ءسال عانا تىنىشتىق ورناعان. كەنەت ورتا تۇس قاسقىر كورگەن قويداي ءدۇر ەتە قالدى. دارىلداي كۇلگەن اۋلەكى توپ قايدا وتىرعانىن قاپەلىمدە قاپەرىنەن شىعارعان سياقتى. وزدەرى سابىر ساقتاپ, تىنىشتالار دەگەنبىز. بولمادى. بەيتاراپ اڭگىمەگە تاعى ەكى-ءۇش داستارقان قوسىلدى. قۇتتى جانازادا ەمەس, تويدا وتىرعانداي توقمەيىل, قاعاناعى قارىق, ساعاناعى سارىق. جاعا جايلاۋعا كەتكەن. سودان سوڭ امالسىز ورنىمىزدان تۇرىپ بۇگىنگى جيىننىڭ قارالى جيىن ەكەندىگىن, قايعىدان قابىرعاسى قاۋساپ وتىرعان ەت جاقىن تۋىستارىنىڭ كوڭىلىنە قاراۋ, ءالى توپىراعى سۋىي قويماعان ارىسىمىزدىڭ ارۋاعىن سىيلاۋ قاجەتتىگىن ايتقان بولدىق. بىراق قۇلاق اسار كىسى كورىنبەيدى. بىرىنەن سوڭ ءبىرى بۇل جيىنعا قاتىسى جوق الدەبىر قىزىقتى اڭگىمەنىڭ كورىگىن قايتا-قايتا قىزدىرىپ, ءتامام جۇرتتىڭ نازارىن ەرسى قىلىقتارىمەن وزدەرىنە اۋدارىپ وتىر.
قازىرگى كۇنى باسقا جەردى قايدام, كوكشەتاۋ وڭىرىندە جانازاعا كوپ كىسى جينالادى. جاستارى جەر ورتاسىنان اسقان ۇلكەندەر تۇرماق, جاستاردىڭ قاراسى كوپ. بالالاردىڭ سىنىپتاستارى, ەڭبەك ۇجىمى, جورا-جولداس پەن كوزتانىس. بۇدان ون-ون بەس جىل بۇرىن ءدال مۇنداي ادام جينالمايتىن. بالكىم سوڭعى ساپارعا شىعارىپ سالۋشىلاردىڭ قاراسى كوپ بولعانى دا دۇرىس شىعار. بىراق ىزەت ساقتاپ, شىن مانىندە جانى اۋىرعان بولسا. ايتپەسە «باسى اۋىرماعاننىڭ قۇدايمەن ءىسى جوق» دەگەندەي, قايعىعا كۇلكى ارالاسسا قانىڭ باسىڭا شابادى ەكەن. وسى ارادا كوكشەتاۋ قالالىق ارداگەرلەر كەڭەسىنىڭ توراعاسى شياپ قاجى اليەۆتىڭ ايتقان ۇسىنىسى ورىندى ما دەپ ويلايمىز.
– بۇگىنگىدەي زاماندا مىڭداعان ادامعا اس بەرۋدىڭ قانشالىقتى قاجەتى بار؟ – دەيدى ول, – ماسەلەن, ەگەر ءمايىتتى وسى وبلىس ورتالىعىندا جەرلەسەك, قالانىڭ حالقى تۇسكى اسىن ءوز ۇيلەرىنە بارىپ ىشپەي مە؟ الىستان ات ارىتىپ جەتكەن اعايىنعا, قۇدا-قۇداعيعا قوناقاسى بەرسە جەتكىلىكتى عوي. ماسەلەن, جاسىراتىن ەشتەڭەسى جوق, بەس مىڭ تەڭگەمەن باتا جاسايمىز دا, الگى قارالى ءۇيدىڭ داستارقانىنا قايتقان كۇنگى جانازاعا, ۇشىنە, جەتىسىنە, قىرقى, جىلدىق اسى دەگەن ءتارىزدى بەس رەت بارامىز. ونىڭ ۇستىنە اپتا سايىن بەرىلەتىن جۇمالىقتارى بار. سوندا ءبىزدىڭ جاساعان باتامىزدان نە قايىر؟!
راس-اۋ ءتىپتى...
اقمولا وبلىسى
