قوجالىقتاردى كوپجىلدىق ەگىستىكپەن اينالىسۋعا ۇگىتتەپ, قولداۋ تانىتقان اۋداندىق كاسىپكەرلىك جانە اۋىلشارۋاشىلىق ءبولىمىنىڭ باسشىسى سەرگەي توقپانوۆتىڭ ايتۋىنشا, بۇل شوپتەر قۋاڭشىلىققا بەيىمدەلگەن وسىمدىكتەر قاتارىنا جاتادى. ورتاشا ەسەپپەن شىعىمدىلىعىنا قاراي ءار گەكتاردان 10-15 تسەنتنەر ءشوپ دايىنداۋعا مۇمكىندىك اشادى. بۇگىنگى تاڭدا تالدىاپان اۋىلىنان ءىرى مال بورداقىلاۋ كەشەنىن سالىپ جاتقان «ەت يندۋسترياسى» اگروحولدينگى سۋارمالى جەردەن كوپجىلدىق ەگىستىك ەگىپ, ءونىمىن دە جيناپ ۇلگەرگەن.
ء«جۇز رەت ەستىگەنشە, ءبىر رەت كور» دەمەكشى, ەگىستىك باسىندا بولىپ, ءادىلحاننىڭ جاڭا باستاماسىن كوزىمىزبەن كورىپ قايتتىق. ەگىستىكتە وكرۋگ اكىمى باتىرحان بايعوناقوۆپەن دە جولىمىز ءتۇيىستى.
– ءادىلحان ءىنىمىزدىڭ قولعا العان جۇمىسى ءبارىمىزدى قۋانتادى. وكرۋگتەگى اۋىلشارۋاشىلىق سالاسىنا جاڭا سەرپىلىس بەرۋدە. جاس شارۋانىڭ جاڭاشىل ءىسى باسقا دا قوجالىقتارعا ۇلگى بولسا ەكەن, – دەگەن ريزاشىلىعىن جاسىرمادى.
ىسكەر جىگىتتى اڭگىمەگە تارتتىق.
– اكەم باسقارعان شارۋاشىلىقتى 2017 جىلدان باستاپ ءوز قولىما الدىم. ءوزىمنىڭ نەگىزگى ماماندىعىم شەت ءتىلى ءپانىنىڭ مۇعالىمى. دەگەنمەن وسى ءبىر اتاكاسىپپەن اينالىسۋعا بەت بۇردىم. ناتيجەسى جامان ەمەس. اۋىلدان 7 شاقىرىم جەردە مال ۇستاپ وتىرعان قىستاعىمىز ورنالاسقان. بۇگىندە شارۋاشىلىعىمىزدا 50 ءىرى قارا, 50 جىلقى, 500 قوي بار. بۇقا مەن قوشقار ساتىپ الىپ, مال باسىن اسىلداندىرۋ باعدارلاماسىنا دا قاتىسىپ جاتىرمىز. اكەم ءادىلحاننىڭ ماماندىعى اگرونوم بولعاندىقتان كوپجىلدىق ءشوپ ەگۋ تۋرالى ءبىراز اقىلداسا كەلىپ, وسى جۇمىستى قولعا الدىق. نەگىزىنەن ەركەكشوپ ەگىلۋدە. سونىمەن بىرگە سۋدانكا, بوز ارپا بار. ەركەكشوپ تەحنولوگياسى بويىنشا كۇزدە ەگىلەدى. ول ءۇشىن جەردى جىرتۋدىڭ قاجەتى جوق. ءشوپ تۇقىمى 1 سم تەرەڭدىككە تۇسسە جاراپ جاتىر. قىستاي قالىڭ قاردىڭ استىندا جاتقان ءدان كوكتەم شىعا قاۋلاپ وسەدى. اۋا رايى قولايلى بولسا, ەركەكشوپ 10-15 جىل قاتارىنان ءونىمىن بەرەدى. ەگىستىككە قاجەتتى تۇقىمدى ءبورلى اۋدانىنداعى «اگروۆيك» جشس-نان ساتىپ الدىق. ارنايى لابوراتوريادان تەكسەرىلگەن تۇقىم 80 پايىزعا دەيىن شىعىمدىلىعىن بەرەدى دەگەن مەكەمەنىڭ كەپىلدىگى بار. ال سۋدانكا ءشوبىنىڭ تۇقىمىن سۋارمالى جەرگە كوكتەمدە ەگەتىن بولامىز. ەگىستىككە كەرەكتى تۇقىمدى ارتىعىمەن ساتىپ العاندىقتان, ەگىس كولەمىن ارتتىرامىز با دەگەن ماقسات بار. ول ءۇشىن ەگىستىك جەر كەرەك, – دەپ اعىنان جارىلدى ءادىلحان.
جاس تا بولسا باس بولعان ادىلحانعا ساتتىلىك تىلەپ, قوشتاستىق. ەندىگى كەزەكتە جاس شارۋانىڭ بەينەتتى ەڭبەگى كوپكە ۇلگى بولعاي.
قايرات جاقىپ,
باتىس قازاقستان وبلىسى,
قازتالوۆ اۋدانى
