ءحىح عاسىر كاسىبي مەديتسينانىڭ قوعامدىق ومىرگە باياۋ ەنىپ, اۋىق-اۋىق بوي كورسەتەتىن جۇقپالى اۋرۋلاردان تۇتاس اۋىلداردىڭ قىناداي قىرىلعان قيىن كەزەڭ بولعانى تاريحتان بەلگىلى. كاسىبي دارىگەرلەردىڭ جەتكىلىكسىزدىگىنەن اۋرۋ بەلگىلەرىن ءاۋ باستان ءدوپ باسىپ انىقتاۋ, ىندەت وشاقتارىن وقشاۋلاۋ جانە قاجەتتى ەم قولدانۋدىڭ بولماۋىنان ەپيدەميالار جەرىمىزدە كەڭ تاراعان-دى.
وسى ورايدا مىڭداعان ادامداردىڭ ءومىرىن قيىپ, حالقىمىزدىڭ وسىمىنە ايتارلىقتاي نۇسقان كەلتىرگەن وبا, شەشەك, تىرىسقاق جانە ت.ب ىندەتتەردىڭ ويرانى تۋرالى اقپاراتتاردى زامانا ايناسى كوركەم تۋىندىلاردان دا كەزىكتىرەمىز.
ءحىح عاسىردىڭ ەكىنشى جارتىسى حالىق اراسىندا از دا بولسا كاسىبي دارىگەرلەردىڭ جۇمىس ىستەي باستاۋى, دەنساۋلىق سالاسىنداعى اۋىر احۋالدىڭ ەداۋىر جاقسارا تۇسۋىنە وڭ ىقپالىن جاسادى. سول ءبىر قيىن كەزەڭدە سانى ات توبەلىندەي عانا بولىپ, سىرقات جاندارعا قارلىعاشتىڭ قاناتىمەن سۋ سەپكەنىندەي كومەك كورسەتكەن توپتىڭ اراسىنان تسەزاري تەراەۆيچ تە تابىلعان-دى.
حالقىمىزدا «جاقسىنىڭ جاقسىلىعىن ايت, نۇرى تاسىسىن» دەگەن ءسوز بار. وسى تۇرعىدا, تۇلعانىڭ قازاق جەرىندە اتقارعان كوپقىرلى قىزمەتىن بۇگىنگى بۋىنعا تانىستىرۋ, تاريح الدىنداعى, ار-وجدان الدىنداعى پارىزىمىز, مىندەتىمىز.
تسەزاري تەراەۆيچ (پولياكشا Cezary Terajewicz) قازاق حالقىمەن تاعدىرلاس پولياك ۇلتىنىڭ پەرزەنتى. ۇزاق عاسىرلار ورتالىق جانە شىعىس ەۋروپا ايماعىنداعى الەۋەتتى مەملەكەتتەر قاتارىندا بولعان رەچپوسپوليتانىڭ حVIII عاسىردىڭ سوڭعى شيرەگىندە السىرەپ, پولياك جەرلەرىنىڭ رەسەي, پرۋسسيا جانە اۋستريا سىندى الپاۋىت كورشىلەرىنىڭ ۋىسىندا كەتكەندىگى بەلگىلى. تەراەۆيچ تاريحي پولياك جەرلەرىنىڭ رەسەيلىك بولىگىندە, انىعىندا ۆيلەن گۋبەرنياسىندا 1833 جىلى دۇنيەگە كەلگەن. شىعۋ تەگى بويىنشا اقسۇيەك تەگىنەن (شلياحتا).
بولاشاق دارىگەر 1858-1863 جىلدارى ماسكەۋ ۋنيۆەرسيتەتىنىڭ مەديتسينا فاكۋلتەتىندە ءبىلىم الادى. ءوزى قالاعان ماماندىعىن وردا بۇزار وتىز جاسىندا ءتامامداپ, دارىگەر اتانعان تسەزاري ءومىرىنىڭ سول ءبىر ءساتى پولياك حالقىنىڭ ۇلت ازاتتىعى ءۇشىن جاپپاي قولعا قارۋ العان, 1863-1864 جىلدارداعى «قاڭتار كوتەرىلىسىنە» سايكەس كەلەدى. ەلىنىڭ ازاتتىعى جولىندا دارىگەر رەتىندە كوتەرىلىسشىلەر قاتارىنان تابىلعان تەراەۆيچتى دە وسى ءبىر وقيعانىڭ كەلەشەك سالدارى اينالىپ وتپەيدى.
كوتەرىلىس اياۋسىز باسىپ جانىشتالعاننان كەيىن جازالانعان مىڭداعان قانداستارىنىڭ قاتارىندا تسەزاري دە ءىستى بولىپ, يمپەرلىك بيلىكتىڭ شەشىمىمەن سىبىرگە, الدىمەن توبىل گۋبەرنياسىنىڭ تۋرينسك, سوڭىنان قازاق مەكەندەرىنە ىرگەلەس تارا قالاسىنا جەر اۋدارىلادى. ادام تاعدىرىندا استە كەزدەيسوقتىق بولماسا كەرەك. جاس ازاماتتىڭ وسىمەن قۇردىمعا كەتتى دەگەن قىزمەت جولى ەندىگى جەردە سوعان دەيىن وزىنە بەيمالىم وڭىرمەن بايلانىستى قالىپتاسادى.
بيلىك تاراپىنان سالىنعان تىيىمعا قاراماستان, تس.تەراەۆيچ وسى ءبىر شالعاي ەلدى مەكەندە ەم ىزدەگەن بارلىق سىرقات جاندارعا قولىنان كەلگەن كومەگىن اياماستان, كاسىبي مەديتسينالىق قىزمەت كورسەتە باستايدى.
تەراەۆيچتىڭ بىلىكتىلىگى مەن ادالدىعىن لايىقتى باعالاعان قالا تۇرعىندارى بيلىكتەن ونىڭ زاڭدى نەگىزدە مەديتسينالىق پراكتيكامەن اينالىسۋىنا رۇقسات بەرۋىن سۇراپ, پەتيتسيا تاپسىرادى. پەتيتسيا استىندا ونداعان ادامنىڭ قولى قويىلعان-دى. دارىگەرلەردىڭ جەتكىلىكسىزدىگىنەن بيلىك جەر اۋدارىلعان تسەزاريگە مەديتسينا سالاسىندا زاڭدى قىزمەت كورسەتۋگە رۇقساتىن بەرەدى.
تارادا دارىگەر تەراەۆيچتىڭ بەدەلى وتە جوعارى بولعاندىقتان ونى قالادا قالدىرۋ يمپەرلىك بيلىك تاراپىنان قاۋىپتى دەپ باعالانادى. ناتيجەسىندە «كوتەرىلىسشى دارىگەر» ءتيىستى ورگاندار تاراپىنان ۇدايى قاتاڭ باقىلاۋدا بولادى.
رەسەيدىڭ ەۋروپالىق بولىگىنەن شالعاي, كليماتى قاتال وسى ءبىر شاعىن قالاشىعىندا وتكىزگەن جىلدار تسەزاريدى ادامي تۇرعىدان ەم ىزدەگەن سىرقاتتاردىڭ, سونىمەن قاتار كومەككە مۇقتاج, تۇرمىسى تومەن جانداردىڭ مۇڭىن ۇعۋعا, ال كاسىبي تۇرعىدان جان-جاقتى تولىسا تۇسۋىنە سەپ بولادى.
1870 جىل تەراەۆيچ ءۇشىن جاقسى جاڭالىقتاردان باستالادى. ءوز «قىلمىسىنىڭ جازاسىن» وتەگەن دارىگەر اقمولا وبلىسىنىڭ ورتالىعى اقمولا قالاسىنا ۋەزدىك دارىگەر لاۋازىمىنا قىزمەتكە كەلەدى. ناتيجەسىندە سارىارقا جەرىندە توعىز جىلداي جۇمىس اتقارادى. ۋەزدىك دارىگەر بولا جۇرە جەرگىلىكتى قازاق حالقىنىڭ ومىرىمەن جەتە تانىسادى. وزىنە جۇكتەلگەن مىندەتتەردى ابىرويمەن اتقارىپ, ەلدىڭ العىسىنا بولەنەدى.
1879 جىل تسەزاري ومىرىندەگى ەرەكشە كەزەڭ ەدى. سول جىلى ۋەزدىك دارىگەر لاۋازىمىندا سەمەي قالاسىنا اۋىسقان تەراەۆيچ شاڭىراق كوتەرەدى. قىزمەتىنەن دەمالىس الىپ, تۋعان جەرىنە دە بارىپ قايتادى. ءوزىن ۇزاق جىلدار كورمەگەن تۋىستارىنىڭ ىقپالى ما, الدە وزگە سەبەپتەر تۇرتكى بولدى ما, ەلىنە جاقىن بولۋ ماقساتىندا تسەزاري وتباسىمەن رەسەيدىڭ ريازان گۋبەرنياسىنا قونىس اۋدارىپ, جەرگىلىكتى دارىگەر (ورىس.زەمسكي ۆراچ) رەتىندە قىزمەت اتقارادى. ءومىرىنىڭ كەلەسى ون جىلدىق كەزەڭىندە تۇرمىسى اۋىر قاتارداعى اۋىل دارىگەرى بولعان تەراەۆيچ بۇيرەك سىرقاتىنا شالدىعادى. دەگەنمەن دەرتىنە شيپا ىزدەگەن سىرقاتتارعا كومەك كورسەتۋىن ءبىر ساتكە دە دوعارمايدى. جانقيارلىق ەڭبەگى ارقىلى قاراپايىم حالىقتىڭ العىسىنا بولەنەدى. تۋعان جەرىنە جاقىن اۋماقتا قىزمەت ەتكەنىمەن, دارىگەردىڭ قازاق دالاسىنا اڭسارى اۋادى دا تۇرادى.
اقىرى, 1883 جىلى تەراەۆيچ وسكەمەن قالاسىنا قىزمەت اۋىستىرىپ, وندا ءوز عۇمىرىنىڭ سوڭعى كۇندەرىنە دەيىن ءومىر سۇرەدى. العاشقى جىلدارى قالالىق جانە ۋەزدىك دارىگەر رەتىندە جۇمىس ىستەسە, 1900 جىلدان وسكەمەن ۋەزى – 1-ۋچاسكەسىنىڭ دارىگەرى لاۋازىمىن اتقارادى. مالىمەت بويىنشا, 1898 جىلى دارىگەر تسەزاري تەراەۆيچ «شتاتتاعى كەڭەسشى» (ورىس. ستاتسكي سوۆەتنيك) ازاماتتىق شەنىندە بولعان.
تەراەۆيچ جۇمىس ىستەگەن جىلدارى وسكەمەن قالاسىنىڭ جۇيەلى دامۋى ءوز جالعاسىن تابادى. 1868 جىلدان ۋەزدىك قالا مارتەبەسىن العان شاھاردا اراعا ۋاقىت سالا ەرلەر ۋچيليششەسى, مارين ايەلدەر ۋچيليششەسى جانە بىرقاتار كاسىپكەرلىك نىساندارى سالىنادى.
پاتشا وكىمەتى كەزەڭىندە شىعىس قازاقستان وڭىرىندە ساياسي كوزقاراستارىنا بايلانىستى جەر اۋدارىلعان «حالىقشىلار» (ورىس. نارودنيچەستۆو, نارودوۆولتسى) مەن پولياكتار كوپتەپ سانالاتىن. ولاردىڭ اراسىندا دا ءتۇرلى ماماندىق يەلەرى كوپ ەدى. رۋحاني جانە ۇستانىم تۇرعىسىنان جاقىن بولعاندىقتان تسەزاري تەراەۆيچ وسكەمەندەگى العاشقى كەزدەن-اق اتالعان توپ وكىلدەرىمەن تىعىز بايلانىستا بولادى.
دارىگەر, ساياسي جەر اۋدارىلعاندار نەگىزگى بولىگىن قۇراعان جەرگىلىكتى زيالى قاۋىمنىڭ باستامالارىن قىزۋ قولداپ, جەرگىلىكتى مادەنيەت وشاقتارىنىڭ, الەۋمەتتىك نىسانداردىڭ نەگىزدەلۋىنە ىقپال ەتەدى. تەراەۆيچ اسىرەسە ساياسي ايداۋداعى تانىمال عالىم, ولكەتانۋشى, ابايدىڭ دوسى – ەۆگەني ميحاەليسپەن ەتەنە جاقىن ەدى. ءوز كەزەگىندە قوس تۇلعانىڭ ءبىر-بىرىنە دەگەن ەرەكشە قۇرمەتى, وتكىر ازىلدەرى سول كەزەڭدەگى وسكەمەندىك زيالى ورتالاردا كەڭ اڭگىمەلەنەتىن-ءدى.
1896 جىلى مۇشەلەرىنىڭ دەنى ساياسي جەر اۋدارىلعانداردان تۇرعان «حالىقتىق ءبىلىم بەرۋ جونىندەگى قامقورلىق قوعامىنىڭ» باستاماسىمەن وقىرمان زالى بار وسكەمەن كىتاپحاناسى اشىلادى. بۇل وسى كۇنگى ا.س.پۋشكين اتىنداعى شىعىس قازاقستان وبلىستىق كىتاپحاناسى.
ال دەنساۋلىق ساقتاۋ سالاسىنا كەلەر بولساق, وسكەمەننىڭ بەكىنىس بولعان كەزەڭىنەن اسكەري گوسپيتال جۇمىس ىستەگەنى بەلگىلى. بىراق ءحىح عاسىردىڭ 80 جىلدارىنا دەيىن ەلدى مەكەندە قالا تۇرعىندارىنا ارنالعان ەمدەۋ مەكەمەسى بولماعان ەدى. تيىسىنشە لازارەتتە تەك اسكەريلەر عانا ەمدەلگەن.
تاريحي مالىمەتتەردەن ءحىح عاسىردىڭ 70 جىلدارىنىڭ باسىنان قالادا تۇراقتى نەگىزدە 1 دارىگەر جانە 1 مەدبيكە (اكۋشەر قىزمەتىندە) جۇمىس ىستەگەنىن وقيمىز. الايدا, قالا تۇرعىندارىنا ارنالعان 7 ورىندىق العاشقى ەمدەۋ مەكەمەسى تەك 1884 جىلى اشىلادى. ال قالاداعى العاشقى ءدارىحانانى ساياسي جەر اۋدارىلعان ۆاسيلي ينكوۆ اشادى.
تسەزاري تەراەۆيچتىڭ ءومىرى مەن قىزمەتىنە ورالار بولساق, ول وسكەمەنگە اۋىسقان العاشقى كۇندەرىنەن-اق جاڭا قىزمەتىنە قۇلشىنا كىرىسەدى. دارىگەرلەردىڭ وتكىر تۇرعان جەتكىلىكسىزدىگى جاعدايىندا ۋەزد ورتالىعىنىڭ وزىندە دە, ودان تىس اۋماقتاردا دا جۇمىس اتقارادى.
تەراەۆيچتىڭ ۋەزد دارىگەرى لاۋازىمىنداعى جىلدارى ءوڭىردىڭ كاتونقاراعاي اۋىلىندا, اراعا ۋاقىت سالا وسكەمەن ۋەزىنىڭ 3-ۋچاسكەسىندە قازاق حالقىنان شىققان العاشقى كاسىبي دارىگەرلەردىڭ ءبىرى, توم يمپەراتورلىق ۋنيۆەرسيتەتىنىڭ تۇلەگى – امىرە ايتباكين قىزمەت ەتكەن بولاتىن. بۇل ەكى تۇلعانى ءوزارا جاقسى تانىس بولدى دەپ تولىق سەنىممەن ايتا الامىز. وعان نەگىز: بىرىنشىدەن, سول كەزەڭدە وڭىردە جوعارعى مەديتسينالىق وقۋ ورنىن بىتىرگەن دارىگەرلەر ساۋساقپەن سانارلىقتاي بولۋى, ەكىنشىدەن, ولاردىڭ ءبىر ۋەزدە جۇمىس ىستەۋى. قوس تۇلعانىڭ بايلانىستارى وزگە ءبىر ماقالانىڭ تاقىرىبى اتانۋعا ابدەن لايىقتى بولعاندىقتان دارىگەر تەراەۆيچكە قايتا ويىسار بولساق, شىعىس قازاقستانداعى ەڭبەك جولىندا تسەزاري ءوزىنىڭ ءساتتى جۇرگىزگەن ەم-دومىنىڭ, قاجىرلى ەڭبەگىنىڭ, ادالدىعى مەن ۇساق دەتالدارعا دەيىن ءمان بەرەتىن ۇقىپتىلىعى ارقىلى قاراپايىم حالىقتىڭ العىسىنا يە بولادى.
قارجى جەتىمسىزدىگىنە قاراماستان قالالىق ەمحانانىڭ مۇمكىندىكتەرىن ارتتىرۋعا ۇدايى كۇش سالادى. ءحىح ع. 90- جىلدارىنىڭ باسىندا بۇرىنعى سالىق ينسپەكتورى س.پۋزىرەۆ ءوز ءۇيىن ەمحانا فوندىنا تاپسىرىپ, ناتيجەسىندە, ەمدەۋ مەكەمەسى كەڭەيە تۇسەدى.
جوعارىدا كورسەتىلگەندەي ءحىح عاسىرداعى دارىگەرلەردىڭ باستى مىندەتتەرىنىڭ ءبىرى كەڭ تارالاتىن ەپيدەميالارمەن كۇرەس-ءتىن. ءسوز بولىپ وتىرعان جۇزجىلدىقتاعى قاۋىپتى ىندەتتەردىڭ ءبىرى تىرىسقاق اۋرۋى ەدى. قولدا بار رەسمي مالىمەتتەرگە قاراعاندا تىرىسقاقتىڭ قازاق دالاسىنا تارالۋى العاش 1829-1830 جىلدارى تىركەلگەن. حيۋادان كەلگەن ىندەت ورتالىق ازياعا پارسىدان ەنگەن بولاتىن. ناتيجەسىندە ىندەت شارپىعان قازاقتاردىڭ تۇتاس اۋىلدارى قىناداي قىرىلادى. اراعا ۋاقىت سالىپ 1848-1849 جىلدارى ەلدىڭ وڭتۇستىك اۋداندارىندا تىرىسقاق قايتا ءورىس الادى. جۇقپالى اۋرۋ 1871 جىلى دا بوي كورسەتكەن.
1891-1892 جىلدارى قازاقستاندا تىرىسقاقتىڭ كەزەكتى تارالىمى تىركەلگەن.
ءحىح عاسىردىڭ 90 جىلدارى قازاق جەرلەرى ءۇشىن قۇرعاقشىلىققا تولى بولادى. ناتيجەسىندە اقمولا, تورعاي, ورال, سەمەي, سىرداريا وبلىستارىندا استىق تامىرىنا دەيىن كۇيىپ كەتەدى. بۇل تۋرالى «سيبيرسكي ۆەستنيك» گازەتى ەرتىس بويىندا اشتىقتىڭ باستالعاندىعىن اتاپ ءوتىپ, «نەگىزگى تۇتىنىس تاۋارلارىنا باعانىڭ كوتەرىلگەندىگىن» مالىمدەگەن.
وڭىردە ورىن العان اۋىر جاعداي وسكەمەن ۋەزىن دە اينالىپ وتپەدى. ۋەزگە تىرىسقاق ىندەتىن دالالى ايماقتاردا بولعان كوپەستەر الا كەلەدى. جۇمىس شاش ەتەكتەن بولعانىمەن تۇتاس ۋەزگە نەبارى ەكى دارىگەر عانا قىزمەت كورسەتەتىن. ءوزىنىڭ الپىسقا تاياعان جاسىنا قاراماستان تەراەۆيچ بارلىق سىرقاتتاردى ارالاپ, قاجەتتى ەمىن جاساپ, پروفيلاكتيكالىق شارالاردى ەسكەرتىپ وتىردى. بىراق ءوزى ساقتانباستان سۇزەك اۋرۋىن جۇقتىرىپ, سونىڭ سالدارىن عۇمىرىنىڭ سوڭىنا دەيىن تارتادى. ءبىر سىرقات ەكىنشىسىنىڭ ۋشىعۋىنا سەبەپ بولادى. دارىگەردىڭ سىرقاتى اسىرەسە 1901 جىلدىڭ قىسىندا قاتتى اسقىنادى. ونىڭ دەنساۋلىعىنىڭ اۋىرلىعىن ۋەزد باسشىسىنىڭ: «جالپى ونىڭ جۋىق ارادا جازىلاتىندىعىنان ۇمىتتەنۋگە بولا ما, الدە ونىڭ سىرقاتى بەلگىسىز ۋاقىتقا سوزىلا ما؟ بۇل تۋرالى مالىمەت مەن تەراەۆيچكە كومەككە باعىتتاعان دارىگەر جيلينسكيدىڭ قىسقا ۋاقىتتا, جۇقپالى اۋرۋدىڭ پايدا بولۋىنا بايلانىستى قارقارالى قالاسىنا جول جۇرۋىنە بايلانىستى كەرەك» دەگەن مالىمەتىنەن اڭعارۋعا بولادى. سوڭىندا, ۇزاق جىلدار ايداۋدا بولعان, اعزاسى السىرەگەن تس.تەراەۆيچ 1901 جىلدىڭ 5 مامىرىندا وكپە سىرقاتىنىڭ اسقىنۋىنان دۇنيە سالادى.
بىلىكتى دارىگەر, ادال ءارى مەيىربان جان تس.تەراەۆيچتىڭ قازاسى تۇتاس شىعىس قازاقستان جۇرتشىلىعىنىڭ قابىرعاسىن قايىستىرادى. مارقۇمنىڭ وسيەتىنە سايكەس, ونىڭ جەرلەۋ ءراسىمى ازاماتتىق نەگىزدە اتقارىلىپ, وعان قالىڭ قالا جۇرتشىلىعى قاتىسادى. تسەزاري تەراەۆيچ سىندى سەرىگىنىڭ, پىكىرلەسىنىڭ قازاسى ەۆگەني ميحاەليسكە دە وتە اۋىر ءتيىپ, ول كوزكورگەندەردىڭ مالىمەتىنشە, قايعىدان ۇزاق ۋاقىت بويى ارىلا الماعان ەكەن.
دارىگەر تۋرالى زامانداستارىنىڭ پىكىرلەرى قۇندى. سولاردىڭ ءبىرى ب.گەراسيموۆ: «ول وتە جوعارى ءبىلىمدى ءارى عىلىمنان الىستاماعان, تاماشا دارىگەر ەدى...وتكىر ويلى جان ەدى....وسكەمەندەگى ورىس ساياسي جەر اۋدارىلعاندارى, جەرگىلىكتى زيالىلار تەراەۆيچكە ۇلكەن قۇرمەتپەن قارايتىن» دەلىنگەن مالىمەت قالدىرعان.
كەڭەستىك كەزەڭنىڭ زەرتتەۋشىسى گ.مەندرينا ءوز ەڭبەگىندە تس.تەراەۆيچ تۋرالى «ناتيجەلى ەمىمەن, قاجىرلى ەڭبەگىمەن, رياسىزدىعىمەن جانە ۇقىپتىلىعىمەن وزىنەن كەيىن جاقسى اتىن قالدىردى» دەگەن توقتامعا كەلەدى.
تس.تەراەۆيچ 1901 جىلعى 8 مامىر كۇنى قالالىق زيراتقا جەرلەنىپ, ونىڭ بەيىتى تاريحي ەسكەرتكىشكە اينالادى.
وتباسىنا كەلەر بولساق, تەراەۆيچ تەكتى اۋلەتتىڭ وكىلى بولعاندىقتان سول ءداستۇردى ۇستانىپ, ءوز پەرزەنتتەرىنە دە ساپالى ءبىلىم, سانالى تاربيە بەرگەن جان. ءتۇرلى دەرەك كوزدەرىنە سايكەس تەراەۆيچتەن ءبىر ۇل جانە ءبىر قىز تاراعان. جوعارى وقۋ ورنىندا وقىپ جۇرگەن ۇلى اكەسى دۇنيە سالعان جىلى تۋبەركۋلەزدەن قايتىس بولادى.
ال قىزى پەتەربۋرگ كونسەرۆاتورياسىندا ءبىلىم العان. دەرەك كوزدەرىنىڭ جۇتاڭدىعىنا بايلانىستى وتباسى مۇشەلەرىنىڭ ەسىمدەرىن انىقتاۋ مۇمكىن بولمادى. ءبىر انىعى, تەراەۆيچتىڭ قازاسىنان كەيىن ونىڭ جۇبايى مەن قىزى ۆيلەن گۋبەرنياسىنا قونىس اۋدارعان.
حالىق دانالىعى: «جاقسىنىڭ اتى, عالىمنىڭ حاتى ولمەيدى» دەيدى. وسى ورايدا بىلىكتى دارىگەر, قوعام قايراتكەرى, زامانىندا ەڭكەيگەن قارتتان ەڭبەكتەگەن بالانىڭ ومىرىنە دەيىن اراشا تۇسكەن ابزال جان تسەزاري تەراەۆيچتىڭ اتى ۇمىتىلماق ەمەس. دارىگەردىڭ قازاسىنان بەرى ارادا 120 جىلعا جۋىق ۋاقىت وتسە دە ونىڭ تۇلعاسىنا, قىزمەتىنە ارنالعان ماقالالاردىڭ اراگىدىك جارىق كورۋى ءسوزىمىزدىڭ دالەلى.
جاندوس اۋەلبەك ۇلى,
ارنايى «Egemen Qazaqstan» ءۇشىن
ۆارشاۆا (پولشا)
