كۇلاشتىڭ اكەسى ايتجان ەكىنشى دۇنيەجۇزىلىك سوعىستا قازا تاپقان. اناسى زاۋكەش جارىنان قالعان ابدىرەش, ءابىتاي, كۇلاش ەسىمدى ءۇش بالاسىن سول جىلدارى ۇجىمدىق شارۋاشىلىقتىڭ ىستىعىنا كۇيىپ, سۋىعىنا توڭىپ ءجۇرىپ, ايانباي ەڭبەك ەتىپ ءوسىردى, جەتىلدىرىپ, ەل قاتارىنا قوستى.
بالالىق شاعى سوعىس جىلدارىنىڭ جوقشىلىعىندا ءوتىپ, ۇلى ەڭبەك مايدانىنىڭ بەل ورتاسىندا, ءوزىنىڭ تەڭ قۇربىلارىنىڭ ەڭ الدىندا ورتا مەكتەپتى جاڭا بىتىرگەن, بۇرىمى جەلكىلدەگەن جاس قىز كۇلاش تا ەش ىركىلمەستەن بىلەك سىبانىپ, «دالا ارۋى» اتانعان جۇگەرى داقىلىن وسىرۋگە كىرىسىپ, ءوزىنىڭ باقىتىن ادال ەڭبەكپەن تاۋىپ ەدى. سول كەزدەگى كولحوز شارۋاسىنىڭ قاي-قايسىسىنان دا تايسالعان جوق. جاستىق جىگەر, قايراتىن سالىپ, ىزگىلىككە, يگىلىككە ۇمتىلدى. ۇلكەندەردى قۇرمەتتەي ءجۇرىپ, ولاردان تاجىريبە ۇيرەنۋدەن, اقىل ءسوز تىڭداۋدان جالىقپادى. ءوز قاتارىنىڭ ۇيىتقىسى بولدى. ەلدىڭ ەڭبەككە ادال ادامدى سىيلايتىن, قادىرلەيتىن يگى ءداستۇرىنىڭ نۇرى كۇلاش ايتجانقىزىنىڭ ماڭدايىنا جارقىراپ ءتۇستى. ونىڭ قاجىرلى ەڭبەگى باعالانىپ, كوپ ۇزاماي جۇگەرى وسىرۋشىلەر توبىنىڭ جەتەكشىلىگىنە سەنىم كورسەتىلدى. ۇجىم مۇشەلەرى بولعان جاسى دا, ۇلكەنى دە ءبىراۋىزدان كۇلاش جەتەكشىلىگىنىڭ بەدەلىن قولداپ, ءوزارا ءتىپتى ءبىر وتباسىنداي ءبىر-بىرىنە دەگەن باۋىرمالدىق قاتىناس قالىپتاسىپ, ەڭبەك ەتتى.
سونداي ىنتىماقتىڭ ناتيجەسى كەزىندە كۇلاش ايتجانوۆا باسقاراتىن ۇجىم جۇگەرى ءونىمىن وسىرۋدە بۇكىل اۋداننىڭ الدىنا شىقتى. ولار ۇزاق جىلدار, اتاپ ايتقاندا 15-20 جىلدىڭ كولەمىندە داندىك «كراسنودار», «ۆير-56», يۋگوسلاۆيالىق «زپسك» جۇگەرى تۇقىمدارىنان الاتىن ءونىمدى ءار گەكتارىنا 80 تسەنتنەردەن 100 تسەنتنەرگە دەيىن جەتكىزىپ, جوعارى سورتتى جۇگەرى ءدانىن حالىق شارۋاشىلىعىنىڭ, اسىرەسە مال ازىعىنىڭ ساپاسىن كوتەرۋدە وزىق كورسەتكىشتەرگە قول جەتكىزە الدى. اۋىل شارۋاشىلىعى سالاسىندا بۇكىل وداققا وزىق تاجىريبە كورسەتتى, ەل الەۋەتىن كوتەرىپ, ەڭبەك داڭقىن اسىردى. كوپ ۇزاماي جۇگەرى ءوسىرۋشى كومسومول-جاستار ۇجىمىن باسقارعان كۇلاش ايتجانوۆا ءوزى دە ۇستاز-تالىمگەر دارەجەسىنە كوتەرىلدى. ول ونەگەلى ەڭبەگىنىڭ ارقاسىندا, اۋدان, وبلىس جۇرتشىلىعىنىڭ قۇرمەتىنە بولەندى. اۋداندىق پارتيا كوميتەتىنىڭ مۇشەسى, وبلىستىق كەڭەستىڭ دەپۋتاتى بولىپ, بۇكىلوداقتىق حالىق شارۋاشىلىق كورمەلەرىنىڭ التىن, كۇمىس مەدالدارىمەن, العىس حاتتارىمەن ماراپاتتالدى. ءوز زامانىندا ەڭ ابىرويلى رەسپۋبليكالىق, وداقتىق جيىن, فورۋمدارعا دەلەگات بولىپ قاتىسىپ, ساليقالى ءسوز سويلەدى.
جۇگەرى وندىرۋدەگى جوعارى ناتيجەلەرى ءۇشىن كۇلاش ايتجانوۆاعا 1971 جىلى وتىز ەكى جاسىندا سول كەزدەگى وداقتىڭ ەڭ جوعارعى مارتەبەلى ماراپاتى – سوتسياليستىك ەڭبەك ەرى قۇرمەتتى اتاعى بەرىلىپ, لەنين وردەنىمەن ماراپاتتالدى.
تاۋەلسىز مەملەكەتىمىز تۋىن كوتەرىپ, جاڭا ءومىر باستالعان شاقتان بەرى كۇلاش ايتجانقىزى ءوزى قۋات العان ەڭبەك قاسيەتىن قۇرمەتتەپ, ناسيحاتتاۋدان جالىققان ەمەس. ءار كەز جاستارمەن كەزدەسكەندە ءوزىنىڭ قۇرمەت تۇتقان ۇستازدارىن, ەڭبەكتەس دوستارىنىڭ ەسىمدەرىن زور ىلتيپاتپەن ەسكە الىپ وتىرادى. اقىلگوي اعالارىن, سونىڭ قاتارىندا اۋدان باسشىلارى بولعان سوتسياليستىك ەڭبەك ەرى ءشايمۇحان ساپيەۆ, عالىم تۇرعانباەۆ, شارۋاشىلىق باسشىلارى بولعان نيكولاي گولوۆاتسكي, ىبىرايىمجان قوجاحمەتوۆ ءوزى ۇلگى تۇتقان ارداگەر انا, جۇگەرى ءوسىرۋدىڭ شەبەرى ءادالات زايناۋدينوۆا سياقتى ارداگەر ۇستازدارىن ەرەكشە قۇرمەتتەيدى. ءتىپتى زەينەتكە شىققاننىڭ وزىندە ەلدىڭ, اۋىل, اۋدان جۇرتشىلىعىنىڭ تۇرمىس جاعدايىنا الاڭداپ, ەل قامىن ويلاۋدان جاڭىلعان ەمەس. بىرنەشە جىل جەرگىلىكتى كاسىپوداق ۇيىمىن دا باسقارىپ, ەل تۇرمىسىنا قولقابىس كورسەتتى. ارقاشان ادامداردىڭ مۇڭ-مۇقتاجىنا قۇلاق اسىپ, كومەك قولىن ۇسىنىپ جۇرەدى.
بۇگىندەرى سول قۇرمەتتى اپايىمىز مارتەبەلى 80 جاستىڭ سەڭگىرىنە كوتەرىلىپ وتىر. كۇلاش اپامىزدىڭ دەنىنە مىقتى ساۋلىق, وتباسىنا, ۇرپاعىنا باياندى باقىت تىلەي وتىرىپ, ەڭبەكپەن ورىلگەن ءومىرىنىڭ جەمىسىن ۇزاعىنان كورگەي دەيمىز.
سۋرەتتە: سولدان وڭعا قاراي سوتسياليستىك ەڭبەك ەرى ءادالات زايناۋدينوۆا, حالىق قاھارمانى باقىتجان ەرتاەۆ, سوتسياليستىك ەڭبەك ەرى كۇلاش ايتجانقىزى.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى
