جىلىتۋ ماۋسىمىنا دايىندىق بويىنشا اتقارىلىپ جاتقان جۇمىستار تۋرالى ەنەرگەتيكا ءمينيسترىنىڭ ءبىرىنشى ورىنباسارى م. دوسمۇحامبەتوۆ, يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, ءبىلىم جانە عىلىم ءمينيسترى ا. ايماعامبەتوۆ, دەنساۋلىق ساقتاۋ ۆيتسە-ءمينيسترى و. ابىشەۆ, باتىس قازاقستان وبلىسىنىڭ اكىمى ع. ەسقاليەۆ, نۇر-سۇلتان قالاسىنىڭ اكىمى ا. كولگىنوۆ, سونداي-اق, پرەمەر-ءمينيستردىڭ ورىنباسارى ر. سكليار باياندادى.
وڭىرلەردە 10 606 دەربەس قازاندىق نەمەسە 99,8%, 45 908 تۇرعىن ءۇي (98,1%) دايىندالدى. 4 943,4 كم جىلۋ جەلىلەرى (99,1 %), 14 917,1 كم (98,7%) سۋمەن جابدىقتاۋ جەلىلەرى جوندەلدى.
كومىر ءوندىرۋشى كومپانيالار 75,1 ملن توننا كومىر ءوندىردى, بۇل وتكەن جىلدىڭ ۇقساس كەزەڭىمەن سالىستىرعاندا 97,2%-دى قۇرايدى (77,2 ملن توننا).
كوممۋنالدىق قىزمەتتەر ءۇشىن تۇتىنۋشىلاردىڭ بەرەشەگى 11,4 ملرد تەڭگەنى قۇرايدى. ەڭ كوپ دەبيتورلىق بەرەشەك الماتى ق. – 2,6 ملرد تەڭگە, نۇر-سۇلتان ق. – 1,7 ملرد تەڭگە, شىمكەنت ق. – 1,3 ملرد تەڭگە جانە ماڭعىستاۋ وبلىسىندا – 1,5 ملرد تەڭگە ساقتالىپ وتىر.
2527 بالاباقشا (95%), 6656 مەكتەپ (99%) جىلىتۋ كەزەڭىنە دايىندىق تۋرالى اكتىلەردى الدى. رەسپۋبليكالىق ماڭىزى بار 31 دەنساۋلىق ساقتاۋ نىسانى بويىنشا جىلىتۋ ماۋسىمىنا ورتاشا دايىندىق 99%, جەرگىلىكتى ماڭىزى بار 5640 نىسان بويىنشا 97% قۇرايدى.
«جالپى, جىلىتۋ ماۋسىمىنا دايىندىق جۇمىستارى جۇرگىزىلىپ جاتىر. دەگەنمەن, كەستەدەن قالىپ قويۋ, كوممۋنالدىق قاجەتتىلىكتەر مەن تۇرعىندار ءۇشىن وتىن دايىنداۋ دەڭگەيىنىڭ تومەن بولۋى فاكتىلەرى ورىن الىپ وتىر. وسىعان بايلانىستى اكىمدەرگە جوسپارلانعان جوندەۋ جۇمىستارىن بەلگىلەنگەن مەرزىمدە اياقتاۋدى قامتاماسىز ەتىپ, قاجەتتى كولەمدەگى وتىندى الدىن الا جەتكىزۋدى تاپسىرامىن», — دەدى ا. مامين.
ۇكىمەت باسشىسى وڭىرلەردىڭ اكىمدەرىنە ەكى اپتا ىشىندە بەلگىلەنگەن تارتىپتە كومىردى دايارلاۋ جانە وتكىزۋ پۋنكتتەرىنىڭ ينفراقۇرىلىمىنىڭ قازىرگى جاعدايىن, جەتكىزىلىم كەستەسىن, ساتىلاتىن كومىردىڭ باعاسىن جانە ساپاسىن تەكسەرۋدى, يندۋستريا جانە ينفراقۇرىلىمدىق دامۋ مينيسترلىگىنە «قازاقستان تەمىر جولى» ۇك» اق-مەن بىرلەسىپ, كومىر جەتكىزۋگە ارنالعان ۆاگونداردىڭ قاجەتتى كولەمىن قامتاماسىز ەتۋدى تاپسىردى.
«وڭىرلەردە كاسىپورىنداردىڭ جەتكىزىلگەن گاز بەن كومىر ءۇشىن جانە تۇرعىنداردىڭ كوممۋنالدىق قىزمەتتەرى ءۇشىن دەبيتورلىق بەرەشەگىن جابۋ جۇمىسىن كۇشەيتۋ قاجەت», — دەدى پرەمەر-مينيستر.
ا. مامين قر ەنەرگەتيكا, يندۋستريا جانە ينفراقۇرىلىمدىق دامۋ مينيسترلىكتەرىنە وڭىرلەر اكىمدىكتەرىنىڭ الداعى جىلىتۋ ماۋسىمىنا بارلىق وبەكتىلەردى دايىنداۋ جۇمىسىن اياقتاۋىن باقىلاۋدا ۇستاۋدى قامتاماسىز ەتۋدى تاپسىردى.
