سەنات توراعاسى تۇڭعىش پرەزيدەنت – ەلباسى نۇرسۇلتان نازارباەۆتىڭ ستراتەگياسى, قازاقستاننىڭ پرەزيدەنتى قاسىم-جومارت توقاەۆتىڭ سايلاۋ الدى باعدارلاماسى, قازاقستان حالقىنا جولداۋى بارشا قوعام مەن مەملەكەتتىك بيلىك ورگاندارىنا اۋقىمدى جانە كۇردەلى مىندەتتەردى قويىپ وتىرعانىن اتاپ ءوتتى.
«بۇل قايتا جاڭارۋلاردىڭ بارىسىندا رەسپۋبليكا پارلامەنتى مەن وڭىرلىك ءماسليحاتتاردىڭ رولىنە ەرەكشە باسىمدىق بەرىلىپ وتىر. پرەزيدەنت ق.توقاەۆ: ء«بىزدىڭ مەملەكەتتىك بيلىكتىڭ فورمۋلاسى: مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت» دەپ اتاپ كورسەتتى». سوندىقتان قازاقستان رەسپۋبليكاسى پارلامەنتىنىڭ سەناتىن نىعايتۋ, ونىڭ قىزمەتىن جاڭا مازمۇنمەن تولىقتىرۋ, سەنات پەن ونىڭ دەپۋتاتتارىنىڭ قوعامدىق جانە الەۋمەتتىك-ساياسي پروتسەستەردە جوعارى دەڭگەيدە بەلسەندىلىك تانىتۋى – ءبىزدىڭ تىكەلەي مىندەتىمىز», - دەدى د.نازارباەۆا.
سەنات باسشىسى كونستيتۋتسياعا سايكەس پارلامەنتتىڭ جوعارعى پالاتاسىنا ەلەۋلى دارەجەدە وكىلەتتىك بەرىلگەنىن اتاپ ءوتتى.
«سەنات – نەگىزگى كادرلىق تاعايىنداۋلارعا تۇرتكى بولاتىن ينستيتۋت. ەلىمىزدىڭ بيۋدجەتىن قالىپتاستىرۋ مەن بەكىتۋ, سونداي-اق ونىڭ اتقارىلۋىن باقىلاۋ كەزىندە ول شەشۋشى قىزمەت اتقارادى. سەنات قازاقستاننىڭ وڭىرلەرىنىڭ اتىنان وكىلدىك ەتەدى جانە وڭىرلىك ءماسليحاتتاردىڭ ءۇنى بولىپ تابىلادى. رەسپۋبليكالىق زاڭ شىعارۋ دەڭگەيىندە ەڭ ۇزدىك, تولىققاندى جانە كونستيتۋتسيالىق تۇرعىدان رەسىمدەلگەن نىساندا وڭىرلەردىڭ مۇددەسىن بىلدىرەدى», - دەدى توراعا.
جوعارعى پالاتا باسشىسى سەنات – مەملەكەتىمىزدىڭ بۇلجىماس نەگىزى بولىپ تابىلاتىنىن اتاپ ءوتتى. مەملەكەت پەن قوعام ءۇشىن ماڭىزدى ورنىقتىرۋشى فۋنكتسيانى اتقارادى. د.نازارباەۆانىڭ پىكىرىنشە, وڭىرلەر مەن رەسپۋبليكالىق دەڭگەيدىڭ, وڭىرلەردىڭ ءوز اراسىندا ديالوگ بولۋى كەرەك.
داريعا نازارباەۆا قازىرگى تاڭدا ەلىمىزدىڭ دامۋى مەن ىلگەرى جىلجۋى ءۇشىن الداعى ۋاقىتتا دۇرىس ويلاستىرىلعان شەشىمدەر قاجەت ەكەنىن, بۇل شەشىمدەر زاماناۋيلىق پەن دانالىقتى, جاڭالىقتار مەن وتكەن ۇرپاقتىڭ تاجىريبەسىن ۇشتاستىرا الۋى ءتيىس ەكەنىن اتاپ ءوتتى جانە وسىنداي تۇسىنىكتەن كەلىپ, پارلامەنتتىڭ جوعارعى پالاتاسىندا كەڭەسشى ورگان – سەناتورلار كەڭەسىن قۇرۋ يدەياسى تۋىنداعانىن, ونىڭ قۇرامىنا الدىڭعى شاقىرىلىمدارداعى نەعۇرلىم بەدەلدى, ەڭ تاجىريبەلى سەنات دەپۋتاتتارى شاقىرىلىپ وتىراتىنىن ايتتى.
«بۇل كەڭەس دانالىقتى, تاجىريبەنى, ۇستامدىلىقتى جانە تۇراقتىلىقتى بىلدىرەدى. ءبىز ونى تىكەلەي ديالوگ جاسايتىن, وزەكتى پروبلەمالاردى تالقىلايتىن, ولاردى شەشۋ جونىندە ۇسىنىمداردى دايىندايتىن اشىق الاڭ رەتىندە قىزمەت ەتەدى دەپ ويلايمىز. سەناتورلار كەڭەسى جۇمىس ىستەپ وتىرعان دەپۋتاتتىق كورپۋستىڭ سەنىمدى تىرەگىنە اينالادى دەپ ۇمىتتەنەمىز. بىزگە سىزدەردىڭ بىلىمدەرىڭىز, تاجىريبەلەرىڭىز, كۇش-قۋاتتارىڭىز, قازاقستاننىڭ شىنايى پاتريوتتارى رەتىندەگى بەلسەندى ومىرلىك ۇستانىمدارىڭىز قاجەت. ويتكەنى بارشامىزعا ورتاق ءبىر عانا بيىك ماقسات بار, ول – قوعام مەن مەملەكەت مۇددەسىنە قىزمەت ەتۋ», - دەپ اتاپ ءوتتى توراعا.
سەناتور ۆلاديمير ۆولكوۆ وتىرىسقا قاتىسۋشىلاردىڭ نازارىن مەملەكەت باسشىسى بيلىكتىڭ زاڭنامالىق ورگانى رەتىندە پارلامەنتتىڭ ءرولىن كۇشەيتۋ مىندەتىن قويعانىنا اۋداردى. وسى ورايدا سەناتور پارلامەنتتىك تىڭداۋلار مەن ۇكىمەت ساعاتتارىندا, ونىڭ ىشىندە زاڭ جوبالارىنىڭ تۇجىرىمدارى بويىنشا قابىلدانعان ۇسىنىمداردىڭ ورىندالۋىن; دەپۋتاتتىق ساۋالدارعا بەرىلەتىن جاۋاپتاردىڭ تولىقتىعى مەن ۋاقتىلىلىعىن باقىلاۋدى كۇشەيتۋ قاجەت ەكەنىن اتاپ ءوتتى. ۆ.ۆولكوۆ: «قاجەت جاعدايدا ۇكىمەت مۇشەسىنىڭ قىزمەتى تۋرالى ماسەلەلەر بويىنشا ەسەبىن تىڭداۋ قورىتىندىسى بويىنشا ونى قىزمەتىنەن بوساتۋ تۋرالى پرەزيدەنتكە جۇگىنۋ قۇقىعىن پايدالانۋدى ۇسىندى», دەدى ول.
سەنات جۇمىسىن جەتىلدىرۋگە قاتىستى كەڭەس مۇشەلەرى ءو.بايگەلدى, ج.ەرعاليەۆ, گ.قاسىموۆا, م.التىنباەۆ, ب.ءايتىموۆا مەن ز.فەدوتوۆا ءوز ۇسىنىستارىن ورتاعا سالدى.
دۋلات قۇسداۋلەتوۆ سەناتورلار جاريا ەتەتىن دەپۋتاتتىق ساۋالداردىڭ تيىمدىلىگىنە قول جەتكىزۋ قاجەتتىگىن اتاپ ءوتتى. «وڭىرلىك سيپاتقا يە دەپۋتاتتىق ساۋالداردى ءتيىستى مينيسترگە, اكىمگە, مەكەمەگە جولداۋ كەرەك. جاۋاپ قاناعاتتاندىرماسا, كەلەسى ساۋالدى پرەمەر-ءمينيستردىڭ اتىنا جولداپ, اتالعان باسشىنىڭ جاۋاپكەرشىلىگى تۋرالى ماسەلە كوتەرۋ كەرەك. نەگە دەيسىز عوي؟ سەبەبى بۇل بىزگە «ۇكىمەت پەن ورتالىق اتقارۋشى ورگاندار اراسىنداعى وكىلەتتىكتەردى شەكتەۋ تۋرالى» زاڭدى جاساۋعا مۇمكىندىك بەرەدى», - دەدى د.قۇسداۋلەتوۆ.
وتىرىس اياسىندا ايتىلعان بىرقاتار ۇسىنىستار سەنات رەگلامەنتىن وزگەرتۋگە باعىتتالدى. ول ۇسىنىستاردىڭ بارلىعى زەردەلەنىپ, جۇمىس بارىسىندا ەسكەرىلەتىن بولادى. «قۇبىلمالى الەمدە, جاڭا جاعداي مەن جاڭا ۋاقىتتا سەناتتىڭ ءرولىن ءتۇسىنۋ قاجەت. رەگلامەنت – بۇل ەڭ الدىمەن, قوعام, ەل, مەملەكەت پەن كونستيتۋتسيا الدىنداعى قۇقىق وكىلەتتىگى مەن جاۋاپكەرشىلىكتىڭ ۇيلەسىمى. سوندىقتان وزگەرىستەر دە ەنگىزۋ قاجەت. سونداي-اق, وكىلەتتىكتەر مەن جاۋاپكەرشىلىك دەڭگەيىن قايتا قاراپ, رەگلامەنتتە بەكىتۋ كەرەك», - دەدى عاني قاسىموۆ.
سەناتورلار كەڭەسىن قۇرۋدىڭ وزەكتىلىگى تۋرالى ءسوز ەتكەن مەملەكەتتىك جانە قوعام قايراتكەرى زينايدا فەدوتوۆا: «بۇل وتە قاجەت جانە قۇندى جۇمىس. بۇل سەنات پەن جالپى مەملەكەت ءۇشىن ۇلكەن كومەك بولادى. ءبىز ءسوز جۇزىندە ەمەس, ءىس جۇزىندە قوعام ءۇشىن پايدالى قىزمەت اتقارامىز», - دەدى.
وتىرىس بارىسىندا بىرعانىم ءايتىموۆا سەناتورلار كەڭەسى توراعاسىنىڭ ورىنباسارى, نۇرلان قىلىشباەۆ كەڭەس حاتشىسى بولىپ سايلاندى.
وتىرىس قورىتىندىسى بويىنشا سەناتورلار كەڭەسىنىڭ جۇمىس جوسپارى بەكىتىلدى.
