جارتى جىل بويى بارلىق وڭىرلەردەن جينالعان جاس ونەرتاپقىشتار جەتەكشىلەرىمەن بىرگە مۇمكىندىگى شەكتەۋلى جانداردىڭ جانە وزگە دە الەۋمەتتىك وسال توپتاردىڭ ءومىرىن جاقسارتۋعا باعىتتالعان يننوۆاتسيالىق جوبالارىن جەتىلدىردى. ولار ءبىلىم بەرۋ لاگەرىندە باعدارلامالاۋدى ۇيرەنىپ قانا قويماي, سۇرانىسقا يە بولاتىن ءونىم شىعارۋ ءۇشىن قوسىمشا جوبالىق مەنەدجمەنتتىڭ, ۆەب-ديزاين, روبوتتەحنيكا جانە ماركەتينگ سالاسىنىڭ قىر-سىرىن ۇيرەنگەن. ونىمەن قوسا, وزدەرى ۇسىنعان جوبانىڭ قانشالىقتى وزەكتى بولاتىنىن انىقتاۋ ءۇشىن ينكليۋزيۆتى جانە الەۋمەتتىك جوبالارعا دەگەن قوعام سۇرانىسىن زەرتتەدى.
«IteachMe» – دامۋ ەرەكشەلىگى بار جاستاردى وقىتۋ جانە جۇمىسقا ورنالاستىرۋ ارقىلى الەۋمەتتىك وڭالتۋعا باعىتتالعان ينكليۋزيۆتى ءبىلىم بەرۋ جوباسى. جوبانى جاستار جىلىنا وراي «ەرەكشە تانداۋ-شەلەك» كورپوراتيۆتىك قورى مەن «Samruk-Kazyna Trust» الەۋمەتتىك جوبالاردى دامىتۋ قورى بىرلەسىپ ۇيىمداستىرعان. سونداي-اق باستاماعا «شەۆرون» كومپانياسى, ورتالىق ازيا ەۋرازيا قورى مەن ەڭبەك جانە حالىقتى الەۋمەتتىك قورعاۋ مينيسترلىگى قولداۋ بىلدىرگەن.
جوبا جەتەكشىسى زاحيرا بەگاليەۆانىڭ ايتۋىنشا, تەحنولوگيا مەن ءبىلىم قوعامداعى بارلىق كەدەرگىلەر مەن شەكارالاردى جويادى. «IteachMe» ەرەكشە قاجەتتىلىكتەرى بار جاستار ءۇشىن ومىرگە جولداما بەردى. جوبا بارىسىندا قىزىقتى ءارى قيىن ساتتەر كوپ بولدى. ءبىز قوعامدا قالىپتاسقان تاپتاۋرىن قاعيدالاردى بۇزدىق. تەحنولوگيا مەن ءبىلىمنىڭ كۇشى كەدەرگىلەر مەن شەكارالاردى جوياتىنىن كورسەتتى. «جاڭا تەحنولوگيالار الەمدى شەكسىز ەتەدى» دەگەن تۇسىنىك تاعى دا راستالدى. باستىسى, قاتىسۋشىلار الداعى ۋاقىتقا ۇلكەن جوسپارلار مەن ماقساتتار قويدى جانە ولاردىڭ جوبالارى حالىقتىڭ الەۋمەتتىك وسال توپتارىنا كوپ كومەك كورسەتەدى», دەدى ز.بەگاليەۆا.
جوبانىڭ سوڭعى كەزەڭى نۇر-سۇلتان قالاسىندا «Astana Hub» حالىقارالىق IT ستارتاپتار تەحنوپاركىندە ءوتتى. فينالدىق كەزەڭدە قاتىسۋشىلار جەتى دايىن جوبانى ۇسىندى. ولاردىڭ تورتەۋى جوبالارىن ءارى قاراي دامىتۋ ءۇشىن 400 مىڭ تەڭگەدەن ۇتىپ الدى. جەڭىمپازدار قاتارىندا ماماندىق تاڭداۋدا كومەككە كەلەتىن ۆيرتۋالدى پلاتفورما مەن مۇگەدەك جاندارعا ارنايى ترەناجەر بولدى.
ۆيرتۋالدى دارىگەر, باعدارلاماشى, ديزاينەر بول
الماتىلىق ءبىر توپ جاس ونەرتاپقىش ۇسىنعان «CUP» (Classmates Up the Progress) جوباسى – سوڭعى سىنعا جەتىپ, اقشالاي سىيلىق جەڭىپ العان يننوۆاتسيالىق ونىمدەردىڭ ءبىرى. جوبا مۇمكىندىگى شەكتەۋلى جاندارعا كاسىبي باعدار بەرۋگە جانە جۇمىسقا ورنالاسۋعا كومەكتەسۋگە ارنالعان. قولدانۋشى ارنايى ونلاين-پلاتفورمادا كۇنى بويى ءوزىن كەز كەلگەن ماماندىق يەسى رەتىندە سىناپ كورە الادى. ازىرگە جوبانىڭ پروتوتيپىندە باعدارلاماشى, ماركەتولوگ, ديزاينەر سەكىلدى ماماندىقتار ۇسىنىلعان. جوبا اۆتورلارىنىڭ ءبىرى «تۇران» كوللەدجىنىڭ اقپاراتتىق جۇيەلەر ماماندىعىنىڭ 4-كۋرس ستۋدەنتى الەكسەي كاريموۆتىڭ ايتۋىنشا, جوباعا بارلىق ماماندىق يەلەرىن قوسۋ جوسپاردا بار ەكەن.
«قازىرگى ۋاقىتتا كەلىسسوزدەر جۇرگىزىپ جاتىرمىز. جاقىندا كەلىسىمشارت جاساسامىز. «IteachMe»-دەن جەڭىپ العان سومانى جوبانى ءارى قاراي دامىتۋعا جۇمسايمىز. كەرەكتى جابدىقتاردى ساتىپ الىپ, جوبانىڭ ادىستەمەلىك نەگىزىن ازىرلەيمىز. قازىر كوللەدجدەگى ديپلومدىق جۇمىسىمىزدىڭ شەڭبەرىندە سايت جاساپ جاتىرمىز. الداعى ۋاقىتتا دايىن جوبانى مەملەكەتتىك ورگاندارعا ۇسىنۋدى جوسپارلاپ وتىرمىز», دەدى جوبا قاتىسۋشىلارىنىڭ ءبىرى.
جاس دارىندارعا ويعا العانىن ىسكە اسىرۋدا «تۇران» ۋنيۆەرسيتەتى جانە كوللەدجى, سونداي-اق قازاقستان رەسپۋبليكاسىنىڭ ۇلتتىق كىتاپحاناسى قولداۋ بىلدىرەدى. ون ءبىر قاتىسۋشىدان جينالعان توپ جاز بويى «تۇران» كوللەدجى بەرگەن اۋديتوريادا جۇمىس ىستەپ, ماركەتينگتىك زەرتتەۋ جۇرگىزۋگە مۇمكىندىك الىپتى.
جوبا اۆتورلارى «CUP» مۇمكىندىگى شەكتەۋلى جاندارعا ومىردەن ءوز ورنىن تاۋىپ, قالاعان ماماندىق يەسى اتانۋىنا كومەكتەسەدى دەپ سەنەدى.
ەرەكشە قاجەتتىلىكتەرى بار جاندارعا جان-جاقتى قولداۋ
ال تالدىقورعان قالاسىنداعى مۇگەدەك جاندارعا ارنالعان «Elstar» رەابيليتاتسيالىق-پسيحولوگيالىق ورتالىعىنىڭ جەتەكشىسى ۆاديم درۋزين IT-تەحنولوگيانىڭ كومەگىمەن اعزانى قالپىنا كەلتىرەتىن ارنايى قۇرىلعىنى ۇسىندى.
«بوس ترەناجەرلەرى كوپ جاعدايدا ءدارى-دارمەكپەن ەمدەۋ ءتيىمسىز بولعان كەزدە قولدانىلادى. كومپيۋتەرگە جالعانعان قۇرىلعى ەم الۋشىنىڭ جۇمىسقا دەگەن قابىلەتىن, زەيىنىن ارتتىرىپ, كۇيزەلىسكە ءتوزىمدى بولۋىنا, تەپە-تەڭدىك ساقتاۋىن جانە ۇيرەنۋ مۇمكىندىكتەرىن جاقسارتادى. تالدىقورعان قالاسىندا بارلىعى 1300 ءبىرىنشى توپتاعى مۇگەدەك جاندار ءومىر سۇرەدى. بۇل جوبا ءوزىم سياقتى تىرەك-قيمىل جۇيەسىنە زاقىم كەلگەن ادامداردىڭ ءومىرىن جەڭىلدەتەر ەدى», دەيدى ۆاديم درۋزين.
ول وزگە دە ەرىكتىلەرمەن بىرگە قالادا تۇراقتى تۇردە مۇگەدەك جانداردى ومىرگە بەيىمدەۋگە ارنالعان ترەنينگتەر ۇيىمداستىرىپ كەلەدى. جوبانى جۇزەگە اسىرۋ ءۇشىن «IteachMe»-دەن ۇتقان باستاپقى قاراجاتىنا كراۋدفاندينگ ارقىلى 3 ملن تەڭگە جيناۋدى كوزدەيدى. قاراجات جيناۋ قىركۇيەك ايىنان باستالىپ كەتكەن. ەگەر قاجەتتى سومانى جيناي السا, ءوزى تۇرىپ جاتقان پاتەردى وڭالتۋ ورتالىعىنا اينالدىرىپ, بىرنەشە جانعا تەگىن كومەكتەسەر ەدىم دەيدى.
«مۇمكىندىگى شەكتەۋلى جان ءۇشىن بۇل ەمدى ۇزاق ۋاقىت ارالىعىندا قابىلداۋعا كوپ قاراجات كەرەك ەكەنىن بىلەمىن. جوبا تالدىقورعان قالاسىندا ىسكە اسسا, الماتىداعى بالاماسىنان الدەقايدا قولجەتىمدى بولادى», دەيدى جوبا اۆتورى.
جاستار جىلى اياسىندا مۇمكىندىگى شەكتەۋلى جاستاردىڭ IT, يننوۆاتسيا سالاسىنداعى جوبالارىن قولداۋ ماقساتىندا ۇيىمداستىرىلعان شارا قوعامداعى بارلىق دامۋ ەرەكشەلىگى بار جاندارعا كورسەتىلگەن ۇلكەن سەنىم ەكەنى ءسوزسىز. سەبەبى مۇگەدەكتەر كۇندەلىكتى تاپ بولاتىن پروبلەمالارمەن قاتىسۋشىلاردىڭ وزدەرى جاقسى تانىس جانە ءار جوبانى جان-جاقتى زەرتتەپ, ءتيىمدى شەشۋ جولدارىن ۇسىنۋعا تىرىسقان.
مەملەكەت باسشىسى دا قازاقستان حالقىنا جولداۋىندا مۇمكىندىگى شەكتەۋلى بالالار ماسەلەسىنە ۇلكەن كوڭىل ءبولدى. «قامقورلىعىندا مۇمكىندىگى شەكتەۋلى بالالارى بار وتباسىلارعا ەرەكشە كوڭىل ءبولىنۋى ءتيىس. بالالارعا قولجەتىمدى بولۋى ءۇشىن شاعىن جانە ورتاشا وڭالتۋ ورتالىقتارىنىڭ جەلىسىن كەڭەيتۋ قاجەت. ءبىز ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋعا مىندەتتىمىز. ۇكىمەتكە ەندى وسى ماقساتقا ءۇش جىل ىشىندە كەم دەگەندە 58 ميلليارد تەڭگە ءبولۋدى تاپسىرامىن», دەپ اتاپ ءوتتى قاسىم-جومارت توقاەۆ. بۇل – ەرەكشە جاستارعا دەگەن قامقورلىق ودان ءارى ارتا تۇسەتىنىن كورسەتەدى.
دامۋ ەرەكشەلىگى بار جاستاردى الەۋمەتتىك وڭالتۋعا باعىتتالعان «IteachMe» جوباسى ەلىمىزدەگى جاس دارىندارعا ءوز كۇشتەرىن يننوۆاتسيا سالاسىندا سىناپ كورۋگە ۇلكەن مۇمكىندىك بەردى. مەملەكەت تاراپىنان قولداۋعا يە بولعان جاستار الداعى ۋاقىتتا يننوۆاتسيالىق جوبالارىمەن قازاقستاننىڭ تسيفرلى ەل بولۋىنا ەلەۋلى ۇلەس قوسپاق.
