رەسپۋبليكالىق «ەكوساعات» ەكولوگيالىق اكتسياسىنا الماتى وبلىسى دا بەلسەنە اتسالىستى. سونىڭ ىشىندە تالدىقورعانداعى № 9 مەكتەپتە وتكەن شارادا وبلىس اكىمى اماندىق باتالوۆ ءسوز سويلەپ, بالالاردى تۋعان جەرىن سۇيۋگە, ونىڭ اسەم تابيعاتىن ايالاپ, كوركەيتۋگە شاقىردى. قاراتال شاعىن اۋدانىنىڭ جاڭادان تۇرعىزىلعان جىلدارىن, № 9 مەكتەپتىڭ قۇرىلىسى جۇرگەن كەزەڭدەردى ەسكە ءتۇسىردى. جىل وتكەن سايىن قازاقستاننىڭ ءبىر بولشەگى رەتىندە دامىپ كەلە جاتقان ءوڭىردىڭ ودان ءارى وركەندەۋىنە ونىڭ ءاربىر ازاماتى بەلسەنە اتسالىسۋى تيىستىگىن اتاپ ءوتتى.
- ءبىزدىڭ الماتى وبلىسىن جەر جانناتى جەتىسۋ دەپ بەكەر اتاماعان. بۇل شىبىق شانشىساڭ, شىنار وسەتىن قولايلى جەر. ولكەڭدى جاقسى كورۋ, وتاندى ءسۇيۋ ونىڭ تابيعاتىنا قامقورلىق جاساۋدان باستالادى. سوندىقتان وسىنداي «ەكوساعات» اكتسياسىنىڭ پايداسى زور. تالدىقورعاندى اتىنا ساي كوركەيتىپ, كوگالداندىرۋعا ءبارىمىز دە ۇلەس قوسايىق, - دەدى ا. باتالوۆ.
№ 9 مەكتەپتىڭ وقۋشىلارى ەرسايىن ساكىمجان مەن بالعىن دۇيسەنقۇلوۆا دا اكتسياعا قاتىستى وي-پىكىرلەرىن ءبىلدىرىپ, قاتارلاستارىن قورشاعان ورتانى قورعاۋعا شاقىردى.
وبلىس اكىمى باستاعان رەسمي قوناقتارعا بالالار ءوز قولدارىمەن جاساعان قۇس ۇياسىن كورسەتىپ, تابيعات قورعاۋ تاقىرىبىندا ولەڭدەر وقىدى.
اماندىق باتالوۆ مەكتەپ ۇجىمىمەن, اتا-انالارمەن, وقۋشىلارمەن بىرلەسىپ, مەكتەپ اۋلاسىنا 100 تال قايىڭ اعاشىن وتىرعىزدى. ارداگەر اپالار اعاش تۇبىنە كەسەمەن اق قۇيىپ, شانشىلعان شىبىقتار سايالى ورمان بولسىن دەگەن ىرىمىن جاسادى.
جالپى «ەكوساعات» اكتسياسى اياسىندا وبلىستاعى مەكتەپتەردىڭ اۋلالارىندا ورمان شارۋاشىلىعى مەن پاركتەردەن بولىنگەن 17250 اعاش وتىرعىزىلسا, بالاباقشالار مەن كوللەدجدەر ۇجىمدارىنىڭ دەمەۋشىلەر كومەگىمەن 15 مىڭ اعاش اكەلىنگەن, ءسويتىپ وڭىردە جالپى سانى 30 مىڭنان استام كوشەت ەگىلدى.
