كورمە-بايقاۋدى «اتامەكەن» قازاقستان رەسپۋبليكاسىنىڭ ۇلتتىق كاسىپكەرلەر پالاتاسى ۇيىمداستىرىپ وتىر. بيىلعى كورمەگە 153 وتاندىق كاسىپورىن ءوز ونىمدەرىن «وندىرىستىك ماقساتتاعى ۇزدىك تاۋارلار», «حالىق تۇتىناتىن ۇزدىك تاۋارلار», «ۇزدىك ازىق-ت ۇلىك تاۋارلارى» اتالىمدارى بويىنشا ۇسىنباق.
كورمە-بايقاۋمەن قوسا «اتامەكەن» ۇكپ ازيا دامۋ بانكى, قازاقستان قولونەرشىلەر وداعى جانە ۇلتتىق كۋرورتتىق قاۋىمداستىقپەن بىرلەسە وتىرىپ « ۇلى دالا ەلى» فورۋمىن وتكىزەدى. بۇل جەردە وتاندىق قولونەرشىلەر, حالىقارالىق سپيكەرلەر, شەتەلدىك ەلشىلىكتەر, ساۋدا-ونەركاسىپ پالاتالارى مەن وتاندىق جانە شەتەلدىك ساۋدا جەلىلەرى, ءونىم ديستريبيۋتورلارى جينالادى.
فورۋم اياسىندا ەكى كورمە وتەتىن بولادى. ءبىرىنشىسى – 70-كە جۋىق قولونەر شەبەرلەرىنىڭ ونىمدەرى ۇسىنىلاتىن ءداستۇرلى قولونەر بۇيىمدارىنىڭ كورمەسى. ولاردىڭ اراسىنداعى ەڭ تانىمال شەبەرلەر قولونەردىڭ ءار ءتۇرلى باعدارى بويىنشا كورمەگە كەلۋشىلەرگە ارناپ تەگىن شەبەرلىك ساعاتتارىن وتكىزەدى (كۇمىستەن, بىلعارىدان, سازدان, كيىزدەن بۇيىمدار جاساۋ جانە ت.ب.). ال ەكىنشىسى – ساۋىقتىرۋ جانە مەديتسينالىق تۋريزم كورمەسى. باستى ماقسات – كەلۋشىلەرگە قازاقستانداعى ساۋىقتىرۋ جانە مەديتسينالىق ءتۋريزمنىڭ بارلىق مۇمكىندىكتەرىمەن تانىستىرۋ. بارلىق وتاندىق ساناتوريلەر مەن بالشىقپەن ەمدەۋ ورىندارى, مينەرالدى كوزدەردەگى پانسيوناتتار مەن دەمالىس ورىندارى, مينەرالدى جانە اسحانالىق سۋدى وندىرۋشىلەر, SPA, ۇزدىك مەديتسينالىق جانە وڭالتۋ ورتالىقتارى كەلۋشىلەرگە ءوز ونىمدەرى مەن قىزمەتتەرىن تانىستىرادى.
ەلوردا تۇرعىندارى مەن قوناقتارى تاۋار وندىرۋشىلەرمەن تانىسىپ جانە وندىرۋشىلەردىڭ وزدەرى ۇسىنعان باعادا تاۋارلاردى تومەن باعادا ساتىپ الا الادى. كورمەدە نان-توقاش جانە كونديتەرلىك ونىمدەر, ءسۇت ونىمدەرى, جارتىلاي فابريكاتتار, تەكستيل جانە كيىم-كەشەك, قۇرىلىس ماتەريالدارى, مەديتسينالىق بۇيىمدار, كورپۋستىق جيھاز جانە ت. ب. قازاقستاندىق تاۋارلار ۇسىنىلاتىن بولادى.
سونداي-اق كورمەگە كەلۋشىلەر ەلىمىزدىڭ ەڭ ۇزدىك ساۋىقتىرۋ ورىندارىنا جولدامالار جانە باعالى سىيلىقتار ۇتىسىنا قاتىسا الادى, ال جۇمىس بەرۋشىلەر ءوز قىزمەتكەرلەرىنە ەڭ ءتيىمدى باعادا كەلىسىم-شارتتار جاساسا الادى.
