يگىلىگى مول شارانىڭ قاتىسۋشىلارى فورسايت-الاڭدا مەتسەناتتار مەن ينۆەستورلاردىڭ ساراپتاماسى مەن قولداۋىن قاجەت ەتەتىن وزەكتى «Start-up» جوبالاردىڭ تۇساۋىن كەسىپ, جۇمىستارىمەن تانىستىردى. دوستىق ءۇيىنىڭ اتريۋم زالىندا قولونەرشىلەردىڭ, جاس ستارتاپشىلاردىڭ ونىمدەر كورمەسى ۇيىمداستىرىلدى.
شاراعا «اتامەكەن» كاسىپكەرلەر پالاتاسىنىڭ وكىلى اسەل اتاباەۆا, «Natige» جانە «220 VOLT» كومپانياسىنىڭ قۇرىلتايشىسى ەرلان ءاشىم, ازاماتتىق باستامالار ورتالىعىنىڭ باسشىسى ناتاليا كراسنيكوۆا, «رۋحاني جاڭعىرۋ» كەڭسەسىنىڭ مەنەدجەرى, «Pixel»جوبالاۋ ستۋدياسىنىڭ جەتەكشىسى اباي وتارباەۆ قاتىسىپ, بيزنەستى اشۋ جانە ونى دامىتۋ تاجىريبەسىمەن ءبولىستى, كاسىپكەرلىك سالاسىنداعى مەملەكەتتىك قولداۋ شارالارى جانە جاستار ساياساتى تۋرالى ايتىپ بەردى. سونداي-اق جالىندى جاستاردىڭ جاڭا جوباسىنا قولداۋ كورسەتتى. ءىس-شارا «جاڭعىرۋ جولى» رجق ايماقتىق شتابىنىڭ وكىلدەرى, ەتنومادەني بىرلەستىكتەر, ستۋدەنتتەر, وقۋشىلار, كاسىپكەرلەر جانە قاراعاندى وبلىسىنىڭ بەلسەندى جاستارى ءۇشىن ارنايى وتكىزىلگەن بولاتىن. شارادا ءاربىر قاتىسۋشى حالىقتى جاڭا جوباسىمەن تانىستىرىپ, العا قويعان ماقساتتارىمەن ءبولىستى. ءاربىر قاتىسۋشىعا جوبا بويىنشا سۇراقتار قويىلىپ, كاسىپتەرىنىڭ ءساتتى جانە كەم تۇستارىنا نازار اۋدارىلدى.
ايتا كەتەيىك, جوباعا 18-29 جاس ارالىعىنداعى جاستار قاتىسقان بولاتىن. يدەيالارىن الەۋمەتتىك جوبا رەتىندە ۇسىنعان 3 مىڭعا جۋىق اۆتورعا گرانت ۇتىپ الۋ مۇمكىندىگى بەرىلدى. مەملەكەتتىك گرانتتى ۇتىپ الىپ, بۇگىندە ءوز كاسىبىن العا سۇيرەپ جۇرگەندەردىڭ ءبىرى ايىم يتباەۆا. ايىم ارنايى قۇرىلعىنىڭ كومەگىمەن قۇس جۇمىرتقالارىن باقىلاي وتىرىپ, بالاپانداردىڭ ءوسىپ-جەتىلۋىنە جاعداي جاسايدى. «قۇس شارۋاشىلىعىمەن اينالىسۋ اۋىلدىق مەكەندەرگە وتە ىڭعايلى كاسىپ. گرانتتىڭ ارقاسىندا ءبىز ارنايى قۇرىلعى ساتىپ الدىق. ەندىگى كەزەكتە 300-گە جۋىق قۇسقا قولايلى ورتا جاساپ, جەم-سۋىمەن قامتاماسىز ەتىپ وتىرمىز. بولاشاقتا بۇل كاسىپتى ءارى قاراي دوڭگەلەتىپ ۇلكەيتكىمىز كەلەدى», دەيدى جاس كاسىپكەر.
بارلىق قاتىسۋشىلاردىڭ اسا دايىندىقپەن كەلگەنى بىردەن بايقالدى. ولار ءوز جوسپارلارىمەن بەينەروليك ارقىلى ءبولىسىپ, تانىستىردى. سونداي-اق وزدەرىن ەلىمىزدىڭ بەلگىلى كاسىپكەرلەرى دە قولدايدى دەپ سەنەدى. سەمينار سوڭىندا ۇزدىك ستارتاپ-جوبالار جاريالانىپ, بارلىق قاتىسۋشىلارعا سەرتيفيكاتتار تاراتىلدى. بيىل جاستار جىلى بولعاندىقتان, ەلىمىزدە جاستار كاسىپكەرلىگىن دامىتۋعا ارنالعان جوبالار كەڭىنەن قولعا الىنۋدا. سوندىقتان دا بۇل جوبا جاستارىمىزعا ءوز يدەيالارىن كوپشىلىك الدىندا تانىستىرا وتىرىپ, كەشەندى قولداۋ تابۋىنا زور ۇلەس قوسادى. وسىنداي جوبالار جىل سايىن ءوز جالعاسىن تاۋىپ, تىڭ جوبالارمەن تولىعاتىن بولادى. ايتا كەتەيىك, جىل باسىنان بەرى قاراعاندى وڭىرىندە وبلىستىق اسسامبلەيانىڭ ۇيىمداستىرۋىمەن ەكى مارتە «سارىارقا جاستارى» فورۋمى وتكەن بولاتىن. وندا جاستار وزدەرىنىڭ الەۋمەتتىك جوبالارىن ۇسىنىپ, ىرىكتەلگەن ۇزدىكتەرى اتالعان شارادا تانىستىرىلدى.
«ەگەمەن-اقپارات»
