بۇل جوبا باستالعان كەزدە قاراتوبە اۋدانىندا تۇراتىن 14 پەن 29 جاس ارالىعىنداعى ازاماتتاردان 78 الەۋمەتتىك جوبا ۇسىنىلعان ەكەن. ناتيجەسىندە جالپى قۇنى 36 ملن تەڭگە بولاتىن 18 الەۋمەتتىك جوبا جەڭىمپاز اتاندى. سونىڭ 1 ملن تەڭگەسى گۇلسەزىمنىڭ جوباسى – «ماناس» كلينينگ (كىلەم, اس ءۇي جيھازدارىن حيميالىق تازالاۋ) ورتالىعىنا ءتيدى.
– وسى جوباعا قاتىسۋ ءۇشىن بارىنشا دايىندالدىم. «Zhas Project» جوباسى بىزدەن بۇرىن وتكەن قىزىلوردا, اقتوبە وبلىستارىنداعى ارىپتەستەرىمنىڭ تاجىريبەسىمەن تانىستىم. سونىڭ ىشىندە حيميالىق تازالاۋ ورىندارىن اشقان جاستار بار ەكەن. اۋىلدىق جەردە كىلەم, جۇمساق جيھاز تازالايتىن جەر جوق قوي. وسى جوبانى اۋىل جاعدايىنا بەيىمدەپ, وزىمشە ۇسىندىم, – دەيدى گۇلسەزىم.
گۇلسەزىم تابيعاتقىزىنىڭ ماماندىعى – تەحنيك-پروگرامميست. بۇرىن اۋىل اكىمدىگىندە جەتەكشى مامان بولىپ ۋاقىتشا قىزمەت ەتكەن. ودان كەيىن بالاباقشادا قويماشى بولدى. وتباسىندا ءۇش بالاسى بار ەڭبەكقور انانىڭ قول قۋسىرىپ قاراپ وتىرۋعا جانى قاس. «Zhas Project» جوباسىنان حابار كەلگەندە جانىپ تۇسكەنى سودان.
ارينە, شاعىن اۋىلدا ستاتسيونارلىق تازالاۋ ورنىن اشىپ, جەكە كاسىپ ەتۋ قيىن عوي. سوندىقتان گۇلسەزىم بەلگىلى «Karcher» فيرماسىنىڭ كىلەم, جۇمساق جيھاز, ىدىس-اياق تازالايتىن ءموبيلدى اپپاراتتارىن العاندى ءجون كوردى.
ءبىز گۇلسەزىم تۋرالى اقپارات جانە قوعامدىق كەلىسىم مينيسترلىگىنىڭ قولداۋىمەن جۇرگىزىلىپ جاتقان «ەڭبەكقور جاستار» اقپاراتتىق شاراسى ارقىلى بىلدىك. گۇلسەزىم سياقتى ەڭبەكقور جاستار كوبەيسە, اۋىلدىڭ دا تىنىس-تىرشىلىگى جاقسارا تۇسەر ەدى-اۋ دەگەن ويعا كەلدىك.
باتىس قازاقستان وبلىسى
