ءبىرىنشى قاتەلىك. «ەر-ازاماتتار باقىلاۋ مەن قولداۋدى» اجىراتا المايدى. ايەلىنىڭ نە ىستەۋ قاجەتتىگى تۋرالى قولداۋى مەن كەڭەسى ەركەك ءۇشىن بۇيرىق, باسقارۋ, ياكي باقىلاۋ سياقتى بولىپ كورىنۋى ابدەن مۇمكىن. بۇل كەزدە سۇيىكتى ايەلىڭ ديكتانت جازىپ وتىرعاندا توبەڭنەن ءتونىپ قاراپ تۇراتىن قاتال مۇعالىم سياقتى بولىپ كورىنبەك. مۇنداي جاعدايدا كوپ ادامدار ۇلكەن ءىس تىندىرماق تۇگىلى, ءبىر ءارىپ تە جازا الماي قالادى.
ەكىنشى قاتەلىك. ء«بارىن ءوزىم ىستەيمىن, ول كورىپ ۇيالىپ قالسىن». جو-جوق, ەندىگى جەردە جىگىتكە ەندى ول تىرلىكتى اتقارۋدىڭ قاجەتى مەن قىزىعى شامالى. «ايەلدەر دە ىستەپ تاستايتىن ىستە مەنىڭ نە شارۋام بار؟». ەر-ازاماتتار ايەلدەردىڭ قولىنان كەلەتىن جۇمىستى نەسىنە اتقارسىن؟!
ال ايەل بايعۇس ەركەكتەر ىستەي الاتىن جۇمىستى دا ىستەي الاتىنىن دالەلدەگىسى كەلەدى. «مەن باسقا ايەلدەر سياقتى, نازىك, اقساۋساق ەمەسپىن, وتباسىمنىڭ باقىتى ءۇشىن بارىنەن دە تايىنبايمىن» دەگەندى بىلدىرگىسى كەلەدى.
ءۇشىنشى قاتەلىك. «تىمىرايىپ الۋ». ايەلدىڭ اۋزىنا قۇم قۇيىلعانداي, كۇيەۋىنە سويلەمەي, تىمىرايىپ ءجۇرىپ الۋى بورىكتىلەرگە تۇك تە ۇناماق ەمەس. رەنجىگەنىڭدى, ءىسىنىڭ ۇنامايتىنىن ءبىلدىرۋ ءۇشىن ايەلدەردىڭ قاباعىنا قار جاۋىپ ءجۇرىپ الۋىن ەر-ازاماتتار جازا رەتىندە قابىلدايدى. پسيحولوگيالىق تۇرعىدا وتە جاعىمسىز اسەر الادى. سوندىقتان دا بولاشاقتا مۇنداي جاعدايلاردان قاشقالاقتاپ نەمەسە ايتاتىن ءۋاجىن دايىنداپ جۇرەدى.
ءتورتىنشى قاتەلىك. «ودان دا تۇك ىستەمەگەنىڭ جاقسى ەدى». كەيبىر قىز-كەلىنشەكتەرگە نە ىستەسەڭ دە جاقپايسىڭ. ەگەر ول ايەلى جوسپارلاعانداي, ياكي ىستەگەن ءىسى كوڭىلدەگىدەي بولىپ شىقپاسا ەركەكتىڭ قۇلاعىنان قاڭقۋ كەتپەيدى. بار ونەرىن, ۋاقىتىن, كۇش-جىگەرىن سالىپ ىستەگەن جۇمىسى ءۇشىن قانشاما جۇيكەسى ەگەلىپ, تەك قاجاۋ ءسوز ەستيتىن بولسا, ەندى ول ىسكە كۇيەۋىڭ ق ۇلىقتى بولادى, جولايدى دەپ, ءتىپتى, ويلاماي-اق قويىڭىز.
بەسىنشى قاتەلىك. «جۇرتتىڭ كۇيەۋى كەرەمەت». جولداسىڭىزدى باسقالاردىڭ كۇيەۋىمەن سالىستىرۋدىڭ قاجەتى شامالى. بۇل ونىڭ نامىسىنا عانا تيمەيدى, «مەيلى سوعان بارىپ ءتيىپ ال, سوعان جاساتىپ ال» دەگەندى دە ەستىپ قالۋىڭىز عاجاپ ەمەس. ەر-ازاماتتار ءۇشىن ايەلى وليمپيادادان جەڭىپ العان ءوز مەدالى ىسپەتتەس. دەمەك, ايەلى ءۇشىن ءوزىنىڭ كۇيەۋىنەن ارتىق كىسى جوق بولۋعا ءتيىستى.
باسقا بىرەۋدىڭ كۇيەۋىن ماقتاپ, سونىمەن سالىستىرىپ, اۋزىنىڭ سۋى قۇرىپ وتىرعان كەلىنشەكتى ەر-ازاماتتار قابىلداي بەرمەيدى. بۇل ايەلدەردىڭ اراسىندا عانا بولا بەرەتىن باسەكە.
