تۇساۋكەسەر كەزدەسۋىندە جەرلەسىمىز رەسەيلىك اننا بلينكوۆانى 6:0, 6:1 ەسەبىمەن ويسىراتا ۇتقان ەدى. ەكىنشى كەزەڭدە ونىڭ جولى ەشلي بارتيمەن قيىستى. 23 جاستاعى اۋستراليالىق تەننيسشى قازىرگى كەزدە الەمدىك رەيتينگتە كوش باستاپ تۇر. وسى كۇنگە دەيىن WTA تۋرنيرلەرىندە 16 مارتە توپ جارعان ول بيىل «رولان گارروس» دوداسىنىڭ جەڭىمپازى اتاندى. سونىمەن قاتار اۋستراليانىڭ اشىق بىرىنشىلىگىندە شيرەك فينالعا دەيىن جەتتى. مىنە, ءبىزدىڭ يۋليا پۋتينتسەۆاعا وسىنداي مىقتىمەن بەيجىڭدەگى جارىستىڭ ەكىنشى اينالىمىندا كەزدەسۋگە تۋرا كەلدى. 1 ساعات 17 مينۋتقا سوزىلعان بۇل باسەكە 6:4, 6:2 ەسەبىمەن ءبارتيدىڭ پايداسىنا شەشىلدى.
