باتىس قازاقستان وبلىسى پوليتسيا دەپارتامەنتىنىڭ باستىعى, پوليتسيا گەنەرال-مايورى ماحسۋدحان ءابىلازىموۆ قىزمەتتىك ىسساپارمەن ءبورلى اۋدانىنىڭ ورتالىعى اقساي قالاسىندا بولىپ, اۋداندىق پوليتسيا ءبولىمىنىڭ جاي-كۇيىمەن تانىستى. گەنەرالدىڭ مالىمدەۋىنشە, جاقىندا اۋداندىق پوليتسيا بولىمىندە قالا كوشەلەرىندەگى بەينەباقىلاۋ كامەرالارىن قاداعالاۋعا ارنالعان جەدەل-باسقارۋ ورتالىعى اشىلماق. بولىمدە ءتۇرلى ساۋالدارىمەن كەلگەن ازاماتتاردى قابىلداعان گەنەرال قاراشىعاناق كەن ورنىنداعى قاۋىپسىزدىك ماسەلەسىن دە تەكسەردى.
اقساي قالالىق مادەنيەت ۇيىندە وتكەن ەسەپتىك كەزدەسۋدە گەنەرال-مايور وبلىستاعى ىشكى ىستەر ورگاندارىنىڭ بيىلعى 8 ايدا اتقارعان جۇمىسى تۋرالى باياندادى.
دەپارتامەنت باستىعىنىڭ ايتۋىنشا, وڭىردە 8 اي ىشىندە جالپى تىركەلگەن قىلمىس سانى 11,2%-عا, ال قىلمىستىڭ دەڭگەيى 10 مىڭ تۇرعىنعا شاققاندا 146-عا دەيىن نەمەسە 20 پوزيتسياعا ازايعان. سونىمەن قاتار ورتاشا اۋىرلىقتاعى قىلمىس سانى دا 20,9% -عا كەمىگەن ەكەن.
– ءبىزدىڭ دەپارتامەنت رەسپۋبليكا كولەمىندە اۋىر جانە اسا اۋىر قىلمىستاردى اشۋ كورسەتكىشى بويىنشا 2-ورىندا, ال اۋىرلىعى ونشا ەمەس قىلمىس ءتۇرىنىڭ اشىلۋ كورسەتكىشى بويىنشا 1-ورىندا تۇر. بۇل جەتىستىككە وبلىس اكىمدىگىنىڭ جانە دەپۋتاتتار كورپۋسىنىڭ بەلسەندى ءارى جان-جاقتى قولداۋ كورسەتۋى ارقاسىندا قول جەتكىزدىك. ىشكى ىستەر ورگاندارىنىڭ ماتەريالدىق-تەحنيكالىق بازاسى جاقسارتىلىپ, زاماناۋي بايلانىس قۇرالدارى, بىرقاتار يننوۆاتسيالىق باعدارلامالار ساتىپ الىندى, قولدانىسقا ەنگىزىلدى. وبلىستاعى كريمينوگەندىك احۋالدى ساۋىقتىرۋ بويىنشا پوليتسيا بار كۇشىن سالىپ, ءوز مىندەتىن ودان ءارى جالعاستىراتىن بولادى, – دەدى پوليتسيا گەنەرال-مايورى.
ەسەپ بەرۋ بارىسىندا دەپارتامەنت باسشىسى وبلىستاعى ءتۇرلى قىلمىستار, ۇرلىق, قاراقشىلىق شابۋىل, ادام زورلاۋ فاكتىسى, كىسى ءولتىرۋ, جول-كولىك وقيعالارى, الاياقتىق, ەسىرتكىگە تاۋەلدىلىك فاكتىلەرى بويىنشا جەكە-جەكە توقتالىپ ءوتتى.
جيىن سوڭىندا قالا تۇرعىندارى جانە بىرقاتار پاتەر يەلەرى كووپەراتيۆىنىڭ باسشىلارى قالاداعى بۇزاقىلىق قىلمىستار, جولداعى قاۋىپسىزدىك ماسەلەلەرى بويىنشا سۇراقتار قويدى.
دەپارتامەنت باسشىسى قوعامدىق ءتارتىپ پەن قاۋىپسىزدىكتى قامتاماسىز ەتۋ, قازاقستان رەسپۋبليكاسى ازاماتتارىنىڭ ءومىرى مەن دەنساۋلىعىن قورعاۋ ىسىندە ىشكى ىستەر ورگاندارىنا قولداۋ كورسەتكەنى ءۇشىن ءبورلى اۋدانىنا قاراستى بىرقاتار اۋىل اكىمدەرىنە, «قاراشىعاناق پەترولەۋم وپەرەيتينگ ب.ۆ.», «ازيا گرۋپپ سەكيۋريتي» كومپانيالارىنىڭ قىزمەتكەرلەرىنە العىس حات تابىس ەتتى.
باتىس قازاقستان وبلىسى
