رۋحانيات • 02 قازان، 2019

ۇلتتىق يادرولىق ورتالىقتىڭ تۇڭعىش باس ديرەكتورى عادىلەت باتىربەكوۆكە مەموريالدىق تاقتا اشىلدى

107 رەت كورسەتىلدى

كۋرچاتوۆ قالاسىندا كورنەكتى قازاقستاندىق عالىم، تەحنيكا عىلىمدارىنىڭ دوكتورى، پروفەسسور، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، قر ۇلتتىق يادرولىق ورتالىعىنىڭ تۇڭعىش باس ديرەكتورى عادىلەت ءانديان ۇلى باتىربەكوۆكە ارنالعان مەموريالدىق تاقتانىڭ سالتاناتتى اشىلۋى ءوتتى. اشىلۋ قازاقستان رەسپۋبليكاسىنىڭ اتوم سالاسى قىزمەتكەرلەرىنىڭ كۇنى قارساڭىندا ۇيىمداستىرىلدى.

 - عادىلەت ءانديان ۇلى باتىربەكوۆ ءبىزدىڭ مەملەكەتىمىزدىڭ تاريحىندا ۇمىتىلماس ءىز قالدىردى. ءوز ءىسىنىڭ ناعىز شەبەرى بۇكىل ءومىرىن وتاندىق عىلىمدى دامىتۋعا، يادرولىق رەاكتورلار فيزيكاسى مەن اتوم ەنەرگەتيكاسىنىڭ وزەكتى ماسەلەلەرىن شەشۋگە ارنادى. عادىلەت ءانديان ۇلىنىڭ ومىرىندەگى ەرەكشە كەزەڭ ونىڭ قازاقستان رەسپۋبليكاسى ۇلتتىق يادرولىق ورتالىعىنىڭ قالىپتاسۋى مەن دامۋىنا قوسقان ۇلەسى بولدى،- دەدى قر ۇياو قوعاممەن بايلانىس ءبولىمىنىڭ باستىعى اينۇر احمەتوۆا.

بۇگىندە اكەسىنىڭ جولىن قۋىپ، ەلباسىنىڭ باستاماسىمەن قولعا الىنعان ۇلتتىق يادرولىق ورتالىقتى باسقارىپ وتىرعان باس ديرەكتور ەرلان باتىربەكوۆتىڭ ايتۋىنشا، اكەسى عادىلەت باتىربەكوۆا ەلىمىز تاۋەلسىزدىك الار تۇستاعى 1990-جىلداردىڭ باسىنداعى اۋىر ساياسي جانە ەكونوميكالىق جاعدايلارعا قاراماستان سەمەي سىناق پوليگونىندا بۇرىنعى كسرو-نىڭ اسكەري-ونەركاسىپتىك كەشەنىنىڭ عىلىمي-تەحنيكالىق الەۋەتىن ساقتاپ، قر ۇياو-نىڭ جۇمىسقا قابىلەتتى قۇرىلىمىن قۇرا العان.

وسىلايشا، قازاقستاننىڭ سالالىق عىلىمي كاسىپورىندارىنىڭ عىلىمي-تەحنيكالىق الەۋەتىن بىرىكتىرۋ ناتيجەسىندە اتوم ەنەرگياسىن بەيبىت ماقساتتا پايدالانۋ سالاسىندا بىرىڭعاي عىلىمي-تەحنيكالىق ساياساتتى جۇرگىزۋ ءۇشىن قاجەتتى جاعدايلار جاسالدى. قازاقستان اتومدى سوعىس قۇرالى ەمەس، بەيبىت ماقساتتا پايدالاناتىندىعىن دالەلدەگەن.

ايتا كەتۋ كەرەك، قر ۇياو اتوم ەنەرگەتيكاسى، رادياتسيالىق ەكولوگيا جانە الەمنىڭ قولدانىستاعى پوليگوندارىنداعى يادرولىق قارۋ سىناقتارىن باقىلاۋ سالاسىندا كوپتەگەن ەلدەرمەن ىنتىماقتاستىق ورتالىعىنا اينالدى. عادىلەت ءانديان ۇلىنىڭ باسشىلىعىمەن العاشقى «قازاقستاندا اتوم ەنەرگەتيكاسىن دامىتۋ» رەسپۋبليكالىق نىسانالى عىلىمي-تەحنيكالىق باعدارلاماسى قۇرىلدى، سەمەي جانە باسقا دا يادرولىق پوليگونداردىڭ راديوەكولوگيالىق جاعدايىن زەردەلەۋ، ەنەرگەتيكالىق يادرولىق رەاكتورلاردىڭ قاۋىپسىزدىگىن زەرتتەۋ، الەم پوليگوندارىنداعى يادرولىق قارۋ سىناقتارىن باقىلاۋ بويىنشا سەيسميكالىق ستانتسيالار جەلىسىن قايتا جابدىقتاۋ جانە دامىتۋ بويىنشا جۇمىستار جۇرگىزىلىپ، قۇندى ناتيجەلەر قول جەتكىزىلدى جانە باسقا دا كوپتەگەن جۇمىستار اتقارىلدى.

مەموريالدىق تاقتا بۇرىن قر ۇلتتىق يادرولىق ورتالىعىنىڭ العاشقى كەڭسەسى ورنالاسقان تاۋەلسىزدىك كوشەسىندەگى عيماراتتىڭ قاسبەتىنە ورناتىلدى. جيىنعا قر ۇلتتىق يادرولىق ورتالىعىنىڭ بارلىق ماماندارى، عالىمدارى قاتىستى.

 

كۋرچاتوۆ

شقو

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار