ساياسات • 03 قازان، 2019

داريعا نازارباەۆا: بيۋدجەت باسىمدىقتارى ناقتى بولماسا ناتيجە بولمايدى

35 رەتكورسەتىلدى

سەناتتا داريعا نازارباەۆانىڭ توراعالىق ەتۋىمەن بيۋدجەت زاڭناماسىن جەتىلدىرۋ جونىندەگى كەڭەستىڭ وتىرىسى ءوتتى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

«وسى ۋاقىت ىشىندە اۋقىمدى جۇمىستار اتقارىلدى، اسىرەسە، قازىرگى الەۋمەتتىك جانە ەكونوميكالىق جۇيەلەرى الدىنداعى تاۋەكەلدەر مەن قاتەرلەر اياسىندا ونى جالعاستىرۋ وتە ماڭىزدى دەپ ەسەپتەيمىز»، دەدى سەنات توراعاسى.

سەناتورلار الدىندا ۇلتتىق ەكونوميكا ءمينيسترى رۋسلان دالەنوۆ بايانداما جاسادى. بيۋدجەت ۇدەرىسىن رەفورمالاۋ جونىندەگى جول كارتاسىن ۇسىنعان كەزدە ول بيۋدجەتتىك باعدارلامالاردى ىسكە اسىرۋدىڭ تيىمدىلىگىن باعالاۋدى جاقسى جانە نەعۇرلىم جەدەل جۇرگىزۋگە مۇمكىندىك بەرەتىن ستراتەگيالىق جوسپاردىڭ جاڭا تۇرپاتى تۋرالى ايتتى. ر.دالەنوۆ سونداي-اق بارلىق مەملەكەتتىك قۇرىلىمدارعا ارنالعان جاڭا سيپاتتاعى جوسپار بيىلعى جىلدىڭ سوڭىنا دەيىن بەكىتىلەتىنىن جەتكىزدى.

«2020 جىلدىڭ مامىر ايىندا 2021 جىلدان 2023 جىلعا دەيىنگى ءۇش جىلدىق كەزەڭگە بيۋدجەتتى قالىپتاستىرۋ كەزىندە مەملەكەتتىك ورگاندار ستراتەگيالىق جوسپاردى جاڭا تۇردە ۇسىناتىن بولادى»، دەپ اتاپ ءوتتى مينيستر.

د.نازارباەۆانىڭ پىكىرىنشە، مەكەمەلەر تەك ءوز بيۋدجەتتەرىنىڭ جوبالارىن ازىرلەي باستاعان ساتتەن باستاپ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىمەن ءوزارا تىعىز جۇمىس ىستەۋى ءتيىس. «بۇل جوسپارلانعان شىعىستاردى سالۋدىڭ ورىندىلىعىن ۋاقتىلى باعالاۋ تۇرعىسىنان وتە ماڭىزدى»، دەدى سەنات باسشىسى.

وتىرىس بارىسىندا نىسانالى كورسەتكىشتەردى وڭتايلاندىرۋ، ءتۇرلى مەملەكەتتىك باعدارلامالاردى قارجىلاندىرۋ جانە باسقارۋ تۋرالى ۇسىنىستار ايتىلدى. سەناتور ءالي بەكتاەۆتىڭ ايتۋىنشا، ولاردىڭ كەيبىرىنە ءارتۇرلى ارنالار ارقىلى قارجى بولىنەتىنى، الايدا، ەشقانداي ناتيجە بەرمەيتىنى بايقالىپ وتىر.

«مەن اگروونەركاسىپ كەشەنى سالاسىندا ءبىر باعدارلاما بويىنشا جۇمىس ىستەيتىن قور بار ەكەنىن، ەكىنشى باعدارلاما بويىنشا جۇمىس ىستەيتىن باسقا قۇرىلىم بار ەكەنىن بىلەمىن. «سىباعا»، «تۇياق» سياقتى باعدارلامالارعا ءار ءتۇرلى كوزدەردەن قاراجات بولىنەدى. ناتيجەسىندە ءبىز ولارعا قانشا بولىنەتىنىن جانە قالاي جۇزەگە اسىپ جاتقانىنان بەيحابارمىز»، دەدى ءا.بەكتاەۆ.

سەنات توراعاسى داريعا نازارباەۆا قارجىعا اسا مۇقيات بولۋدى جانە بيۋدجەت باسىمدىقتارىن ناقتى بەلگىلەيتىن ۋاقىت كەلگەنىن ايتا كەلىپ: «قازىر ءبىز قارجىلاندىرىپ، بارىنە قولداۋ ءبىلدىرىپ، جان-جاقتى قامتىپ كەلەمىز. سونىڭ ناتيجەسىندە بارىنە تەك تيىن-تەبەن عانا ءتيىپ وتىر. ودان قانداي ناتيجە شىعادى؟»، دەدى.

سوڭعى جاڭالىقتار

كۇلكى كەرۋەنى № 21

رۋحانيات • كەشە

شاعامان باتىر

تاريح • كەشە

361 ليفت اۋىستىرىلادى

ايماقتار • كەشە

«ءتسۋناميدى» سۇلاتىپ سالدى

كاسىپقوي بوكس • كەشە

استىڭ ءدامىن كەلتىرگەن

ايماقتار • كەشە

سايرايدى بۇلبۇل...

رۋحانيات • كەشە

باعا QR كودتار ارقىلى بەرىلەدى

ايماقتار • 08 جەلتوقسان، 2019

«جەلتوقسانشى» جەتكىنشەك ەسكە الىندى

رۋحانيات • 08 جەلتوقسان، 2019

ۇقساس جاڭالىقتار