مۇنان بىلايعى جەردە الماتىداعى «ازاماتتارعا ارنالعان ۇكىمەت» مەملەكەتتىك كورپوراتسياسى حقو-عا جۇگىنەتىن ەستۋ قابىلەتى ناشار ازاماتتارعا قازاق تىلىندە ىممەن قىزمەت كورسەتە الادى.
كۇن سايىن ەلىمىزدەگى 348 فرونت-كەڭسەسىنە مىڭداعان قازاقستاندىق مەملەكەتتىك تىلدە قىزمەت الۋعا كەلەدى. ولاردىڭ سۇرانىسىن وتەپ, ساپالى قىزمەت كورسەتۋ – حقو قىزمەتكەرلەرىنىڭ باستى مىندەتى. حقو-دان قىزمەت كورسەتۋدى تالاپ ەتىپ كەلگەن جاندار اراسىندا ەرەكشە قاجەتتىلىگى بار تۇلعالار دا بار. ەستۋ قابىلەتى ناشار ادامدار ءۇشىن بۇل كەڭسەلەردە يشارات ءتىلىن مەڭگەرگەن ماماندار قىزمەت كورسەتەدى.
ء«ار كۇنىن مۇلگىگەن تىنىشتىقتا وتكىزەتىن جاندار حقو سياقتى مەكەمەگە كەلىپ, ءوزىن تۇسىنە الاتىن قىزمەتكەرمەن ىممەن تىلدەسىپ, كەرەك قىزمەتىن الا الادى. ءبىز قاشاندا ەرەكشە قاجەتتىلىگى بار تۇلعالارعا بار جاعدايدى جاساۋعا تىرىسامىز. اربامەن جۇرەتىندەر ءۇشىن پاندۋستار, زاعيپتار ءۇشىن برايل الىپبيىندەگى جازۋلارى بار تاقتايشالار قويىلعان. ناشار ەستيتىندەرگە سۋردواۋدارما ءتىلىن مەڭگەرگەندەر قىزمەت كورسەتەدى», دەيدى باسقارما ءتورايىمى اسەمگۇل بالتاشەۆا.
وسىلايشا رەسپۋبليكا بويىنشا حالىققا قىزمەت كورسەتۋ ورتالىقتارىنىڭ بولىمدەرىندە ەڭبەكتەنەتىن 1300-دەن استام قىزمەتكەر بيىل يشارات ءتىلىن مەڭگەرۋ كۋرستارىنان وتكەن. ولاردىڭ 1100-دەن استامى ارناۋلى سەرتيفيكاتتار العان. ونىڭ ىشىندە الماتى قالاسى بويىنشا 15 مامان ىمداۋ ءتىلىن مەڭگەردى.
مەملەكەتتىك كورپوراتسيانىڭ الماتى قالالىق فيليالىندا قىزمەت ەتەتىن ارمان بايدىلداەۆتىڭ ايتۋىنشا, ىم ءتىلىن ۇيرەنۋ ۇسىنىلعاندا, ول بىردەن كەلىسىمىن بەرگەن. ادامدارعا كومەكتەسۋ – باستى پارىزىم, دەپ بىلگەن ول كۋرستاردان ءوتۋ ارقىلى قىزمەت الۋعا كەلەتىن ەرەكشە تۇلعالارعا پايداسىن تيگىزە الاتىنىن ايتادى. «از ۋاقىت ىشىندە ءبىز ىم تىلىندەگى امانداسۋ, قوشتاسۋ, ارىپتەر, ساندار سياقتى نەگىزگى سوزدەرى مەن تەرميندەرىن مەڭگەردىك. قىزمەت الۋشىلارعا قانداي انىقتاما, قۇجات قاجەت دەپ سۇراي الامىز, مەيلى ول جەكە كۋالىك نە پاسپورت بولسىن», – دەيدى ارمان.
ايتا كەتەيىك, مەملەكەتتىك كورپوراتسيادا I, II, III توپ مۇگەدەكتىگى بار 745 جۇمىسكەر ەڭبەكتەنەدى. جۇمىسپەن قامتۋ ستراتەگيالىق جوسپارىنا سايكەس, مۇگەدەكتىگى بار قىزمەتكەرلەردىڭ جالپى شتات كولەمىندەگى ۇلەسى 4%-دان كەم بولماۋى ءتيىس. III توپ مۇگەدەكتىگى بار ازاماتتار مەملەكەتتىك كورپوراتسياعا ەش كونكۋرستىق ىرىكتەۋسىز جۇمىسقا ورنالاسا الادى.
الماتى
