الەم بىرىنشىلىكتەرىندە قازاقستاندىق سپورتشىلار بوكس بويىنشا 1 التىن, 1 كۇمىس جانە 4 قولا مەدال; كۇرەس تۇرلەرى بويىنشا 3 كۇمىس, 4 قولا مەدال جانە اۋىر اتلەتيكا بويىنشا 1 كۇمىس مەدال يەلەندى.
جارىستاردىڭ قورىتىندىسى جانە توكيودا وتەتىن وليمپيادا ويىندارىنا دايىندىق تۋرالى مادەنيەت جانە سپورت ۆيتسە-ءمينيسترى ەلدوس رامازانوۆ, ۇلتتىق وليمپيادا كوميتەتىنىڭ حاتشىسى ساكەن مۇسايبەكوۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ, سونداي-اق, ۇلتتىق قۇراما كوماندالاردىڭ باس ترەنەرلەرى باياندادى.
ە. رامازانوۆتىڭ ايتۋىنشا, بۇگىندە قازاقستاننىڭ قورجىنىندا 9 سپورت ءتۇرى بويىنشا 20 ليتسەنزيا بار, وليمپياداعا كەمىندە 100 ليتسەنزيا جەڭىپ الۋ جوسپارلانعان.
«ناتيجەلەر كوڭىل كونشىتەرلىك ەمەس. بوكس بويىنشا جالپىكوماندالىق ءۇشىنشى ورىندى الدىق, اۋىر اتلەتيكا بويىنشا – 12-ءشى, كۇرەس بويىنشا – 14-ءشى ورىندامىز. تەك بوكسشىلاردىڭ جالعىز التىن مەدالى بار. مينيسترلىك, ۇلتتىق وليمپيادا كوميتەتى, فەدەراتسيالار مەن دەمەۋشىلەر جەتكىلىكتى قولداۋ كورسەتىپ وتىر. وندا نەگە ناتيجە جوق؟ بەيىندى مينيسترلىك بۇل جۇمىستى دۇرىس ۇيلەستىرە الماي وتىر. سپورت – ءبۇتىن ءبىر ەلدىڭ ءيميدجى. توكيودا وتەتىن وليمپيادا ويىندارىندا جاقسى ناتيجەلەر كورسەتۋ ءۇشىن قاتەلەرمەن جۇمىس ىستەڭىزدەر. ۋاقىت از قالدى», دەدى ب. ساپارباەۆ.
سونىمەن قاتار ۆيتسە-پرەمەر سپورتشىلاردى جارىستارعا ىرىكتەۋ كەزىندە اشىقتىق پەن وبەكتيۆتىلىكتىڭ جەتىسپەيتىنىن ايتتى.
«سپورتتا جەڭ ۇشىنان جالعاسۋ, الالاۋ ەشقاشان بولماۋى ءتيىس! ءبىزدىڭ ەلىمىزدىڭ ابىرويىن ۇزدىك سپورتشىلار قورعاۋى كەرەك. بۇقارالىق سپورتتى دامىتىپ, كاسىبي سپورتشىلاردىڭ جاس ۇرپاعىن دايىنداۋ كەرەك. ءبىزدىڭ ماتەريالدىق-تەحنيكالىق بازامىز جاقسى, سوندىقتان, اسىرەسە, وڭىرلەردە سپورتتىق قۇرىلىمداردى بارىنشا ءتيىمدى پايدالانۋ قاجەت», دەپ تۇيىندەدى ول.
