ەكى اپتا بويى حالىقارالىق جيىنتىق بولىمشە قۇرامىندا 60 قازاقستاندىق اسكەري قىزمەتشى ءۇندى ارىپتەستەرىمەن ترەنينگتەرگە قاتىسىپ, تاجىريبە الماسىپ, تاۋ جاعدايىندا شارتتى زاڭسىز اسكەري قۇرىلىمداردى وقشاۋلاۋ جانە جويۋ بويىنشا ءىس-قيمىلداردى تەوريادا جۇزىندە زەرتتەپ, ءىس-جۇزىندە پىسىقتايتىن بولادى.
قازىرگى تاڭدا وقۋ-جاتتىعۋعا قاتىسۋشىلار, قۇرامىندا ءار مەملەكەتتەن 60 ادام بولاتىن قازاقستاندىق جانە ۇندىلىك اسكەري قىزمەتشىلەردىڭ جيىنتىق بولىمشەسىن قۇرۋعا كىرىسىپ كەتتى.
قازاقستاننىڭ قۇرلىق اسكەرلەرى باس قولباسشىسى باسقارماسىنىڭ جاۋىنگەرلىك دايىندىقتى ۇيىمداستىرۋ باسقارماسى باستىعى پولكوۆنيك مارات ابدىحالىقوۆ ءۇندى ەلىنىڭ قوناق جايلىلىعىنا العىس ايتىپ, سونىمەن قاتار تەرروريزمگە قارسى كۇرەستىڭ جاڭا تاسىلدەرىن زەرتتەۋدەگى وقۋ-جاتتىعۋ ەكى ەلدىڭ اسكەري قىزمەتشىلەرىنە ولشەۋسىز پايدا اكەلەتىنىنە سەنىمدىلىك ءبىلدىردى.
ءۇندى قارۋلى كۇشتەرىنىڭ 111-ءشى جەكە مەحانيكالاندىرىلعان بريگادا كومانديرى گەنەرال ماندەل, ونىڭ بولىمشەسىندەگى جاۋىنگەرلەر بىرلەسكەن وقۋ-جاتتىعۋلارعا قاتىسقانىنا, جاڭا تاجىريبە جيناپ جانە الماساتىنىنا قۋانىشتى ەكەنىن ايتتى.
وقۋ-جاتتىعۋ قازاقستان مەن ءۇندىستان قورعانىس مينيسترلىكتەرى اراسىنداعى ەكى جاقتى ىنتىماقتاستىق جوسپارىن جۇزەگە اسىرۋ شەڭبەرىندە ۇيىمداستىرىلىپ وتىر. ءۇندى ەلىنە وقۋ-جاتتىعۋ بارىسىن باقىلاۋعا قازاقستان قۇرلىق اسكەرلەرى باس قولباسشىسىنىڭ ورىنباسارى گەنەرال-مايور داۋلەت وسپانوۆ كەلەدى دەپ جوسپارلانىپ وتىر.
بۇل قازاقستاندىق جانە ءۇندى اسكەري قىزمەتشىلەرىنىڭ بىرلەسكەن جۇمىسىنداعى ءبىرىنشى كەزدەسۋ ەمەس ەكەندىگىن ايتا كەتكەن ءجون. «قاز-يند» العاشقى وقۋ-جاتتىعۋى 2018 جىلى قازاقستانداعى گۆارديالىق گارنيزونىندا ءوتتى. ول كەزدەرى بىرلەسكەن تاجىريبەلىك ءىس-قيمىلدار بارىسىندا زاڭسىز اسكەري قۇرىلىمدارمەن كۇرەس جونىندەگى اسكەري ءىس-ارەكەتتەردىڭ بىرىڭعاي الگوريتمى پىسىقتالدى. بىرلەسكەن جۇمىستا ەكى ەلدىڭ اسكەري قىزمەتشىلەرى جاقسى تاجىريبە جينادى.
وتكەن جىلعى «قاز-يند-2018» وقۋ-جاتتىعۋىنا قازاقستاننىڭ اتىنان, قازىرگى كەزدە ۇندىستانداعى بىرلەسكەن جۇمىسقا قاتىسىپ جاتقان «وڭتۇستىك» وڭىرلىك قولباسشىلىعىنىڭ اسكەري بولىمدەرى تارتىلدى.
