قارتتار ۇشتاعان اۋىلىنداعى «ارداگەرلەر ۇيىنە» قوناققا شاقىرىلىپ, مەكتەپ وقۋشىلارى جانە مادەنيەت ءۇيى قىزمەتكەرلەرى دايىنداعان سازدى باعدارلامانى تاماشالادى. مەرەكە اياسىندا قارتتاردى وكرۋگ اكىمى ج.مولداشەۆا قۇتتىقتاپ, اۋىلداعى دارىگەرلىك امبۋلاتوريا قىزمەتكەرلەرى دەنساۋلىق اكتسياسىن وتكىزىپ, قاريالاردىڭ قان قىسىمىن ولشەۋمەن اينالىستى. اقتوبە اۋىلدىق وكرۋگى اكىمدىگى اتىنان مەرەكەگە وراي «ارداگەرلەر ۇيىنە» تەلەديدار سىيعا تارتىلدى. سونداي-اق, ارداگەرلەر اراسىندا باتا بەرۋ , شاحمات, دويبى, توعىزقۇمالاق ويىندارىنان سايىستار ۇيىمداستىرىلىپ, ويىن قورىتىندىسىمەن جەڭىمپازدار ماراپاتتالدى. شارا سوڭىندا مەرەكەلىك داستارحان جايىلىپ, بارلىعى داستارحاننان ءدام تاتتى.
- قارتتار قاشاندا ءبىزدىڭ نازارىمىزدا. «اۋىلىڭدا قارتىڭ بولسا, جازۋلى تۇرعان حاتپەن تەڭ» دەمەكشى, اۋىلدىڭ ەسكى تاريحىن اڭگىمەلەپ, جاستاردى ەلدى, وتاندى سۇيۋگە تاربيەلەپ وتىراتىن اعا بۋىن وكىلدەرىن اۋىلدا وتەتىن شارالاردان تىس قالدىرمايمىز. بيىلعى قۇربان ايت مەرەكەسىن ۇشتاعاندىق ازاماتتار ناۋرىز توي سىندى كەڭ كولەمدە وتكىزىپ, ەل-جۇرتتىڭ ىقىلاسىنا بولەنگەن ەدى. وسى ايت مەيرامىندا دا اعالارىمىز ارامىزدان تابىلىپ, ءتورىمىزدى تولتىرىپ وتىردى. اۋىل تاريحىن اڭگىمەلەپ, قاقپان قۇرۋ, اڭشىلىق, وزگە دە ۇلتتىق ءداستۇر, كاسىپ تۋرالى بىلگەندەرىن ورتاعا سالدى. اق جاۋلىقتى انالار مەن كەلىندەر ءجۇن ساباپ, بالالار قازاقشا كۇرەسىپ وزگەشە ورنەكتە وتكىزگەن بولاتىن. اۋلىمىزدىڭ تىرەگىنە اينالعان ارداگەرلەرىمىزدى, قارتتارىمىزدى بۇگىنگى مەرەكەلەرىندە قۋانتۋ – ءوزىمىز ءۇشىن قۋانىش, دەيدى اقتوبە اۋىلدىق وكرۋگىنىڭ اكىمى ءجانبيبى تۇراربەكقىزى.
ماڭعىستاۋداعى «ۇلگىلى اۋىل» اتانىپ, ءارتۇرلى سايسىتاردا وبلىستىق بايقاۋلاردا توپ جارىپ, رەسپۋبليكالىق بايقاۋلاردا ماقتالىپ جۇرگەن ۇشتاعان ءوز ۇيىمشىلدىعىن وسىلايشا تاعى ءبىر كورسەتتى. جۋىردا رەسپۋبليكالىق «مەرەيلى وتباسى» بايقاۋىندا ۇشتاعاندىق نۇرسەبەپوۆتەر وتباسى ماڭعىستاۋ نامىسىن قورعاعان بولسا, قازىرگى تاڭدا اۋىلدا «استانا» ارناسىنىڭ ءتۇسىرىلىم توبى ءوز باعدارلامالارىنا ساي جۇمىس جۇرگىزۋدە.
ماڭعىستاۋ وبلىسى
