ادەبي كەش بارىسىندا جاس قالامگەردىڭ «جۇرەككە ورالۋ» كىتابى تانىستىرىلدى. بۇل كىتاپتا جازۋشىنىڭ پسيحولوگيالىق تارتىسقا تولى ينتەللەكتۋالدى اڭگىمەلەرى, بالالار تاقىرىبىنداعى شىعارمالارى توپتاستىرىلعان.
اياگۇل مانتايدىڭ اڭگىمەلەرى ادام جانىنىڭ قاتپارلارىن شىنايى اشۋىمەن, ۇلتتىق بولمىس پەن ەۋروپالىق تانىم-تۇسىنىكتى ادەمى ۇندەستىرۋىمەن, جاڭالىعىمەن قۇندى. «ادەبيەت ۇلى بولماي, ۇلت ۇلى بولمايدى» دەيدى ع.مۇسىرەپوۆ. ادام تەك ەكونوميكالىق ءوسۋدى ويلاسا, تەز قۇلدىرايدى, روبوتقا اينالادى. سانا سەرپىلمەي, رۋحاني بايىماي ەشقانداي ءوسۋ بولمايدى. جۇرەكتىڭ ەمى – ءسوز, ساز.
ءبىزدىڭ كىتاپحانالاردىڭ ماقساتى – جىلت ەتكەن جاقسى دۇنيەنى وقىرمانعا تانىستىرۋ, اۆتور مەن وقىرمان اراسىندا دانەكەر بولۋ. تالعامپاز وقىرمان قالىپتاسۋىنا جۇمىس ىستەۋ. قازاق اۆتورلارىنىڭ سۇرانىسقا يە بولۋى جولىندا قىزمەت كورسەتۋ.
اياگۇل مانتايدىڭ بۇل كەشى – وقىرماندارمەن ءبىرىنشى كەزدەسۋى ەكەن. ءتىرى ديالوگقا قۇرىلعان كەزدەسۋ ەكى جاققا دا اسەرلى بولعان سىڭايلى. كەشكە اتاقتى جازۋشى دۋلات يسابەكوۆتىڭ قاتىسۋى دا ءىس-شارانى سالماقتاي تۇسكەندەي. كەزدەسۋدە وقىرماندار تاراپىنان قويىلعان سۇراقتارعا جازۋشى بارىنشا شىنايى جاۋاپ بەرىپ وتىردى.
وقىرمانىمەن اشىق اڭگىمە قازاق اۆتورلارىنا ابدەن كەرەك ەكەن دەگەن ويدا قالدىق.
عازيزا قۇدايبەرگەن,
جامبىل اتىنداعى قالالىق جاسوسپىرىمدەر كىتاپحاناسىنىڭ باسشىسى
