جولى بولماي جوسپارى بۇزىلسا, ومىرگە وكپە ايتاتىندار بار. اپاتقا ۇشىراپ امان قالسا دا اللاعا شۇكىر ايتىپ, جۇرەگى سوعىپ تۇرعانعا قۋاناتىندار قانشاما. جالعان ءومىردى جان-تانىمەن سۇيەتىن جاندار ءۇشىن كەز كەلگەن كەدەرگى قارسى تۇرا الماس قايعىمەن تەڭ. ال تىرشىلىكتىڭ ءمانىن تەرەڭ تۇسىنگەندەر ءۇشىن اۋا جۇتىپ, امان-ەسەن جەر باسىپ جۇرگەنىنە جەتەتىن نىعمەت جوق.
ءبىزدىڭ كەيىپكەرىمىز ءبىرجان دا سىناققا سىنباي, قيىندىققا قيىلىپ كەتپەيتىن قايراتتى جان. ونىڭ قايراتى اياعىنان ايرىلسا دا ايانباي ەڭبەك ەتىپ, اينالاسىنداعى مۇمكىندىگى شەكتەۋلى جاندارعا دا جۇمىس تاۋىپ بەرىپ, ولاردى تاباندىلىققا تاربيەلەپ, نامىسىنا قامشى باسۋىندا دەۋگە بولادى. ءبىرجان بۇگىنگى تاڭدا «عيبادات» جشس ديرەكتورى, «دەمەۋ» مۇگەدەكتەردى قولداۋ قوعامىنىڭ توراعاسى.
«بۇرىنعى جۇمىسىم جول ساقشىسى ەدى. سول قىزمەتتە جۇرگەندە ايازدا اياعىمدى ءۇسىتىپ الدىم. ول كەزدە جاسىم وتىزدان ەندى اسقان بولاتىن. دارىگەرلەر اياعىمدى كەسىپ, اۋرۋحانادان قول اربامەن ءبىر-اق شىقتىم. العاشقى جىلدارى اۋىر بولعانىن جاسىرمايمىن. كوپتەگەن دوسىم مەنەن تەرىس اينالىپ كەتتى. سول كەزدە ءوزىمدى دالەلدەگىم كەلدى», دەيدى ءبىرجان.
ءيا, باسىڭا ءىس تۇسكەندە باس ساۋعالاپ قاشاتىن جاندار از ەمەس. وسىنداي پەندەشىلىك پەيىلدەگى ادامداردىڭ قارىم-قاتىناسى ءبىرجاننىڭ نامىسىنا قامشى بولىپ, قايراتىن وياتىپ جەكە كاسىپ اشۋىنا جەتەلەگەن ەكەن. ول بۇگىنگى تاڭدا قازاقى ويۋلارمەن بەزەندىرىلگەن ساندىق, بەسىك جانە ءتۇرلى جيھازدار جاساۋمەن اينالىسادى. اينالىسىپ قانا قويماي وزگە جانداردى دا تۇراقتى جۇمىسپەن قامتاماسىز ەتىپ وتىر.
«قازىر مەن ءوزىمدى دالەلدەپ قانا قويماي, ون ەكى مۇشەسى ساۋ ادامعا دا, مۇمكىندىگى شەكتەۋلى جاندارعا دا جۇمىس تاۋىپ بەرىپ, ولاردىڭ ناپاقا تابۋىنا ءوز ۇلەسىمدى قوسۋدامىن. وسى دارەجەگە جەتكىزگەن نامىس پەن قايرات دەپ ويلايمىن. جالپى مەندە مۇنداي كاسىپ اشامىن دەگەن وي بولعان جوق. نەگىزگى جوسپارىم سال اۋرۋىمەن اۋىراتىن بالالارعا قيمىل-قوزعالىس اپپاراتىن جاساۋ ەدى. سول ارقىلى قوعامعا ءبىر پايدام تيگەنىن جانە سول قۇرىلعىنى العان بالالار دا باسقالار سياقتى ءجۇرىپ كەتسە ەكەن دەگەن ارمانىم بولدى. شىنىمەن دە قاراپ وتىرساق, سال اۋرۋىنا شالدىققان بالالاردى وڭالتۋ ورتالىعى ەلىمىزدىڭ ءىرى قالالارىندا عانا بار ەكەن. وسىنداي ورتالىقتار كىشىگىرىم قالالاردا دا بولسا دەپ ويلايسىڭ. ءبىزدىڭ ماقساتىمىز مەملەكەتتىڭ ءبىر جاعىنا شىعىسىپ, قولىمىزدان كەلگەنشە پايدامىزدى تيگىزۋ», دەيدى ءبىرجان قوجاقوۆ.
سوزىمىزگە دالەل بولسىن, ول ەلىمىز بويىنشا سال (دتسپ) اۋرۋىمەن اۋىرىپ, توسەك تارتىپ جاتقان سىرقات بالالارعا ارناپ ۆەرتيكاليزاتوردى تەگىن جاساپ بەرگەن. ساۋاپتى ىسكە ۇمتىلعان ازاماتتىڭ العان باعىتى ايرىقشا. ماقساتى – تابىس تاۋىپ قانا قويماي, اينالاسىنداعى جاندارعا جان-جىلۋىن توگۋ. سەگىز جىل عۇمىرىن مەملەكەتتىك قىزمەتكە ارناعان ونىڭ جەكە كاسىبىن جەتىلدىرىپ, جۇيەلى جۇرگىزىپ اكەتۋى – قاجىرلى قايراتى مەن ءوز-وزىنە دەگەن سەنىمىنىڭ ناتيجەسى بولسا كەرەك. «عيبادات» جاۋاپكەرشىلىگى شەكتەۋلى سەرىكتەستىگىن قۇرعان بۇگىنگى كەيىپكەرىمىز ساۋ ادامعا دا, سال ادامعا دا ۇلگى.
««عيبادات» جاۋاپكەرشىلىگى شەكتەۋلى سەرىكتەستىگى كەڭسەگە ارنالعان كورپۋستى جيھاز تۇرلەرىن, ۇيگە ارنالعان جيھازدار, وقۋ ورىندارى مەن مەكتەپ جاسىنا دەيىنگى بالالار مەكەمەلەرىنە ارنالعان جيھازداردى, سونىمەن قاتار بۇيىمداردىڭ جۇزدەن استام ءتۇرىن دايىندايدى. ونىڭ ىشىندە ۇلتتىق ناقىشتاعى جەر ۇستەلى, ساندىق, بەسىك سەكىلدى جيھازدار دا كىرەدى. شىعارىلاتىن ءونىمنىڭ تۇرلەرى ءاردايىم نارىقتىڭ جاڭا بەتالىسىنا سايكەس جاڭا بۇيىمدارمەن تولىقتىرىلىپ وتىرادى. جيھازداردىڭ كوپتۇرلىلىگى مەن الۋان تۇستىلىگى تالعامپاز تاپسىرىس بەرۋشىلەردىڭ كوڭىلىنەن شىعۋدا. ءاربىر تاپسىرىس بەرۋشىنىڭ بابىن تابۋدىڭ ناتيجەسىندە ەرەكشە ارلەنگەن باعاسى مەن ساپاسى قولايلى جيھازدار دايىنداپ وتىرادى. بارشا ءونىم شەتەلدىك جابدىقتاردىڭ كومەگىمەن جاسالادى. جيھازدىڭ ساپالى بولۋى بىلىكتى ماماندار جانە قىزمەتكەرلەر ەڭبەگىمەن ءوندىرىستى باسقارۋ جۇيەسىنىڭ جوعارى دارەجەدەگى ۇيىمداستىرىلۋىنا بايلانىستى. جيھازدار قازاقستاننىڭ كەز كەلگەن بولىگىنە EMS kazpost پوشتا قىزمەتى ارقىلى جونەلتىلەدى. كاسىپورىن مەملەكەتتىك ساتىپ الۋ پورتالىنىڭ تاپسىرىستارىنا بەلسەنە ارالاسىپ, ادال جابدىقتاۋشى رەتىندە تانىلىپ وتىر. «عيبادات» جاۋاپكەرشىلىگى شەكتەۋلى سەرىكتەستىگىنىڭ ۇستانىمى ساپالى, جايلى جيھازدى تومەن جانە باسەكەلى باعالارمەن ۇسىنا وتىرىپ, قاراپايىم ادامداردىڭ كۇندەلىكتى ءومىرىن جاقسارتۋ. سوندىقتان «عيبادات» جاۋاپكەرشىلىگى شەكتەۋلى سەرىكتەستىگى ءوز تۇتىنۋشىلارىنىڭ سەنىمى مەن قۇرمەتىن باعالايدى جانە ءوزارا ءتيىمدى ىنتىماقتاستىقتا جۇمىس ىستەۋگە ارقاشان دايىن», دەيدى كەيىپكەرىمىز.
ەسكە سالا كەتسەك, 2017 جىلى ءبىرجان قوجاقوۆ «مۇگەدەك جاندارعا كورسەتكەن قامقورلىعى ءۇشىن» اتالىمى بويىنشا «التىن جۇرەك» ۇلتتىق قوعامدىق سىيلىعىنىڭ يەگەرى اتانىپ, بيىل ەلباسىنىڭ العىس حاتىمەن ماراپاتتالدى. ارينە ماشاقاتتىڭ ماراپاتىن كورگەنگە ەشتەڭە جەتپەيدى. قولىنان كەلەتىن كومەكتى ايامايتىن ابزال ازاماتتىڭ ىزگىلىككە تولى ءىسى كىمدى بولسىن سۇيسىندىرمەي قويماسى انىق.
