش. ميرزيەەۆكە بۋداپەشتتە ەۋروپالىق وفيس-تۇركى كەڭەسىنىڭ وكىلدىگى اشىلعانى تۋرالى, سونداي-اق, TurkPA, TURKSOY, تۇركى اكادەمياسى جانە تۇركى مۇراسى مادەنيەت قورى سياقتى كەڭەستىڭ اففيليرلەنگەن ۇيىمدارىنىڭ قىزمەتى تۋرالى حابارلادى.
تۇركى كەڭەسىنىڭ ءتيىمدى وڭىرلىك قۇرىلىم رەتىندەگى زور الەۋەتىن اتاپ ءوتىپ, پرەزيدەنت ش ميرزيەەۆ پەن باس حاتشى ب. امىرەەۆ مۇشە مەملەكەتتەر اراسىنداعى, اسىرەسە, ساۋدا, ينۆەستيتسيا, يننوۆاتسيا, كولىك, تۋريزم جانە جاستار ساياساتى سياقتى باسىم سالالاردا كوپجاقتى ىنتىماقتاستىقتى دامىتۋدى قولدايتىنىن ايتتى.
تاراپتار وزبەكستاننىڭ قوسىلۋى مۇشە ەلدەر اراسىنداعى دوستىق پەن باۋىرلاستىقتىڭ تاريحي قارىم-قاتىناستارىن ايتارلىقتاي بايىتاتىنىنا سەنىم ءبىلدىردى.
