2019 جىلعى قىركۇيەكتىڭ سوڭىندا «قازاتومونەركاسىپ» اق IPO-عا 3,8% جاھاندىق دەپوزيتاري قولحاتتارىن قوسىمشا ورنالاستىرعان. سونىڭ ىشىندە 1,86%-ى لوندون قور بيرجاسىنا, 1,94%-ى «استانا» حالىقارالىق قور بيرجاسىنا شىعارىلدى. سونىڭ ىشىندە لوندون قور بيرجاسىنان 62,9 ملن دوللار تۇسسە, «استانا» بيرجاسىنان 65,2 ملن دوللار تۇسكەن.
«جالپى, 9 ملن 963 مىڭ جاھاندىق دەپوزيتاري قولحاتتارىن 13 دوللاردان شىعارۋدى كوزدەگەن ەدىك. بۇل 2018 جىلداعى IPO كەزىندەگى العاشقى بەكىتكەن باعادان 11%-عا قىمبات. ناتيجەسىندە 128 ملن 219 مىڭ دوللار تاپتىق. بۇل قاراجاتتىڭ ءبارى ۇلتتىق قورعا سالىنادى», دەدى الماسادام ساتقاليەۆ.
اتقارۋشى ديرەكتوردىڭ ايتۋىنشا, اكتسيا باعاسى نارىقتاعى قۇنىنا ساي بولدى. اكتسيانى جەدەل ساتۋ كەزىندە ينۆەستورلارعا بەلگىلى ءبىر دەڭگەيدە جەڭىلدىكتەر بەرىلەتىنى بەلگىلى. قور وكىلدەرىنىڭ پىكىرىنشە, 13 دوللار – ءادىل باعا. اكتسيا ساۋداعا شىققاننان كەيىن باعانىڭ 12,9-13,2 دوللار ارالىعىندا تەربەلۋى وسىنى كورسەتەدى.
ەستەرىڭىزگە سالا كەتەيىك, ۇكىمەتتىڭ جەكەشەلەندىرۋ ناۋقانىنا ساي, «قازاتومونەركاسىپ» كومپانياسى اكتسياسىنىڭ 25 پايىزىن بيرجاعا شىعارۋ جوسپارلانعان ەدى. قازىرگى تاڭدا 15 پايىز اكتسيا ساتىلىمعا ءتۇستى. 3,8 پايىزى ABB ادىسىمەن نارىققا شىعارىلدى. قالعانى الداعى ۋاقىتتا ساۋدالانباق.
اتقارۋشى ديرەكتوردىڭ ايتۋىنشا, كومپانيادان ۇلەس الۋعا ينستيتۋتسيونالدى ينۆەستورلارمەن قاتار جەكەلەگەن ساۋداگەرلەر دە قىزىعۋشىلىق تانىتىپ وتىر. جالپى, بۇگىنگە دەيىن كومپانيا اكتسيالارىن ساتىپ العانداردىڭ اراسىندا قازاقستاندىق ينۆەستورلار دا بار. «ماسەلەن, جاھاندىق دەپوزيتاريلەردىڭ 6,5 ملن داناسىن شەتەلدىك ينۆەستورلار ساتىپ السا, 3,3 ملن داناسىن وتاندىق ينۆەستورلار ساتىپ العان.
جالپى, ينستيتۋتسيونالدى ينۆەستورلاردىڭ 20-سى وتاندىق ۇيىمدار. شەتەلدىك ينۆەستورلاردىڭ قاتارىندا BlackRock, Morgan Stanley, Wellington سەكىلدى ينۆەستيتسيالىق قورلار مەن حەدج قورلار بار. سينگاپۋر ۇكىمەتى دە وتاندىق كومپانيادان ۇلەس العان ەكەن. شەتەلدىك ينۆەستورلاردىڭ ۇزىن سانى قازىرگى تاڭدا 40-قا جەتتى. ولار نەگىزىنەن اقش, كانادا سەكىلدى الپاۋىت ەلدەرگە تيەسىلى. بۇل جاھاندىق نارىقتىڭ قازاقستان ەكونوميكاسىنا ۇلكەن سەنىممەن قارايتىنىن كورسەتەدى», دەدى ا.ساتقاليەۆ.
