شاعىن جانە ورتا بيزنەس – قوعامنىڭ تۇراقتى دامۋىنىڭ نەگىزى. وسىعان وراي مەملەكەت باسشىسى ۇكىمەتكە اتالمىش سالادا سالىناتىن سالىقتان ءۇش جىلعا ءبوساتۋ ۇشىن زاڭنامالىق بازا ازىرلەۋدى تاپسىردى. بۇل تاپسىرمانى مەملەكەتتىك قىزمەت ىستەرى اگەنتتىگىنىڭ باسشىسى انار جايىلعانوۆا تالداپ, تۇسىندىرە كەلە بىلاي دەدى: «مەملەكەتتىك قىزمەتشىلەر, اسىرەسە, باقىلاۋشى ورگانداردا قىزمەت اتقاراتىن ماماندار بيزنەس-قوعامداستىقپەن قارىم-قاتىناستا ەتيكالىق نورمالار مەن مەملەكەتتىك قىزمەت تۋرالى زاڭنامانىڭ قانداي دا ءبىر بۇزۋشىلىعىن زاڭدى كاسىپكەرلىك قىزمەتكە كەدەرگى كەلتىرۋ نەمەسە بىرەۋدىڭ مۇددەلەرىن جاقتاۋعا جاسالعان تالپىنىس رەتىندە باعالانۋى مۇمكىن ەكەندىگىن ناقتى ءتۇسىنۋى قاجەت». ياعني, «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنىڭ 50-بابىندا زاڭدى تۇلعانىڭ قۇقىقتارى مەن مۇددەلەرىنە كەدەرگى كەلتىرۋگە جانە كاسىپكەرلىك سۋبكتىلەرىنە قاتىستى تالاپتاردى ورەسكەل بۇزۋ مەملەكەتتىك قىزمەتكە كىر كەلتىرەتىن تارتىپتىك قىلىق بولىپ تابىلاتىندىعى جازىلعان.
سونداي-اق مەملەكەت باسشىسى قاسىم-جومارت كەمەل ۇلى مەملەكەكەتتىك قىزمەت ساپاسىن ارتتىرۋعا بايلانىستى دا تاپسىرمالار جۇكتەدى. مەملەكەتتىك قىزمەت كورسەتۋشى ورگانداردىڭ باستى ماقساتى – ازاماتتاردىڭ ءومىر سۇرۋىنە ءتيىستى جاعداي جاساۋ. ءبىز ءوز كەزەگىمىزدە حالىققا كورسەتەتىن قىزمەت ساپاسىن ارتتىرىپ, بيلىك پەن حالىق اراسىنداعى التىن كوپىرگە اينالۋىمىز قاجەت. سەبەبى, مەملەكەتتىك قىزمەت كورسەتۋ – ەلىمىزدىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشى.
حالىققا ساپالى قىزمەت كورسەتۋدى قامتاماسىز ەتۋ – مەملەكەتتىك ورگاندار جۇمىسىنىڭ اسا ماڭىزدى باسىمدىلىعى. وسى تۇرعىدا مەملەكەتتىك اپپاراتتىڭ كليەنتكە باعدارلىعى – ءبىزدىڭ جۇمىستىڭ ءتۇيىندى قاعيداسى. ءبىزدىڭ قىزمەتىمىزدىڭ ەندىگى كەزەكتەگى نەگىزگى باسىمدىعى – بۇل مەملەكەت باسشىسىنىڭ سايلاۋالدى باعدارلاماسىندا ايتىلعان تاپسىرمالاردى ساپالى ىسكە اسىرۋ. الدىمىزعا قويىلعان ماقساتقا قول جەتكىزۋ ءۇشىن مەريتوكراتيا قاعيداتىن قامتاماسىز ەتۋ جونىندەگى شارالاردى كۇشەيتىپ, مەملەكەتتىك قىزمەتشىلەردىڭ الەۋمەتتىك پاكەتىن كەڭەيتۋدى جوسپارلاپ وتىرمىز.
پرەزيدەنتىمىز اتاپ وتكەندەي, «مەملەكەتتىك قىزمەت – ەلىڭ جانە حالقىڭا قىزمەت ەتۋ» دەپ سانالۋى ءتيىس. ارقايسىمىزدىڭ موينىمىزدا ءمىنسىز مىندەت اتقارۋ مەن ابىرويلى ار جولىندا ەڭبەك ەتۋ پارىزى تۇر. بۇل رەتتە «100 ناقتى قادام» ۇلت جوسپارىنىڭ 12-قادامىن جۇزەگە اسىرۋ ماقساتىندا مەملەكەتتىك قىزمەتشىلەردىڭ جاڭا ادەپ كودەكسى جانە ەتيكا ماسەلەلەرى جونىندەگى ۋاكىلەتتى وكىل لاۋازىمى, ياعني, ادەپ جونىندەگى ۋاكىلدىڭ ينستيتۋتى ەنگىزىلدى. مەملەكەتتىك قىزمەتشى قاي كەزدە مورالدىق-ەتيكالىق تالاپتاردى ساقتاۋعا مىندەتتى. الايدا, بۇگىندە مەملەكەتتىك قىزمەتشىلەردىڭ قىزمەت اياسىندا ءتۇرلى كەدەرگىلەر مەن ۇجىم اراسىندا تۇسىنبەۋشىلىكتەردىڭ كورىنىسى ورىن الادى. وسىنداي جاعدايلارعا جول بەرمەۋ ادەپ جونىندەگى ۋاكىلدىڭ نەگىزگى قىزمەتىنىڭ ءبىرى بولىپ تابىلادى. بۇگىنگى كۇنى الماتى وبلىسىندا جالپىادەپ جونىندەگى 40 ۋاكىل ءوز قىزمەتىن اتقارۋدا.
قورىتىندىلاي كەلە, مەملەكەت باسشىسى جۇكتەگەن مىندەتتەردى ءتيىستى دەڭگەيدە ورىنداۋ وڭىرلەردە جۇمىستى ءتيىمدى ۇيىمداستىرىلعان جاعدايدا عانا جۇزەگە اسىرىلادى.
سەرىكباي نۇرعيساەۆ,
مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى - ادەپ جونىندەگى كەڭەستىڭ توراعاسى
